Хабзэ зэрэхъугъэу, гъэсэныгъэм исистемэ иIофышIэхэм яшышъхьэIу зэIукIэшхо тыгъуасэ Мыекъуапэ щыкIуагъ.

Iофтхьабзэм хэлэжьагъэх АР-м и Премьер-министрэ иIэнатIэ зыгъэцэкIэрэ КIэрэщэ Анзаур, гъэсэныгъэмкIэ, наукэмкIэ, ныбжьыкIэ IофхэмкIэ, спортымкIэ, СМИ-мкIэ ыкIи общественнэ организациехэм зэпхыныгъэ адиIэгъэнымкIэ АР-м и Къэралыгъо Совет — Хасэм икомитет ипащэу Шэуджэн Тембот, АР-м гъэсэныгъэмрэ шIэныгъэмрэкIэ иминистрэ игуа­дзэу Пэрэныкъо Сусаннэ, АР-м ихэбзэ гъэцэкIэкIо органхэм, муниципальнэ образованиехэм яадминистрациехэм ялIыкIохэр, апшъэрэ ыкIи гурыт профессиональнэ гъэсэныгъэ къэзытырэ учреждениехэм япащэхэр, нэмыкIхэр.

Пстэумэ апэу УФ-м гъэсэныгъэмкIэ иминистрэу Сергей Кравцовым онлайн шIыкIэм тетэу зэхэсыгъом хэлажьэхэрэм закъыфигъэзагъ. ИкIыгъэ илъэс еджэгъумкIэ агъэнэфэгъагъэр зэкIэ гъэцэкIагъэ зэрэхъугъэр ащ къыхигъэщыгъ, джы къа­кIорэм пшъэрылъэу къыгъэуцухэ­рэм къатегущыIагъ.

— ЕджапIэхэм шIэныгъэу кIэлэеджакIохэм щарагъэгъотырэмкIэ дунаим пэрытныгъэр щызыIыгъ къэралыгъуи­пшIым ащыщ тыхъуныр лъэпкъ проектэу «Гъэсэныгъ» зыфиIорэм анахь пшъэрылъ шъхьа­Iэу щыгъэнэфагъэхэм ащыщ. Ыпэ титэу тэкIо, ащ тетэуи тылъыкIотэн, кIэлэ­цIыкIухэм еджэныр, кIэу зыгорэ зэрагъэшIэныр ашIогъэшIэгъоныным тыпылъын фае, — къыIуагъ ащ.

Министрэм къызэриIуагъэмкIэ, Iоныгъом и 1-м къыщы­ублагъэу кIэлэегъаджэхэм нахьыпэкIэ агъэхьазырыщтыгъэ тхьапэхэм къащыкIэщт. Пшъэ­рылъ шъхьаIэу яIэр, кIэлэцIыкIухэм япIун, яегъэджэн, икъоу агъэцэкIэнымкIэ ащ ишIуагъэ къэкIощт.

Гъэсэныгъэм иIофышIэхэм ялэжьапкIэ тапэкIи зэхъокIыщт, классхэм япащэхэм, гурыт профессиональнэ гъэсэныгъэ зыщарагъэгъотырэ еджапIэхэм ягруппэхэм якураторхэм ахъщэ тедзэу аратырэр тырахыжьыщтэп ыкIи къыщагъэкIэщтэп. Кадрэхэм ягъэхьазырын епхыгъэ IофшIэнри лъагъэкIотэщт. Ащ пае психолог ыкIи кIэлэегъэджэ IофшIэнхэм защыфагъэ­сэрэ класс 1500-м ехъу агъэ­псыгъ. ЯцIыкIугъом къыщегъэ­жьагъэу мы сэнэхьатым нэIуасэ фашIыщтых, фагъэхьазырыщтых. 2024-рэ илъэсым нэс ащ фэдэ класс мини 5-м ехъу агъэпсын гухэлъ яI.

АР-м и ЛIышъхьэ ыцIэкIэ шышъхьэIу зэIукIэшхом хэлажьэхэрэм шIуфэс къарихыгъ Премьер-министрэм иIэнатIэ зыгъэцэкIэрэ КIэрэщэ Анзаур.

— Пшъэрылъэу мы лъэныкъом иIэр бэ, — къы­Iуагъ ащ. — Федеральнэ гупчэм IэпыIэгъоу къытырэм ишIуагъэкIэ Адыгеим щызэшIохыгъэ хъугъэр бэ. КIэлэцIыкIоу республикэм исым ип­чъагъэ хэхъо, арышъ, а зэшIотхырэм къыщыкIэ хъущтэп.

Лъэпкъ проектэу «Демография» зыфиIорэм къыдыхэлъытагъэу илъэси 4-м кIэлэцIыкIу IыгъыпIэ 12, ар чIыпIэ 2520-рэ мэхъу, республикэм щашIыгъ. Нэбгыри 120-м телъытэгъэ кIэ­лэцIыкIу IыгъыпIэу Шэуджэн районым икъутырэу Тихоновым щырагъэжьагъэр мыгъэ аухыщт.

Къоджэ псэупIэхэм хэхъоныгъэ ягъэшIыгъэным тегъэпсыхьэгъэ программэм къыдыхэлъытагъэу кIэлэцIыкIу IыгъыпIитIу атIупщыгъ, зы IыгъыпIэм зырагъэушъомбгъугъ. Къутырэу Крас­ная Улька зыфиIорэм щашIырэр нэбгыри 150-мэ ателъытагъ. Ар мы илъэсым аухыщт. Шэуджэн районымкIэ поселкэу Заревэмрэ къуаджэу Пщычэурэ ащырагъэ­жьэгъэ кIэлэцIыкIу IыгъыпIэхэр къэкIощт илъэсым ыкIэм нэс аухыщтых. IыгъыпIэ пэпчъ нэбгыри 120-м телъытагъ.

Гурыт еджапIэхэм сменитIу ямыIэжьыным лъэшэу Iоф зэрэ­дашIэрэм КIэрэщэ Анзаур къы­кIигъэтхъыгъ. Нэбгырэ 1100-мэ ателъытагъэу Мыекъуапэ, 250-рэ чIэфэнэу станицэу Ханскэм еджапIэхэр ащашIыхи, блэкIыгъэ илъэсым къызэIуахыгъэх. Тэхъу­тэмыкъое районымкIэ къуаджэу АдыгеякIэм, поселкэу Яблоновскэм еджапIэхэр ащырагъэжьагъэх. ЕджапIэ пэпчъ нэбгырэ 1100-м телъытагъ. Мы район дэдэм икъуаджэу Бжыхьэкъоежъым щашIырэм нэбгырэ 250-рэ чIэфэщт.

Ащ дакIоу еджапIэу Iоф зы­шIэхэрэм ащыщхэр агъэкIэжьых, лъэхъаным диштэу зэтырагъэ­псыхьажьых. Ащ фэгъэхьыгъэ федеральнэ программэу УФ-м и Президент кIэщакIо зыфэхъу­гъэм Адыгеир хэуцуагъ. Ащ къызэрэщыдэлъытагъэу, мыгъэ еджэпIи 8 агъэцэкIэжьы, Iоныгъом и 1-м хьазыр хъущтых. КъэкIорэ илъэсым еджэпIи 7 агъэкIэжьынэу агъэнэфагъ.

Джащ фэдэу гъэрекIо еджэпIэ 15-мэ яспортзал 17 агъэкIэ­жьыгъ, мы илъэсым 12 агъэцэкIэжьы, охътэ благъэм аухыщтых. Мыекъуапэ иеджапIэу N 22-м ыкIи Кощхьэблэ рай­онымкIэ къуаджэу Блащэпсынэ дэт еджапIэм ящагухэм «спортивнэ площадкэ IушкIэ» зэджагъэхэр ащагъэпсых.

— ЕджапIэр къоджэ псэупIэхэм ащыщыбэм япсэолъэ шъхьаIэу щыт. Арышъ, спорт псэуалъэу агъэцэкIэжьыхэрэр е кIэу ашIыхэрэр кIэлэ­еджакIохэм ямызакъоу, шIоигъоныгъэ зиIэу псэупIэм дэсхэм зэкIэми зэдагъэфедэн амал ятыгъэным муниципальнэ образованиехэм япащэхэм анаIэ тетын фае, — къыхигъэщыгъ КIэрэщэ Анзаур.

Нэужым гъэсэныгъэм исистемэ хэхъоныгъэхэр ышIынхэмкIэ 2022 — 2023-рэ илъэс еджэгъум зэшIохыгъэн фаехэм зэдатегущыIагъэх, еплъыкIэхэмкIэ зэдэгощагъэх.

ХЪУТ Нэфсэт.