Урысыем и Къэралыгъо быракъ и Мафэ фэгъэхьыгъэ митинг-концерт шышъхьэIум и 22-м Мыекъуапэ щыкIуагъ.

Адыгэ Республикэм икъэлэ шъхьаIэ игупчэу В. И. Лениным ыцIэ зыхьырэм щызэхащэгъэ мэфэкI Iофтхьабзэм АР-м и Правительствэ, Парламентым, Мыекъуапэ иадминистрацие якъулыкъушIэхэр, IофшIапIэхэм, еджапIэхэм ялIыкIохэр, общественнэ зэхахьэхэм ахэтхэр, дзэм, IофшIэным яветеранхэр, ныбжьыкIэхэр, нэмыкIхэри хэлэжьагъэх.

Мафэм «Триколор» зыфиIорэ Iофтхьабзэр, нэмыкI зэIукIэ­­- гъу­хэр зэхащагъэх. Автомобильхэр зэхэтхэу Мыекъуапэ иурам­хэм къарыкIуагъэх, Урысыем и Къэ­ралыгъо быракъ агъэбыбэтагъ. Лъэпкъ IэпэIасэхэм яIэшIагъэхэр Мыекъуапэ пчыхьэм сыхьатыр 5-м къыщыублагъэу къагъэлъэгъуагъэх. ТIэшъу Нурбый, Гостэкъо Руслъан пхъэм хашIыкIыгъэ Iанэхэр, унагъом ищыкIэгъэ пкъыгъохэр, пхъэ­кIычхэр, нэмыкIхэри къагъэлъэ­гъуагъэх. Джарымэкъо Зуриет, Гумэ Ларисэ, Цурмыт Рузанэ, Нэгэрэкъо Казбек, фэшъхьаф­хэм адыгэ тхыпхъэ­хэр, шIухьафтын ашIырэ IэшIа­гъэхэр игъэкIотыгъэу къагъэлъэ­гъуагъэх.

Митинг-концертыр зезыщэгъэ­хэ Ахэджэго Рузанэрэ ОелI Адамрэ зэхахьэм щыхагъэунэфыкIыгъ лъэпкъ 300-м нахьыбэ зыщыпсэурэ Урысыем и Къэралыгъо быракъ и Мафэ хэгъэ­гум игъэкIотыгъэу зэрэщагъэмэфэкIырэр.

Концертыр кIэлэцIыкIу ансамблэу «Шпаргалкэм» къы­зэIуи­хыгъ. Урысыем, IэкIыб хэгъэгум ащызэлъашIэхэрэ кIэ­лэцIыкIу купхэу «Мыекъуапэ инэфылъэхэр», «Звонницэр», «Радугэр», «Форвардыр» искусствэхэмкIэ кIэлэцIыкIу еджапIэу N 1-р, фэшъхьафхэри мэфэкIым щыуджыгъэх, лIыхъужъныгъэм, тарихъым, мамыр щыIакIэм афэгъэхьыгъэ орэдхэр агъэ­жъынчыгъэх. Адыгеим щыпсэурэ лъэпкъхэм ти ЛIышъхьэу КъумпIыл Мурат мэфэкIым фэшI къафэгушIуагъ.

— Тихэгъэгу зэрэдгъэ­лъапIэрэр, Урысыем итарихъ тызэрепхыгъэр къэдгъэ­лъэгъонхэмкIэ мэфэкIым амалышIухэр къытетых. Патриотизмэм епхыгъэ шэн- хабзэхэр республикэм щыпсэурэ лъэпкъхэм къау­хъумэхэзэ, дин зэфэ­шъхьафхэр алэжьы. Къэралыгъом, промышленностым, мэкъу-мэщым ягъэпытэн, хэхъоныгъэ ашIыным яIахьышIу хашIыхьэ. Адыгеим ищыIакIэ нахьы­шIу хъуным фэ­гъэхьыгъэ проектхэр щыIэныгъэм щыпхыращыхэзэ, Урысыеми икъэралыгъо гъэпсыкIэ агъэпытэ, — къыIуагъ КъумпIыл Мурат.

Адыгэ Республикэм и Парламент и Тхьаматэу Владимир Нарожнэр зэхахьэм къыщыгущыIагъ. Хэгъэгум и Къэралыгъо быракъ тарихъым чIыпIэ ин зэрэщыриIэр игущыIэ къыщыхигъэщыгъ. ХэушъхьафыкIыгъэ дзэ операциер ти УIэшыгъэ КIуа­чIэхэм Украинэм зэрэщагъэцакIэрэм мэхьэнэ инэу иIэм къыкIигъэтхъыгъ.

Адыгэ Республикэм и Къэралыгъо академическэ къэшъо­кIо ансамблэу «Налмэсым», художественнэ пащэр Хъоджэе Аслъан, АР-м иорэдыIо-къэшъо­кIо ансамблэу «Ислъамыер», художественнэ пащэр Нэхэе Аслъан, концертым хэлэжьа­гъэх. Артистхэу Елизавета Призовам, Еутых Вячеслав орэдхэр къаIуа­гъэх. IофшIапIэу «Ошъадэм» иансамблэхэу «Синдикэм», «Ащэ­мэзым», нэмыкIхэм мэфэкI пчыхьэзэхахьэр лъагъэкIотагъ. Урысыем, Адыгеим ябыракъхэр кIэлэцIыкIухэм аIыгъхэу пчэгум къыщышъуагъэх.

Концертыр къызаухым мэфэкI мэшIоустхъохэр ошъогу къар­гъом щышIэтыгъэх. Пчыхьэзэхахьэм нэбгырэ шъэ пчъагъэ еплъыгъ. Мамыр щыIакIэр гъэпытэгъэныр Урысыем и Къэралыгъо быракъ лъэпкъхэр зэрэзэфищэхэрэр къыхэщыгъ.

ЕмтIылъ Нурбый.