Амыгъэкощырэ мылъкумкIэ къэралыгъо реестрэ зыкIым (ЕГРН) къыхэтхыкIыгъэхэр ары фэтэрыр, унэр, гаражыр, чIыгу Iахьыр ямылъку унае зэрэхахьэрэр къэзыушыхьатырэ тхылъ шъхьаIэу непэкIэ щытыр.

2022-рэ илъэсым иапэрэ мэзибл Адыгэ Республикэм и Кадастрэ палатэ ЕГРН-м къыхэхыгъэ къэбар мин 600 фэдиз Адыгеим исхэм аIэкIигъэхьагъ, ахэм япроцент 97-р электрон документых.

«Амыгъэкощырэ мылъкум инэшэнэ шъхьа­Iэхэм, псэуалъэр зием, кадастрэ уасэм ыкIи нэмыкIхэм афэгъэхьыгъэ къэбар зэфэ­шъхьафхэр ЕГРН-м къыхатхыкIых. Ахэм чIыпIэу аубытыщтыр зэлъытыгъэр закъы­фэзыгъазэхэрэм фэIо-фэшIэ лъэпкъэу къыхахырэр ары», — къыIуагъ Росреестрэм ишъо­лъыр гъэIорышIапIэ ипащэу Марина Никифоровам.

Республикэм исхэр анахьэу зыфэныкъохэр амыгъэ­кощырэ мылъкур зэряер къэзыушыхьатырэ тхылъхэр ары. Илъэсыр къызихьагъэм щегъэжьагъэу республикэм исхэм ащ фэдэ тхылъ мин 440-м ехъу аIэкIагъэхьагъ. Амыгъэкощырэ мылъкум инэшэнэ шъхьаIэхэми, ащкIэ фитыныгъэу яIэхэм афэгъэхьыгъэ къэбархэми цIыфхэр къакIэупчIэх. 2022-рэ илъэсым иапэрэ мэзи 7 ащ фэдэ къэбар мин 55-м ехъу аIэкIагъэхьагъ. Ащ нэмыкIэу зигугъу къэтшIыгъэ уахътэм Кадастрэ палатэм амыгъэкощырэ мылъкум фэгъэхьыгъэ къэбар мин 40 фэ­диз, мылъкур нэмыкIым фэгъэзагъэ зэрэхъу­гъэм ехьылIэгъэ къэбар мин 15 фэдиз аритыгъ.

ЕГРН-м ит къэбархэр къызIэкIагъэхьанхэ алъэкIыщт МФЦ-м иофис ашъхьэкIэ зыфагъазэзэ е Росреестрэм исайт къызфагъэфедэзэ. Кадастрэ палатэм иIофышIэ ядэжь къэкIонышъ, зыфэехэ фэIо-фашIэхэр къафигъэ­цэкIэнхи ылъэ­кIыщт. Мэфищ нахьыбэ темышIэу реестрэм къыхэхыгъэ къэбархэр къаIукIэнхэ фае.

«ЕГРН-м къыхэхыгъэ къэбархэр зящыкIагъэхэр амыгъэкощырэ мылъкур ащэ е нэмыкI сатыу Iофтхьабзэхэр зэрахьэхэ зыхъукIэ ары. А документ закъор ары амыгъэкощырэ мылъкумкIэ фитыныгъэу яIэхэр къызыщыгъэшъыпкъэжьыгъэхэр. Сатыу Iофтхьабзэ горэ зешъухьаным ыпэкIэ ащ фэдэ къэбархэр къаIышъуххэмэ, гъэпцIакIохэми, щэкIо нэпэнчъэхэми шъуа­щыухъумагъэ хъущт», — къы­Iуагъ Адыгэ Республикэм и Кадастрэ палатэ ипащэу ХъокIо Аюбэ.