Адыгеим ит хьакIэщ зэхэтхэм ащыщ хэкIыр зэрэIуащы­рэм ыпкIэ ымытэу сомэ мин 200-м ехъу зэIуигъэкIагъ. Хьыкумыр ащ иIоф зыхэплъэм, чIыфэр шIокI имыIэу ытыжьын фаеу унашъо ышIыгъ.

Предпринимателэу хьа­кIэщ зэхэтыр зыем хэкIыр гъунэгъухэм зыдахьырэ дэдэм ехьышъ щыретэкъу, ау ар зэрэIуащырэм ыпкIэ ытынэу фаеп. «ЭкоЦентрэм» зэзэгъыныгъэ зэрэдимышIыгъэм ишIуагъэ къэкIоным щыгугъыгъ.

— 2019-рэ илъэсэу тиIофшIэн зедгъэжьагъэм къыщыублагъэу хэбзэгъэу­цугъэм диштэу хэкIыр Iуарагъэщын фаеу зэрэщытыр бизнесым пылъхэм алъытэгъэIэсы. Арэу щытми, зымыгъэцакIэхэрэр щыIэх. Ахэм контейнерэу апэ къифэрэм хэкIэу зэ­IуагъэкIагъэр щыратэкъу, шъолъыр операторым имылъкукIэ ар Iуещы. Хэ­бзэнчъэу гъэбылъыгъэкIэ хэкIыр дэзыщыхэрэм къяджэхэрэри щыIэх. Ар шIыкIэ зэрэмыхъущтыр хьыкумым къыушыхьатыгъ. Юридическэ лицэу ащ тетэу хэбзэгъэуцугъэр къэ­зыухьэхэрэм якъы­чIэгъэщын тапэкIи лъыдгъэкIотэщт, — къыIуагъ ООО-у «ЭкоЦентр» зыфиIорэм и Адыгэ шъо­лъыр къутамэ ипащэу Алыбэрд Налбый. — 2019-рэ илъэсым ищылэ мазэ къыщегъэжьагъ шъолъыр операторым цIыф­хэм пыдзэфэ пытэу къырахырэр зыдищырэр. Ащ пае физическэ лицэ­хэм ямызакъоу, юри­ди­ческэхэми зэзэгъыныгъэ къыддашIын фаеу щыт. Предпринимателэу 2019-м къыщегъэжьагъэу Iоф зы­шIэхэрэм хэбзэгъэуцугъэр замыгъэцакIэкIэ, яIоф хьыкумым IэкIигъэхьанэу шъолъыр операторым фитыныгъэ иI.

Зэзэгъыныгъэр зыгъэ­псыщтым хъызмэтшIапIэм икоммерческэ отдел иIофышIэхэм закъыфигъэзэн ылъэкIыщт. Адресхэр: Мыекъуапэ, урамэу Пионерскэр, 297, поселкэу Яблоновскэр, урамэу Школьнэр, 10/1. Джащ фэдэу заявкэр интернет нэкIубгъомкIэ къатыми хъущт. Ащ иадресыр: https//adygeya.clean-rf.ru.

ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу.