Урысыем гъэсэныгъэмрэ шIэныгъэмрэкIэ и Министерствэ 2022-рэ илъэсым шышъхьэIум и 10-м ышIыгъэ унашъоу N 750-р зытетымкIэ хэгъэгум иапшъэрэ еджапIэхэм ясту­дентхэу, яаспирантхэу 2022 — 2023-рэ илъэс еджэ­гъум Урысые Федерацием и Правительствэ истипендие зэратыщтхэр аухэсыгъэх.

Мыекъопэ къэралыгъо технологическэ университетым щеджэрэ студенти 7 ахэм ахэфагъ.

2022-рэ илъэсым Iоныгъом и 1-м къыщегъэжьагъэу 2023-рэ илъэсым шышъхьэIум и 31-м нэс сомэ 1440-рэ хъурэ стипендие мазэ къэс ахэм аратыщт. МКъТУ-м имедицинэ институт щеджэхэу ащ фэдэ стипендие зыIукIэщтхэр:

— Маргарита Аруша­нян, я 5-рэ курсым истудентк; — Милагарас Индер­биевар, я 5-рэ курсым истудентк; — Макка Исрапиловар, я 5-рэ курсым истудентк; — Иван Литосовыр, я 3-рэ курсым истудент; — Зухра Чабаевар, я 5-рэ курсым истудентк; — Макка Тушаевар, я 5-рэ курсым истудентк; — София Овсянниковар, я 3-рэ курсым истудентк.

Урысыем и Правительствэ истипендие зэратыщтхэр апшъэрэ гъэсэныгъэ языгъэгъотырэ организациехэм очнэу ащеджэрэ студентхэу еджэнымкIи, наукэмкIи гъэхъэгъэшхо­хэр зышIыгъэхэр ары.

Апшъэрэ еджапIэм зы­чIэхьагъэхэм къыщыублагъэу ахэр дунэе, урысые, республикэ, университет конференциехэм чанэу ахэлажьэх. Мызэу, мытIоу апшъэрэ чIыпIэхэр къа­хьыгъэх, янаучнэ IофшIагъэхэр научнэ журнал, сборник зэфэшъхьафхэм къадэхьагъэх.

«Урысые Федерацием и Правительствэ исти­пендие къыуатыныр на­сыпыгъэшху, ау пшъэ­дэ­кIыжьэу пхьырэми ащ къыхегъахъо. Наукэми, еджэнми гъэ­хъэгъакIэ- хэр ащышIыгъэнхэм ащ укIегъэгушIу. Гу­хэлъыбэ джыри тиI: ординатурэм тычIахьэ, тиIэпэ­Iэ­сэныгъэ хэдгъахъо тшIоигъу», — къаIуагъ сту­дентхэм.

Шъугу къэтэгъэкIыжьы МКъТУ-м имедицинэ институт истуденткитIумэ УФ-м и Президент истипендие къазэраратыщтымкIэ нахь пасэу макъэ къызэрагъэIугъагъэр.