Къалэу Калугэ шышъхьэIум и 17 — 18-м щыкIогъэ Урысые форумэу «Цифровая Эволюция» зыфиIорэм Адыгеир хэлажьи, Iахьзэ­хэлъ обществэу «Р7» зыфиIорэм зэпхыныгъэ дыриIэнэу зэзэгъыныгъэм дыкIэтхагъ.

АР-м цифрэ хэхъоныгъэмкIэ, къэбар ыкIи телекомму­никационнэ технологиехэмкIэ и Министерствэ къызэрэщаIуа­гъэмкIэ, зэзэгъыныгъэм къыдыхэлъытагъэу офисхэм аща­гъэфедэным тегъэпсыхьэгъэ программэу «Р7» зыфиIорэр республикэм иеджапIэхэм зэ­кIэми къызIэкIэгъэхьэгъошIу афашIыщт.

— Офисхэм ащыгъэфедэ­гъэным тегъэпсыхьэгъэ полнофункциональнэ программэр кIэлэегъаджэхэми, кIэлэеджа­кIохэми агъэфедэн алъэкIынэу къашIыщт. Ащ тхылъхэр (документхэр), таблицэхэр ыкIи пре­зентациехэр зэзыгъафэрэу, хэукъоныгъэхэр зыгъэтэрэзыжьрэ «редакторхэр», сурэтхэм, видеохэм зэряплъыщтхэ шIыкIэхэр, нэмыкI амалэу непэ щыIэхэр къыщыдэлъытагъэх, — къыщаIуагъ министерствэм.

АР-м гъэсэныгъэмрэ шIэныгъэмрэкIэ и Министерствэ къы­зэритыгъэмкIэ, федеральнэ проектхэм къадыхэлъытагъэу, цифрэ шIыкIэм гъэсэныгъэмкIэ республикэм исистемэ зыщегъэушъомбгъугъэным ыуж итых. ЗэкIэ еджапIэхэм ащ ищыкIэгъэ оборудованиер ачIэт, интернет зэпхыныгъэр яI. КIэлэегъаджэхэми мы лъэныкъомкIэ яшIэныгъэ хагъэхъоным фэшI егъэджэнхэр афызэхащэх.