ЦIыфым ипсауныгъэ лъэшэу зиягъэ езыгъэкIырэ уц шIоеу амброзием джыдэдэм иуахът. Ащ фэшI уцым пэшIуекIорэ Iофтхьабзэхэр зэрэзэшIуахыхэрэм лъыплъэщт межведомственнэ IофышIэ купэу АР-м и Къэралыгъо Совет —Хасэм зэхищагъэм джырэблагъэ республикэм имуниципальнэ образованиехэр къыкIухьагъэх, мэкъумэщ хъызмэтым ичIыгухэр къыплъыхьагъэх, амброзием зэребэнхэрэр зэригъэлъэгъугъ. А зэпстэур зыщызэфахьысыжьыгъэ зэхэсыгъо нэужым зэхащэгъагъ.

АР-м и Къэралыгъо Со­вет — Хасэм ипресс-къулыкъу тызэрэщигъэгъозагъэмкIэ, Iофтхьабзэр зэрищагъ Парламентым и Тхьаматэ игуадзэу, рабочэ купым ипащэу Цэй Эдуард. АР-м и Тхьаматэу Вла­димир Нарожнэр, АР-м мэкъу-мэщымкIэ иминист­рэу Къуанэ Анзаур, фе­деральнэ къулыкъу ыкIи ведомствэ зэфэшъхьафхэм ялIыкIохэр, мэкъумэщ хъыз­мэтшIапIэхэм япащэ­хэр, нэмыкIхэри ащ къырагъэблэгъагъэх.

Цэй Эдуард уплъэкIунэу зэхащэгъагъэм къыгъэлъэ­гъуагъэр къызэфихьысыжьзэ, цIыфым ипсауныгъэ зиягъэ лъэшэу езыгъэкIырэ уц шIоим икъу фэдизэу зэремыбэныхэрэр нафэ къызэрафэхъугъэр къы­Iуагъ. Iофхэр анахь зыщыдэйхэр Мыекъопэ ыкIи Красногвардейскэ районхэр ары. ЗэкIэмкIи мэ­къумэщ чIыгу Iахьи 120-у ауплъэкIугъэм щыщэу 92-р амброзием зэлъикIугъ, ахэр зиехэм зыпари мы лъэныкъомкIэ ашIэрэп пIоми хэукъоныгъэ хъущтэп. Парламентым и Тхьа­матэ игуадзэ къы­зэриIуагъэмкIэ, уц шIоир ра­упкIыным пае мазэ пIа­лъэу аратыгъ.

— Республикэ Парламентыр Iофыгъоу щыIэхэм ядэгъэзыжьынкIэ псэупIэ кой администрациехэм IэпыIэгъу афэхъунэу хьазыр, — къыIуагъ ащ. — Предложениеу къэшъухьыгъэхэр зэкIэ къыдэтлъытэщтых. Уц шIоим игъэкIодын Iэпэдэлэл зышIыхэрэм пшъэдэкIыжь ягъэхьыгъэнымкIэ законым амалэу къытырэр зэкIэ гъэфедэгъэн фае. ЦIыфхэм на­хьыбэрэ шъуахахь, шъуа­дэгущыI, зымыгъэцакIэ­хэрэм пшъэдэкIыжь зэра­хьыщтыр агурыжъугъаIу.

Амброзием цIыфым ипсауныгъэ зэрэзэщигъа­къорэм имызакъоу, чIыгухэм иягъэ зэраригъэкIырэр, лэжьыгъэу къикIырэми, ащ идэгъугъи къызэращигъакIэрэр къыхигъэщыгъ АР-м и Парламент и Тхьаматэу Владимир Нарожнэм.

— Республикэр зекIоным изегъэушъомбгъун лъэшэу пылъ, гугъэпIэ ин­хэр а отраслэм репхых, — къыIуагъ ащ. — Лъагэу къэкIыгъэ амброзиер Мые­къопэ районым, нэмыкI муниципальнэ образо­ваниеу къызэпачыхэрэм ары­зылъагъохэрэм нэужым къагъэзэжьыщтэп, зекIоу къихьэрэр нахь макIэ зэ­рэхъущтым Iо хэлъэп. Ау зэкIэмэ анахь шъхьаIэр мы уц шIоим цIыфэу ыгъэ­сымаджэхэрэм япчъагъэ зэрэхахъорэр ары. Непэ ар нэбгырэ 4500-рэ мэхъу. Ахэм ащыщэу нэбгырэ миным ехъур кIэлэцIыкIух. Ащ шъуегупшыс. Муни­ципальнэ образованиехэм япащэхэм амброзием игъэкIодын нахь чанэу пылъынхэу тыкъяджэ.

Шъугу къэдгъэкIыжьын, уц шIоим игъэкIодын нахь чанэу дэлэжьэнхэу къызщиIорэ джэпсалъэу рес­публикэ къэралыгъо ыкIи чIыпIэ зыгъэIорышIэжьыпIэ хэбзэ органхэм, зэкIэ цIыфэу Адыгеим исхэм афэгъэзагъэр 2019-рэ илъэ­сым АР-м и Къэралыгъо Совет — Хасэм изэ­хэсыгъохэм ащыщ ща­штагъ. Илъэс къэс, амб­розием игъо зыщыхъурэ уахътэм, джэпсалъэм итыр зэрагъэ­цакIэрэр Парламентым ипащэ­хэм­рэ межведомственнэ комиссиеу зэхащагъэмрэ ауплъэкIу. Арэу щытми, щыкIагъэу щыIэр джыри бэ.

Алъэгъугъэм зэримыгъэ­рэзагъэхэр Парламентым ипащэхэми, комиссием хэтхэми къыкIагъэтхъыгъ, пIэлъэ гъэнэфагъэ зыфагъэуцугъэхэм ар зэрагъэцэкIагъэм зыщагъэгъозэнэу джыри зэ а чIыпIэхэм зэрагъэзэжьыщтыр теубытагъэ хэлъэу къаIуагъ.

ХЪУТ Нэфсэт.