НыбжьыкIэ сэнаущхэм яшъолъыр зэIукIэу «Фыщт-2022-рэ» зыфиIорэр Мыекъопэ районым щыкIуагъ.

ЕджэнымкIэ, спортымкIэ, общественнэ IофшIэнымкIэ, культурэмкIэ гъэхъэгъэшхохэр зышIыгъэ студент, кIэлэеджэкIо 300-м ехъу ащ къекIолIэгъагъ. Респуб­ликэм имуниципалитетхэм, Къэ­рэ­щэе-Щэрджэсым, Къэбэртэе-Бэлъкъарым, Краснодар краим къарыкIыгъэ лIыкIо купхэр ныбжьыкIэ форумым хэлэжьагъэх.

ЗэIукIэм хэлэжьэщтхэм километри 10 хъурэ гъогууанэр зэпачи, къэуцупIэу «Фыщт» дэжь къыщызэрэугъоигъэх. Апэрэ пчыхьэм республикэм имуниципалитетхэм къарыкIыгъэ купхэм зыкъагъэлъэгъуагъ, концерт цIыкIу къатыгъ.

Адыгеим и ЛIышъхьэу КъумпIыл Мурат ныбжьыкIэ чанхэм зэраIукIагъэр ары анахь хъугъэ— шIэгъэ шъхьаIэу щытыгъэр. Отраслэ зэфэшъхьафхэм къащыуцугъэ зигъо Iофыгъохэм мыщ щатегущыIагъэх. Республикэ министерствэхэмрэ ведомствэ­хэмрэ япащэхэри зэдэгущыIэ­гъум хэлэжьагъэх.

Iофтхьабзэм хэлажьэхэрэм шIуфэс къарихи, республикэм и ЛIышъхьэ зэрэхигъэунэфыкIыгъэм­кIэ, шъолъыр форумэу «Фыщтыр» хабзэм илIыкIохэмрэ ныбжьыкIэхэмрэ зыщызэIукIэхэрэ, яеп­лъыкIэхэмкIэ зыщызэдэгощэхэрэ чIыпIэу щыт. Урысые Федерацием и Президент и Полномочнэ лIыкIоу ЮФО-м щыIэ Владимир Устиновым мыщ фэдэ ныбжьыкIэ Iофтхьабзэм къыдыригъэштагъ. Къихьащт илъэсым ащ нахь зырагъэушъомбгъун, хэгъэгум и Къыблэ ишъолъырхэр зэкIэ къы­хагъэлэжьэн ямурад.

«НыбжьыкIэхэмкIэ политикэу зэрахьэрэм лъэшэу гъунэ лъы­тэфы. Адыгэ Республикэм гъэсэныгъэмрэ шIэныгъэмрэкIэ и Министерствэ иподразделениехэм ащыщ непэ ащ фэгъэ­загъэр. Ау мы охътэ благъэм хэбзэ къулыкъоу зэхащэщтыр зыпылъыщтыр ныбжьыкIэ Iоф закъохэр ары. Непэ гурыт, апшъэрэ еджапIэхэм ачIэсхэм неущ экономикэм Iоф ща­шIэщт, унашъохэр аштэщтых, тиреспубликэ хэхъоныгъэ ра­гъэ­шIыщт. НыбжьыкIэхэр гъэ­псын IофшIэнхэм ахэгъэлэжьэгъэнхэм, республикэм къыщыхъухэрэм ахэм еплъыкIэу афыряIэр тшIэным ыкIи ахэр къыдэтлъытэхэзэ тиIофшIэн зэхэтщэным мэхьанэшхо яI», — къыIуагъ АР-м и ЛIышъхьэ.

Республикэм ипащэ форумым хэлажьэхэрэм яупчIэхэм джэуап къаритыжьыгъ. ГущыIэм пае, ныбжьыкIэхэм я Урысые союз и Адыгэ шъолъыр къутамэ илIыкIо къызэриIуагъэмкIэ, якъутамэ спорт, культурэ, гъэсэныгъэ Iоф­тхьабзэхэм язэхэщэн пае сомэ миллион 1,2-рэ хъурэ грант къы­хьыгъ. НыбжьыкIэ хъупхъэхэм республикэм ипащэ «тхьауегъэ­псэу» раIуагъ социальнэ Iоф­тхьабзэхэр зезыхьэрэ мыкоммерческэ организациехэм ынаIэ зэратетым фэшI ыкIи 2023-рэ илъэсым игъатхэ щыIэщт кIэух форумым къырагъэблэгъагъ.

КъумпIыл Мурат ащ хэлэжьэнэу къыгъэгугъагъэх, социальнэ проектхэм грантэу къафатIупщырэм илъэс къэс зэрэхахъорэр, мыгъэ ар миллион 15 зэрэхъугъэр къыIуагъ.

«ИщыкIагъэ зыхъурэм къэралыгъо IэпыIэгъуми хэдгъэ­хъощт. ЦIыфхэм IэпыIэгъу афэхъу, обществэм ищыIакIэ нахьышIу зышIы зышIоигъохэм ягукъэкIхэм япхырыщынкIэ къэралыгъо IэпыIэгъур къызфагъэфедэн алъэкIыщт», — къыIуагъ АР-м и ЛIышъхьэ.

Джащ фэдэу зэIукIэм къыщаIэтыгъэх зекIоным республикэм зыщегъэушъомбгъугъэным, фэ­Iо-фашIэхэр нахьышIоу гъэцэкIэ­гъэнхэм, турист псэуалъэхэр къэбзэнхэм япхыгъэ Iофыгъохэри. Республикэм ипащэ зыгъэ­псэфыпIэу «Лэгъо-Накъэ» зэрагъэпсырэм фэгъэхьыгъэу къыIотагъ.

«ЗыгъэпсэфыпIэм иинфраструктурэ игъэпсын пае непэ ехъулIэу сомэ миллиарди 6 къыхагъэкIыгъ. Ащ амал къытыщт унэе инвестицие миллиардипшI пчъагъэ республикэм къыхалъхьанэу, IофшIэпIэ чIы­пIакIэхэр зэхэщэгъэнхэу, зекIо фэIо-фашIэ­хэр нахьышIоу Ады­геим щыгъэцэкIэгъэнхэу», — къыIуагъ республикэм и ЛIышъхьэ.

Лъэпкъ проектэу «ЗекIонымрэ хьакIэхэм дахэу апэгъокIыгъэнымрэ» зыфиIорэм диштэу предпринимательхэм ягукъэкIхэр зекIоным щыпхырыщыгъэнхэмкIэ амалыкIэхэр щыIэ зэрэхъущтри ащ хигъэунэфыкIыгъ. Лэжьэныр АПК-м щезыгъэжьэгъэкIэ предпринимательхэм IэпыIэгъоу аратырэми къыкIэупчIагъэх. КъумпIыл Мурат къызэрэзэхифыгъэмкIэ, бизнесым IэпыIэгъу егъэгъотыгъэнымкIэ системэ гъэнэфагъэ Адыгеим щызэхэ­щагъ. Грантхэр, субсидиехэр аратых, проектхэмкIэ консультациехэр афызэхащэх. Лэжьэныр езыгъэ­жьэгъэкIэ фермерхэмрэ предпринимательхэмрэ атегъэ­псыхьэгъэ проектхэм амал къа­ты мылъку зимыIэхэри Iоф горэм пыхьанхэу.

ЭкспортымкIэ республикэм амалэу иIэхэм аграр секторым зыкъыщягъэIэтыгъэн зэрэфаем епхыгъэ Iофыгъоми шъхьафэу хэплъагъэх. Адыгеим и ЛIышъхьэ зэрэхигъэунэфыкIыгъэмкIэ, рес­публикэм ипредприятиехэм продукциеу къыдагъэкIырэм хэхъо, производствэм изегъэ­ушъомбгъункIэ IофышIэхэм ягъэ­хьазырын мэхьанэшхо зиIэхэм ащыщ. АР-м и Экспорт гупчэ экспортерхэм IэпыIэгъу афэхъу. Ежь нахь къыдэхъурэ лъэныкъо­хэм хэхъоныгъэ ягъэшIыгъэныр ары республикэр зыуж итыр. ГущыIэм пае, адыгэ къуаеу АПК-м къыщыдагъэкIырэм хэхъо, чъыгхэтэ лэжьынымрэ пынджшIэнымрэ заушъомбгъу.

Джащ фэдэу форумым хэлэжьагъэхэм къоджэдэсхэм ящыIакIэ зыкъегъэIэтыгъэным, фельдшер-мамыку IэзапIэхэм, спорт псэуалъэхэм, кIэлэцIыкIу IыгъыпIэхэм, гурыт еджапIэхэм ягъэпсынрэ ягъэцэкIэжьынрэ, чIыпIэхэм язэтегъэпсыхьан япхыгъэ упчIэхэри республикэм и ЛIышъхьэ ратыгъэх. Мы лъэныкъомкIэ Iофэу ашIэрэр игъэкIотыгъэу КъумпIыл Мурат къыIотагъ.

Адыгабзэр къызэтегъэнэжьыгъэнымкIэ шIэгъэн фаехэм, Адыгеим, Къэбэртэе-Бэлъкъарым, Къэрэщэе-Щэрджэсым яя 100-рэ илъэс зэрэзэдагъэмэфэкIыщтым шъхьафэу атегущыIагъэх.

АР-м и ЛIышъхьэ къызэрэхигъэщыгъэмкIэ, предложениеу къахьыгъэхэм къулыкъухэр ахэплъэщтых ыкIи ахэмкIэ унэшъо гъэнэфагъэхэр аштэщтых.

«Гупшысэ гъэшIэгъоныбэ форумэу «Фыщт» къыщаIо зэпыт, ащ къыщахьырэ предложениехэр тызыпылъыщтхэм ахэтэгъахьэх. Мыгъи джарэущтэу тызекIощт — ведомствэхэр зигъо шъулъэгъурэ Iофыгъохэм ахэплъэщтых, илъэс зытешIэкIэ ахэм къа­фэдгъэзэжьыщт, гъэхъагъэу тиIэхэм уасэ афэтшIыщт», — къыIуагъ КъумпIыл Мурат.

АР-м и ЛIышъхьэ ипресс-къулыкъу