Терроризмэм пэуцужьыгъэнымкIэ Адыгэ Республикэм икомиссие изэхэсы­гъоу щыIагъэм мэхьанэшхо зиIэ общественнэ-политическэ Iофтхьабзэхэр ыкIи нэмыкI Iофтхьабзэхэу цIыфхэр жъугъэу зыхэлажьэхэрэр щынэгъончъэу зэхэщэгъэнхэмкIэ амалэу щыIэхэм, терроризмэм щыухъумэгъэнхэмкIэ гъэсэныгъэ зыщарагъэгъотырэ организациехэм яIофхэм язытет, биологическэу щынагъоу щыт псэуалъэхэр къызэраухъумэхэрэм нахь лъэшэу гъунэ лъыфыгъэн зэрэфаем ыкIи нэмыкI Iофыгъохэм щатегущыIагъэх. АР-м и ЛIышъхьэу КъумпIыл Мурат Iофтхьабзэр зэрищагъ.

Зэхэсыгъом хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м ифедеральнэ инспектор шъхьаIэу Сергей Дрокиныр, АР-м хэ­дзынхэмкIэ и Гупчэ комиссие, АР-м ипрокуратурэ, ФСБ-м АР-мкIэ и ГъэIорышIапIэ, АР-м и МВД, Урысые Федерацием и Следственнэ комитет АР-мкIэ иследственнэ гъэIорышIапIэ, УФ-м и МЧС АР-мкIэ и ГъэIорышIэпIэ шъхьаIэ, муниципальнэ образованиехэм япащэхэр.

Зэхэсыгъом зэрэщыхагъэунэфыкIыгъэмкIэ, Iоныгъом и 11-м мэкъэтынымкIэ мэфэ зыкIым икIэуххэр республикэм щызэфахьысыжьыщтых. Хэбзэухъу­мэкIо къулыкъухэм япащэхэм оперативнэ-пэшIорыгъэшъ Iоф­тхьабзэхэр зэрэзэрахьагъэхэмкIэ, хэбзэухъумэкIо къулыкъухэм е психоневрологическэ учреждениехэм яучет хэтхэр зэрауплъэ­кIугъэхэмкIэ макъэ къагъэIугъ. АР-м хэдзынхэмкIэ и Гупчэ комиссие къызэритыгъэмкIэ, Тэхъутэмыкъое районымкIэ зы мандат зиIэ хэдзыпIэ коеу N 21-мкIэ АР-м и Къэралыгъо Совет — Хасэм идепутат ихэ­дзын тедзэ щызэхащэщт, Адыгэ­къалэ, Джэджэ, Красногвар­дейскэ, Тэхъутэмыкъое, Кощ­хьэ­блэ, Шэуджэн, Мыекъопэ, Теуцожь районхэм якъоджэ псэу­пIэхэм янароднэ депутатхэм я Совет идепутатхэм яхэдзынхэр щыIэщтых. Муниципальнэ образованиехэм ялIыкIо къулыкъу­хэм ядепутатынхэмкIэ кандидатэу нэбгырэ мин 1,4-м ехъу атхыгъах.

«Тэ пшъэрылъэу тиIэр об­щественнэ-политическэ Iофхэм языпкъитыныгъэ къэтыухъумэныр, хэдзынхэм япхыгъэ хэ­бзэгъэуцугъэхэр амыукъонхэм тылъыплъэныр ары. Террориз­мэм пэшIуекIорэ комиссием ипланхэмрэ иунашъохэмрэ адэ­мыххэу къулыкъу гъэнэфагъэхэм яIофшIэн зэхащэн фае. Хэдзынхэм япэшIорыгъэшъ агитацие хабзэм диштэу зэхэщэ­гъэным, террористическэ актхэр хэдзыпIэхэм ащызэрамы­хьанхэмкIэ, зэпахырэ узхэм ахэм закъыщамыштэнымкIэ амал гъэ­нэфагъэхэр зехьэгъэнхэ, цIыфхэм ярэхьатныгъэ къэзыухъумэрэ оперативнэ купхэм яIофшIэн нахь агъэлъэшын зэ­рэфаем анаIэ тырясэгъадзэ», — къыIуагъ КъумпIыл Мурат.

ШIэныгъэм и Мафэ цIыфхэм щынэгъончъагъэ яIэн зэрэфаем, гъэсэныгъэмкIэ организациехэр терроризмэм зэрэщыухъумагъэ­хэм къатегущыIэзэ, АР-м гъэсэныгъэмрэ шIэныгъэмрэкIэ и Министерствэ ипащэ къыIуагъ ащ фэIорышIэрэ учреждение пстэуми паспортхэр къазэраратыгъэр ыкIи ахэр шапхъэхэм зэрадиштэрэр. Росгвардием иподразделениехэм гъэсэныгъэ языгъэгъотырэ учреждение 296-рэ, унэе ухъумэкIо организа­циехэм псэолъэ 237-рэ къагъэгъунэ.

«ГъэсэныгъэмкIэ учреждениехэр джырэ шапхъэхэм адиштэу зэтегъэпсыхьэгъэнхэ фае. ЩыкIагъэу щыIэхэр псынкIэу дэгъэ­зыжьыгъэнхэ, муниципалитетхэм япащэхэр мыщ фэдэ Iофхэм яшъыпкъэу якIолIэнхэ, гъэсэныгъэмкIэ учреждениехэр щынэгъончъэнхэм иамалхэр зехьэ­гъэнхэ фае», — къыIуагъ Къум­пIыл Мурат.

ШIэныгъэм и Мафэ епхыгъэ Iофтхьабзэхэр Адыгейми, Херсон хэкумкIэ Геническэ районми зэрищыкIагъэм тетэу ащызэ­хэщэгъэным мэхьанэшхо зэриIэр республикэм и ЛIышъхьэ къыхигъэщыгъ. АР-м и Премьер-министрэ ипшъэрылъхэр зыгъэцакIэрэм Геническэ районым пае зичэзыу шIушIэ IэпыIэгъур зэраугъоигъэр къыIуагъ. ЧIыпIэ еджапIэхэмрэ пщэрыхьапIэхэмрэ ящыкIэгъэщт оборудованиер къащэфыгъ, Iоныгъом и 1-м ехъулIэу апэрэ классхэм ачIэ­хьащтхэм шIухьафтынхэр аратыщтых, гъогухэр еджапIэхэм адэжь щагъэкIэжьыщтых. КъумпIыл Мурат къызэрэхигъэщыгъэм­кIэ, ведомствэхэм япэщэ, мини­стрэ пстэуми Геническэ районым Iофхэр зэрэщызэпыфэхэрэм ренэу гъунэ лъафын фае.

Биологическэу щынагъоу щыт псэуалъэхэм яIофшIэн щынэ­гъончъэу зэхэщэгъэн, биологи­че­скэ, медицинэ пыдзафэхэр гъэ­кIодыжьыгъэн зэрэфаем зэ­­хэсыгъом хэлажьэхэрэр тегущыIагъэх. Роспотребнадзорым АР-мкIэ и ГъэIорышIапIэ къызэритыгъэмкIэ, ащ фэдэ учреждениехэм яотделениехэмрэ ялабораториехэмрэ Iоф зэрашIэщт шIыкIэр къыхахыгъах. АР-м ветеринариемкIэ и ГъэIорышIапIэ ренэу уплъэкIунхэр предприятиехэм ащызэхещэх.

Биологическэу щынэгъо псэуа­лъэхэм пэшIорыгъэшъ Iофтхьабзэхэр ащызэрахьанхэу, бы­лым­IыгъыпIэхэр нахь лъэшэу ухъу­мэ­гъэнхэу, зэпахырэ узхэр бы­лымхэм къахэмыхьанхэм гъу­нэ лъафынэу АР-м и ЛIышъхьэ пшъэрылъ афишIыгъ. Iашэхэр хэбзэнчъэу амыгъэфедэнхэм епхыгъэ Iофыгъохэм, террориз­мэм пэуцужьыгъэнымкIэ хэбзэ къулыкъухэм Iофэу ашIэрэм зэхэсыгъом щатегущыIагъэх.

Зэхэсыгъом икIэуххэр зэфи­хьысыжьхэзэ, КъумпIыл Мурат муниципальнэ образованиехэм япащэхэм анаIэ тыраригъэдзагъ терроризмэм пэшIуекIорэ чIыпIэ комиссиехэм Iоф зэрашIэрэр зэрэзэхафын фаем. Апшъэрэ еджапIэхэм япащэхэм пшъэрылъ афашIыгъ зэщыгъэкъокIо купхэм ныбжьыкIэхэр амыгъэплъэхъунхэмкIэ пэшIорыгъэшъ Iофтхьа­бзэхэр зэрахьанхэу. АР-м иопе­ративнэ штаб иаппарат пшъэ­рылъ фашIыгъ террористическэ актхэр зэрамыхьанхэм гъунэ лъызыфырэ IофышIэхэм Iофтхьэ­бзэ гъэнэфагъэхэр зэшIуа­хынхэу.

Адыгэ Республикэм и ЛIышъхьэ ипресс-къулыкъу

Сурэтхэр А. Гусевым тыри­хыгъэх.