Донецкэ ыкIи Луганскэ народнэ республикэхэм къары­кIы­гъэхэу Мыекъопэ районым щыIэ лагерэу «Горнэм» зыщызыгъэпсэфыхэрэм апае Адыгеим и Къэралыгъо автоинспекцие икъулыкъушIэхэм кIэлэцIыкIухэм шIэныгъэ тедзэ ягъэгъотыгъэнымкIэ Гупчэм иIофышIэхэр ягъусэхэу гъогурыкIоным ишапхъэхэм афэгъэхьыгъэу мэфэкI шIы­кIэм тетэу Iофтхьабзэ афызэхащагъ.

КIэу къежьэгъэ агъэкощырэ комплексэу «Щынэгъончъэным илабораторие» зыфиIорэм ишIуагъэ­кIэ нэрылъэгъу егъэджэн материалхэр къызфагъэфедэхэзэ гъогурыкIоным шапхъэу пылъхэр, кушъхьэ­фачъэмкIэ, роликхэмкIэ ыкIи самокатымкIэ узэ­рэзекIон фаер кIэлэцIыкIухэм къафаIотагъ.

Гупчэм испециалистхэм манекеныр къызфагъэфедэзэ гъогу хъугъэ-шIагъэхэм къахэкIэу шъобж зытещагъэ хъугъэ цIыфхэм апэрэ медицинэ IэпыIэгъур зэрябгъэгъо­тын плъэкIыщтыр кIэлэцIыкIу­хэм арагъэлъэгъугъ.

НыбжьыкIэхэм на­хьыжъ­хэм яупчIэхэм яджэуапхэр чанэу къыратыжьы­гъэх, гъогу тамыгъэхэм къа­рыкIырэр, нэфрыгъуа­зэм епхыгъэхэр къаIо­тагъэх.

ГъогурыкIоныр щынэ­гъончъэнымкIэ шIэныгъэу зэрагъэгъотыгъэхэр зэфа­хьысыжьхэзэ ныбжьыкIэ­хэм полицием икъулыкъу­шIэхэм гущыIэ аратыгъ тапэкIи ахэр амыукъонхэу, ахэмкIэ яIахьылхэм ыкIи яныбджэгъухэм адэго­щэнхэу.

Урысыем хэгъэгу кIоцI IофхэмкIэ и Министерствэ Адыгэ Рес­публикэмкIэ и Къэралыгъо автоинспекцие и ГъэIорышIапI.