Кавказ заповедникыр зызэхащагъэр илъэс 97-рэ зэрэхъурэм ипэгъокIэу дунэе сервисэу Storytel лъэхъэ­нэ зэфэшъхьафищмэ яхьылIэгъэ аудиотхылъ гъэшIэгъонищ къыщагъэхьазырыгъ: «Воспоминания кавказского офицера» Федор Торнау ытхыгъэу, «Кто хозяин в лесу» Анатолий Кудактиным иеу ыкIи «Тропами горного Черноморья» зыфиIоу Юрий Ефремовыр зиавторыр. Макъэ акIэтэу тхылъыкIэхэр гъэпсыгъэнхэм искусствэм щызэлъашIэрэ IофышIэшхохэр дэлэ­жьагъэх.

ИкIыгъэ илъэсыр хэгъэгу кIоцI зекIоным и Илъэсэу кIуагъэ. Урысыем ицIыфхэр тапэкIэ фэдэу IэкIыб къэралхэм кIонхэ амал щыIагъэпти, тикъэралыгъо изыгъэпсэфыпIэхэм ыкIи чIыпIэ гъэшIэгъонхэм зафагъэзагъ. Мы зэхъокIыныгъэм елъытыгъэу, Storytel мэхьанэ иIэу ылъытагъ Урысыем изаповеднэ шъолъыр­хэм афэгъэхьыгъэ тхылъхэу макъэ зыкIэтхэр тетхэгъэнхэр.

Апэрэ тхылъхэр Кавказым ичIыопс ыкIи ащ щыпсэухэрэм, итарихъ афэгъэхьыгъэх. Кавказ заповедникыр ЕвропэмкIэ анахь къушъхьэмэз заповедник инхэм ащыщ ыкIи ЮНЕСКО-м и Дунэе кIэн хагъэхьагъ. Зыфэдэ щымыIэ заповедникым къыщыкIыхэрэм ыкIи щыпсэухэрэм, игеографие нэшанэхэм яхьылIагъэу тхылъ макIэп щыIэр, ау анахь дэгъухэр ахэм къахахыгъэх.

«Кавказ заповедникыр ичIыопс, игеографие ыкIи итарихъ закъоп зэрэзэлъашIэрэр. ИцIыф хьалэмэт­хэу мы тхылъхэр зытхыгъэхэм афэдэхэр ыкIи мафэ къэс шIур зылэжьыхэрэр ары. Макъэ зыкIэт тхылъхэр тымыгъэхьазырхэу, зекIохэм — тихьакIэ­хэм хэутыгъэ тхылъхэр, буклетхэр яттынхэ тлъэ­кIыщтыгъ. Ау къытэшIэкIыгъэ дунэе дахэр лъэшэу зикIасэхэмкIэ аудиотхылъхэр нахь Iэрыфэгъу хъун­хэу ыкIи нахь зехьэгъошIухэу тлъытагъэ», — къыIуагъ Ольга Пеговам, Кавказ заповедникым экологическэ гъэсэныгъэмрэ зекIонымрэкIэ директорым игуадзэ.

ЖъоныгъуакIэм и 25-м щегъэжьагъэу сервисэу Storytel кIэтхагъэ пэпчъ зыфэе тхылъым щедэIун ылъэкIыщт, апэрэ мэфэ 14-м ыпкIэ ымытэу.

(Тикорр.).