Адыгеим и ЛIышъхьэу КъумпIыл Мурат игукъэкIкIэ илъэс къэс зэ­хащэрэ ныбжьыкIэ зэхахьэу «Фыщт-2022» зыфиIорэр тыгъуасэ, шы­шъхьэIум и 19-м, рагъэжьагъ.

Адыгеим имызакъоу, тигъу­нэгъу Краснодар краим, ткъош респуб­ликэхэу Къэбэртэе-Бэлъкъарым ыкIи Къэрэщэе-Щэр­джэсым яныбжьыкIэу сэнаущыгъэ зыхэлъхэр ащ щызэIукIагъэх. ЗэкIэмкIи нэбгырэ 300 фэдиз Iофтхьабзэм хэлажьэ. Тыгъуасэ, пчэдыжьым жьэу, Адыгеим и ЛIышъхьэ, респуб­ликэм ихэбзэ къулыкъу зэфэшъхьафхэм ялIыкIохэр ягъусэхэу ахэр зекIо ежьагъэх. Яворовэ гъэхъунэм икIыхи, къушъхьэу Фыщт дэкIоягъэх.

— Непэ километри 10 ткIунэу тапэ илъ, къушъхьэтх заулэ зэ­пытчыщт. Пчыхьэм пхъэмашIоу ныбжьыкIэхэм зэкIагъэнэщтым дэжь зэкIэми тыщызэIукIэщт, тыщызэдэгущыIэщт. Неущ псы­хъурайхэм, мылылъэхэм адэжь зекIо тыкIощт, волейболымкIэ зэнэкъокъу, шIэныгъэ озыгъэгъотырэ квестхэр зэхэтщэщтых. Мэфищэ тыкъэтыщт, — ежьэнхэм ыпэкIэ КъумпIыл Мурат социальнэ сетьхэм ащыриIэ нэкIубгъом къыритхагъ.

Мы Iофтхьабзэр зэхэщэгъэныр 2017-рэ илъэсым апэу зыгу къэкIыгъэр АР-м и ЛIышъхь. Ащыгъум ащ мы IэнатIэр ыгъэ­цакIэгощтыгъ. Сэнаущыгъэ зы­хэлъ ныбжьыкIэ чанхэр ащ те­тэу зэрэзэрэугъоихэрэм, Iоф­тхьабзэм пащэхэр хэла­жьэхэу, зэдэгущыIэгъухэр зэрэзэдыряIэхэрэм шIогъэшхо къызэритырэр къыдилъытэзэ, нэ­ужым ар лъыкIотэнми кIэщакIо фэхъугъ. Адыгеим имыза­къоу, гъунэгъу краими, ткъош республикэхэми яныбжьыкIэхэр къегъэгъэблэгъэнхэр зыгу къэ­кIыгъэри АР-м и ЛIышъхь.

Iофтхьабзэм къыдыхэ­лъы­та­гъэу КъумпIыл Мурат ныбжьыкIэхэм шъхьэихыгъэ зэдэгущыIэгъу адыреIэ. Шъо­лъы­риплIымэ къарыкIыгъэ лIыкIохэр зыгъэгу­мэкIырэ упчIэ­хэмкIэ респуб­ликэм ипащэ зы­къыфагъазэ, гукъэкI гъэшIэгъонэу яIэ­хэмкIэ АР-м и ЛIышъхьэ къыдэгуащэх.

— НыбжьыкIэ политикэр на­хьышIоу зэхэщэгъэнымкIэ предложениехэр къытIэкIэ­хьанхэм, республикэм игъэцэкIэкIо хэбзэ къулыкъухэм яIофшIэн зэ­рагъэ­псырэм ахэм уасэу фа­шIырэр тшIэным тэркIэ мэхьа­нэшхо иI. НыбжьыкIэ­хэм язэха­хьэу «Фыщт» зыфиIорэм илъэс къэс кIэу къыхэтхырэр макIэп. А гухэлъхэм ащыщыбэр щыIэныгъэм щыпхырытщыгъ, ад­рэхэр джырэ уахътэм тэгъэцакIэх. НыбжьыкIэхэм непэ къаIэтыгъэ Iофыгъохэми язэшIохын ти­шъыпкъэу тыпы­лъыщт, — къы­Iуагъ КъумпIыл Мурат ащ фэдэ зэIукIэгъухэм еплъыкIэу афыриIэр къыриIотыкIызэ.

Зэпахырэ узэу дунаир зэлъы­зыкIугъэ коронавирусым ыпкъ къикIыкIэ 2020-рэ илъэсым Iоф­тхьабзэр республикэм щызэхащэнэу хъугъэп. Арэу щытми, хабзэр мыукъогъэным фэшI физкультурникым и Мафэ Къум­пIыл Мурат къушъхьэу Ошъутенэ дэкIоегъагъ.

— ТиныбжьыкIэхэм зафэз­гъазэ сшIоигъу! СакIыбкIэ къу­шъхьэу Фыщт къэлъагъо. Илъэсищ хъугъэу ащ сэнаущыгъэ зыхэлъ ныбжьыкIэхэм яслет щызэхэтэщэ. Мыгъэ ар зэкIэтхьанэу хъугъэ, ушъхьагъоу ащ иIэри шъошIэ. Шъугу шъумы­гъэкIод! ШъуишIэныгъэхэм, шъу­кIуачIэ ыкIи шъуигукъэкIхэм ахэжъугъахъу! Анахь дэгъухэр къэкIощт илъэсым мыщ дэкIоещтых! ЗэкIэми тызэIукIэщт! — ныбжьыкIэхэм закъыфигъа­зэзэ къытхыгъагъ ащыгъум Адыгеим ипащэ.

ИIуагъи ыгъэцэкIэжьыгъ. Пандемиер зызэкIэкIожьым зекIоным падзэжьыгъ.

— НыбжьыкIэ чанэу гукъэкI­хэр зиIэхэм апае тиреспуб­ликэ щызэшIотхырэр бэ. ШIэ­ныгъэ дэгъу зыIэкIэлъэу, гукъэкI гъэшIэгъонхэр зиIэхэр, зицыхьэ зытелъыжьхэу, зиIоф хэшIыкI фызиIэхэр тищыкIагъэх. Гъэсэныгъэ дэгъу агъотыным, ясэнэхьат гъэхъа­гъэхэр щашIынхэм апае тэ тфэлъэкIыщтыр зэкIэ тэшIэ. ТилъэкI зэхэлъэу ныбжьыкIэ сэнаущхэм ягукъэкIхэр агъэцэкIэнэу амал яттыным мэхьанэшхо иI. НыбжьыкIэ зэхахьэу «Фыщт» зыфиIорэри ащ тегъэпсыхьагъ. Мы Iофыгъом зызэриушъомбгъурэр ыкIи къо­тэгъухэр нахьыбэу иIэ зэрэхъу­рэр сигуапэ, — къыхегъэщы КъумпIыл Мурат.

ХЪУТ Нэфсэт.