Проектэу «Билет в будущее» зыфиIорэм профориентациемкIэ Iоф­шIэгъэ анахь дэгъухэм ащыщ зиIэ хъугъэхэу Любовь Галкинамрэ Александра Креховамрэ ахэм къатегущыIагъэх.

Урысые проектым зэрэхэлэжьагъэр Любовь Галкинам къыIотагъ. Ар Мыекъопэ лицееу N 35-м информатикэмкIэ икIэлэегъадж. Урысыем проф­ориентациемкIэ ипрактик анахь дэгъу 30-мэ ащыщ хъугъэ. «Дети к детям» зыфиIорэ лъэныкъор ары зыхэлэжьагъэр.

— Проектэу «Студент на один день» зыфиIорэм я 10 — 11-рэ классхэм ащеджэхэрэм Iоф зэрадэпшIэщтыр къыреIотыкIы. Мыщ дэжьыр ары ныбжьыкIэхэм ящыIэныгъэ зэрапхыщт сэнэхьатыр къызыхахырэр. Проектым къызэрэщыдэлъытагъэмкIэ, Мыекъуапэ дэт апшъэрэ еджапIэхэр кIэлэеджа­кIохэм къакIухьащтых, ашIо­гъэшIэгъон сэнэхьатхэм нахь игъэкIотыгъэу защагъэгъозэщт. Я 4 — 5-рэ курсхэм яегъэджэн сыхьатхэм ачIэхьащтых. Мэфэ реным кIэдэеджакIохэр уни­верситетым щыIэщтых. Мафэм ыкIэм Iэнэ хъурае афызэха­щэщт. КIэлэегъаджэхэр, сту­дентхэр ыкIи кIэлэеджакIохэр ащ хэлэжьэщтых. НыбжьыкIэхэм агукIэ зыфэщэгъэ сэнэхьатхэр къаIощт, нахьыжъхэм опытэу аIэкIэлъымкIэ къадэгощэщтых, — еIо Любовь Галкинам.

КIэлэегъаджэм зэрилъытэ­рэмкIэ, мыщ фэдэ шIыкIэхэм яшIуагъэ къэкIощт, агукIэ къыхахыщт сэнэхьатым нахь пэблагъэ хъущтых.

Проектыр УФ-м гъэсэныгъэм­кIэ и Министерствэрэ Гуманитар проектхэмкIэ Фондымрэ зэхащэ. УФ-м и Президент иуна­шъокIэ ар щыIэныгъэм щыпхыращы. Проектым ишIуагъэкIэ, ыпкIэ хэмылъэу кIэлэ­еджакIохэм ящыIэныгъэ зэрапхыщт сэнэхьатыр къыхахы.

Красногвардейскэ районымкIэ гимназиеу N 1-м пэублэ классхэмкIэ икIэлэегъаджэу Александра Креховам ипроектэу «Таланты будущего» зыфиIорэр анахь дэгъуи 100-м ахэхьагъ.

КIэлэегъаджэм къызэрэхи­гъэщыгъэмкIэ, ныбжьыкIэр ыгу­кIэ зыфэщэгъэ лъэныкъом икъы­хэхын мэхьанэ ин иI. Мы проектым ишIуагъэкIэ кIэлэ­еджакIом сэнэхьатым икъы­хэхын нахь IэшIэх фэхъу. Гурыт еджапIэм кIэлэеджакIор зэрэщеджэрэм, ОГЭ-м, ЕГЭ-м зызэрафигъэхьазырырэм мэхьэнэ ин нахьыжъхэм раты, ау ар зэпхыгъэр, къыкIэлъыкIощтыр ащэгъупшэ. Гурыт еджапIэр къызаухыкIэ, ахэм сэнэхьатэу зыфэлэжьэщтхэр къыхахы, нэIосакIэхэр ашIых, IофшIэныр ра­гъажьэ. Арышъ, сэнэхьатым епхы­гъэ егъэджэнхэм мэхьанэ ин зэрэратын фаер Александра Креховам къыхигъэщыгъ.

Проектым хэлажьэ зышIоигъохэм сайтэу bvbinfo.ru. зыфиIорэм зыщатхын фае.

ДЕЛЭКЪО Анет.