Адыгеим псауныгъэр къэухъумэгъэнымкIэ иминистрэу Мэрэтыкъо Рустем зипэщэ врачхэу Геническэ районым исхэм IэпыIэгъу афэ­хъу­нэу кIуагъэхэм нафэ къафэхъугъ цIыфхэм яузхэр зэрагъэунэ­фырэ аппаратхэр зэрэщымыIэхэр.

ГущыIэм пае, Геническэ районми, ащ къыпэгъунэгъу псэупIэхэми флюорографхэр, маммографхэр, рентген-аппаратхэр ямыIэхэу къычIэкIыгъ. Геническэ район гупчэ сымэджэщым щагъэуцугъэ компьютер томографми Iоф ышIэщтыгъэп, илъэсым къехъугъэу ар амы­гъэфедэу щытыгъ. Томографыр зыгъэIорышIэнэу агъэсэгъэгъэ лаборантым хэушъхьафыкIыгъэ операциер зэрэрагъажьэу къа­лэр къыбгынэгъагъ. Джырэ шап­хъэхэм адиштэрэ рентген— аппаратэу поликлиникэм ща­гъэуцугъэри агъэфедэщтыгъэп.

— Районым исхэм медицинэ фэIо-фашIэхэр дэеу зэрафызэхащэрэр нэрылъэгъу къытфэ­хъугъ, — къытфиIотагъ Адыге­им икIыгъэ врач купым ипа­щэу Анжелика Альпинам (Мые­къуапэ иа 1-рэ къэлэ поликлиникэ ия 2-рэ отделение ипащэ, Адыге­им псауныгъэр къэухъу­мэ­гъэнымкIэ и Министерствэ штатым хэмыт итерапевт шъхьа­Iэ). — ЦIыфхэр гум ранагъэхэу къычIэкIыгъ. ТыуплъэкIухэрэм адэбз узхэмрэ нэмыкI хэужъыныхьэгъэ узхэмрэ зиIэхэр бэу къахэкIыгъ.

Адыгеим щыщ врачхэм зэхэдз ямыIэу районым ис пстэуми медицинэ IэпыIэгъу арагъэ­гъоты. Зэпыугъуи, зыгъэпсэфыгъо ма­фи ямыIэу ахэм район гупчэ сымэджэщым Iоф щашIэ, IофшIэгъу ужми ядэжь кIо­хэзэ сымаджэхэм яIазэх. Хирургхэм консультациехэр район сымэджэщым щызэхащэх, операцие щашIых. ЫпкIэ хэмылъэу медицинэ фэIо­-фэшIэ псэури зэрафызэхащэрэр: зэрауплъэкIу­хэрэр, операцие зэрашIыхэрэр, Iэзэгъу уцхэр къазэраратырэр цIыфхэм агъэшIагъо. Мыекъуапэ икIыгъэ врачхэм зарагъэуплъэкIу зышIоигъохэм мафэ къэс къахэ­хъо. IофшIэгъу ужым медицинэ IофышIэхэр пIэхэлъхэм адэжь макIох, ящыкIэгъэ медицинэ Iэ­пыIэгъур арагъэ­гъоты. Хъужьынхэм зигугъэ хэ­зыхыжьыгъапэ-хэми, нэмыкI­хэми яшIуагъэ арагъэкIы, Iэпы­Iэгъу зэрамытырэ къагъанэрэп. ИщыкIагъэ зыхъурэм Мыекъуапэ щылэжьэ-рэ специалистхэм видеокIэ консультациехэр къарарагъэты.

Пандемием илъэхъан сымаджэхэр флюорографием дагъахьащтыгъэхэп. ЫпкIэ хэлъэу компьютер томографиер унэе врач горэм къафишIыщтыгъ. Къалэу Генически, ащ къыпэIулъ къоджэ псэупIэхэми адэсыбэм медицинэ фэIо-фашIэхэм алъатыщт ахъщэ аIэкIэлъыгъэп. Тхьэ закъом нэмыкI зыщыгугъынхэ ахэм яIагъэп. Ковидыр зыпэкIэкIыгъэ нэбгырабэм япсау­ныгъэ лъэшэу зэрэзэщыкъуа­гъэр, жъэгъэузымрэ адэбз узымрэ районым зызэрэщау­шъомбгъурэр чIыпIэ врачхэм къаIо. Ау сымаджэхэр икъоу ауплъэкIунхэ зэрамылъэкIыщтыгъэм къыхэкIэу зэряIазэхэрэми ишIогъэшхо къакIощтыгъэп.

Iофым изытет хъугъэр къыдалъыти, Адыгеим и ЛIышъхьэу КъумпIыл Мурат иунашъокIэ оборудованиер зэтезыгъэуцощт, ащ Iоф рызы­шIэщт лаборантхэр зыгъэсэщт специалистхэр псынкIэу Геническ агъэкIуагъэх. IТ-технологиехэмкIэ инженерэу, АРКБ-м информационнэ технологиехэмкIэ иотдел ипащэу, Адыгеим псауныгъэр къэухъу­мэгъэнымкIэ и Министерствэ информационнэ технологиехэмкIэ штатым хэмыт испециалист шъхьаIэу Александр Обмачевскэмрэ рентген-лаборантэу, АР-м идиспансерэу жъэгъэузхэм зыщяI­азэу Д.М. Шышъхьэм ыцIэ зыхьырэм ирентген-лаборант шъхьаIэу Сергей Сидоренкэмрэ джыдэдэм Геническ щыIэх.

— Апэрэ мэфэ шъыпкъэм компьютер томографыр зэтедгъэпсыхьи сымаджэхэр тыуплъэ­кIоу едгъэжьагъ, — къыIотагъ Сергей Сидоренкэм. — Инсульт къызэутэлIагъэкIэ зэгуцафэхэу планым хэтхэр ары апэрэ чэзыоу тыуплъэкIугъэхэр. Ахэм ащыщэу бзылъфыгъитIумэ ашъхьэ­куцI адэбзым зэлъикIугъэу агъэунэфыгъ. Джы ахэм зэряIэзэщтхэ шIыкIэм еусэщтых.

Геническэ район сымэджэщым Iут лаборантхэми, врачхэми къахэкIыгъэх компьютер томографыр зэрэбгъэIорышIэщт шIыкIэм медицинэ IофышIэхэр фэзгъэсэн зылъэкIыщтхэр.

— Компьютер томографыр зэрэзэтырагъэпсыхьагъэр дэгъу дэд, джы нэбгырабэм тишIуагъэ ядгъэкIын тлъэкIыщт, — Адыге­им иврачхэм зэрафэразэр къы­­хэщэу гушIозэ къеIуатэ Гениче­скэ район гупчэ сымэ­джэщым иневрологэу Олег Марочак.

Александр Обмачевскэм рент­ген-аппаратри зы мафэкIэ зэтыригъэпсыхьагъ. Ащ къызэриIуагъэмкIэ, цифрэ технологиехэр къызфагъэфедэзэ мыщкIэ цIыфхэм япсауныгъэ ауплъэкIун алъэкIыщт.

Геническ дэсхэр Адыгеим щыщ врачхэм афэразэх медицинэ IэпыIэгъу къазэраратырэм фэшI. НэмыкI медицинэ аппаратхэр район гупчэ сымэджэщым мы мафэхэм къызэрэIэ­кIэхьагъэхэри къэIогъэн фае.

Людмила Погасеева.

къ. Геническ