ХэушъхьафыкIыгъэ дзэ операциеу Украинэм щыкIорэм зэзэгъыныгъэ шIы­кIэм тетэу хэлажьэхэрэм алъэныкъокIэ зэхъокIыныгъэу аухэсыгъэхэм жур­­на­листхэр ащигъэгъозагъэх АР-м идзэ комиссарэу Александр Авериным.

— ХэушъхьафыкIыгъэ дзэ операциер зыкIорэ илъэсныкъом ехъугъэу Адыгеим щыIэ гарнизонхэм ядзэ частьхэр чанэу ащ хэла­жьэх. Джащ фэдэу зэзэгъы­ныгъэ шIыкIэм тетэу мы Iоф­тхьабзэм хэлажьэ зышIоигъохэм япчъагъэ хэхъо. Илъэсныкъом къыкIоцI Адыгеим щыпсэурэ нэбгырэ 300-мэ шIоигъоныгъэ яIэу зэзэгъыныгъэ зыдашIыгъэ­хэм (контрактникхэм) якуп хэхьагъэх. Ахэм ащыщэу нэбгыри 160-м ехъур мы Iофтхьабзэм хэлэжьагъэх. КъэIогъэн фае, а уахътэм къыкIоцI щытхъу хэлъэу къулыкъур зэрахьыгъэм къы­хэкIэу нэбгырэ 15-мэ тын лъапIэхэр къафагъэшъошагъэх, — къыIуагъ А. Авериным.

Дзэ комиссарым къызэриIотагъэмкIэ, Урысыем и Президент субъектхэм япащэхэм зэкIэми зафигъэзагъ хэушъхьа­фыкIыгъэ подразделениехэр яшъолъырхэм ащагъэпсынхэу. Ащ къыхэкIэу Андырхъое Хъусен ыцIэ зыхьырэ «Мыекъопэ дивизиер» Адыгеим щызэхащагъ. Пшъэрылъэу яIагъэр шышъхьэ­Iум и 10-м нэс батареир агъэ­псыныр, ащ хэхьащтхэр къэугъоигъэнхэр ары. Мы мафэм ехъулIэу ар гъэцэкIагъэ хъугъэ, зы батареир хэушъхьафыкIыгъэ дзэ операцием хэлэжьэнэу агъэкIуагъ. ЯтIонэрэр процент 40-м ехъоу аугъоигъ.

— Къыхэгъэщыгъэн фае, АР-м и ЛIышъхьэу Къум­пIыл Мурат игу­къэкIыкIэ ыкIи иуна­шъо­кIэ зэзэгъыныгъэ шIыкIэм тетэу мы Iоф­тхьабзэм хэлажьэхэ­рэм ахъщэ IэпыIэгъоу сомэ мини 100 зырыз ежьхэм е ягупсэхэм ареты. ГущыIэм пае, мы Iофтхьабзэм хэлэжьэнэу шIоигъоныгъэ зиIэм ищы­кIэ­гъэ тхылъхэр къы­зытIэкIи­гъа­хьэхэрэм нэуж ахъщэр исчет фитэ­гъа­хьэ. А 1-рэ батареим хэтхэм зэкIэми ахъщэр аIэкIэ­хьагъ, — еIо дзэ комиссарым.

Мы Iофтхьабзэм изэхэщэн мэхьанэшхо зэриIэр къыкIигъэ­т­хъыгъ А. Авериным. АщкIэ пшъэрылъ шъхьаIэу яIэр илъэсныкъом ехъугъэу дзэ операцием хэла­жьэ­хэрэ дзэкъулыкъу­шIэхэм зарагъэгъэпсэфыныр ары. Ащ къы­хэкIэу ахэр зэбла­хъух. Мы илъэсым ыкIэхэм анэс ятIонэрэ батареим хэтыщтхэр къаугъоинхэр япшъэрылъ.

ЫпэкIэ илъэс 50-м нэсыгъэр дзэ къулыкъум ирезерв къыхагъэкIыжьыщтыгъэмэ, джы бэмэ яшIоигъоныгъэ къыдалъыти, ныбжьыр лъагъэкIотагъ. Ежь ишIоигъоныгъэкIэ зэзэгъыныгъэ шIыкIэм тетэу хъулъфыгъэм къулыкъур ыхьын ылъэкIыщт ыныбжь илъэс 59-рэ мэзэ 11-рэ мэхъуфэ. Ащ нэмыкIэу, хьапсым чIэсхэу бзэджэшIэгъэ мыин зезыхьагъэхэр (гущыIэм пае, кIэлэпIупкIэр зэрамытыгъэм е ешъуагъэу машинэр зэрэзэрафагъэм апае агъэпщынагъэхэм) япсауныгъэ къехьымэ хэушъхьа­фыкIыгъэ дзэ операцием хэлэ­жьэнхэ алъэкIыщт. Мыхэм аха­хьэхэрэп укIакIохэр, цIыфым шъхьакIо езыхыгъэхэр, нэмыкI­хэри. Ащ нэмыкIэу, аныбжьыкIэ къатефэу, илъэс 18 — 19-м ушъхьагъу зэфэшъхьафхэмкIэ къулыкъур зымыхьыгъэхэм аныбжь илъэс 30 — 35-рэ хъу­гъэ­ми, зэзэгъыныгъэ шIыкIэм тетэу къулыкъур ахьын алъэ­кIыщт.

КъэIогъэн фае, зэпэуцужьхэм чанэу ахэлажьэхэрэм, анахь щынагъо къэзытырэ чIыпIэхэм ащыIэхэм сомэ мин 200 зырыз араты. ПэшIорыгъэшъэу контрактник пэпчъ къэбарэу щы­Iэхэм ащагъэгъуазэ, дэгущыIэх.

— АР-м и ЛIышъхьэ, джащ фэдэу муниципальнэ образованиехэм япащэхэм яшIогъэшхо къытагъэкIы. Мы мафэм ехъу­лIэу тиреспубликэ мэкъэгъэIу куп 71-рэ щызэха­щагъ. Ахэм зэкIэмкIи нэбгырэ 200 фэдиз ахэлажьэ. Мурадэу тиIэр цIыфхэр къет­щэлIэнхэ къодыер арэп, къэбарэу щыIэм щыдгъэгъозэнхэр ары нахь. Зэзэгъыныгъэ шIыкIэм игугъу пшIын хъумэ, ыпэкIэ мазэм къыщегъэжьагъэу илъэсрэ ныкъорэм нэс зэзэгъыныгъэ адэтшIыщты­гъэмэ, джы илъэсныкъом къыщегъэжьагъэу илъэсым нэс контрактым кIэтэ­гъатхэх, — къыIуагъ дзэ комиссарым.

КIэухым журналистхэм яуп­чIэхэм джэуап къаритыжьызэ А. Авериным ицыхьэ телъэу къыIуагъ дзэм къулыкъур щызыхьынэу дащырэ ныбжьыкIэхэр хэушъхьафыкIыгъэ дзэ операцием зэрэхамыгъэлажьэхэрэр. Ащ фэдэ унашъо ышIыгъ Апшъэ­рэ Главнокомандующым. КIАРЭ Фатим.