Адыгеим иэкономикэ зыпкъ еуцожьэу ары экспертхэм къызэраIорэр. УФ-м и Гупчэ Банк и Къутамэ — АР-м и Лъэпкъ банк ипресс-къулыкъу къызэритыгъэмкIэ, жъоныгъокIэ мазэм къыщегъэжьагъэу инфляциер ехы.

Тишъолъыр имэкъумэщ хъызмэт продукциеу къы­тIупщырэм зэрэхэхъуагъэр ары ащкIэ зишIуагъэ къэ­кIуагъэр.

Лъэпкъ банкым зэри­гъэунэфыгъэмкIэ, мэлылъфэгъу мазэм инфляциер процент 20-м республикэм щынэсыгъагъ, жъоныгъуакIэм 19,1-рэ хъугъэ, мэкъуогъу мазэм процент 18-м нэсэу къеIыхыгъ, бэдзэогъум 16,9-рэ хъугъэ. БэдзэршIыпIэр хэтэрыкIхэмрэ пхъэшъхьэмы­шъхьэхэмрэкIэ ушъагъэ зэ­рэхъугъэм аущтэу инфляциер къыригъэIы­хыгъ.

«Республикэм къыщагъэкIыгъэхэри IэкIыбым къыращыгъэхэри жьэу мэ­кIайхэм къызараты­ралъхьагъэм ишIуагъэкIэ, гущыIэм пае, сэнашъхьэр, пхъыр, къэбаскъэр къэ­пыутыгъэх, апельсиным, къу­жъым ауасэ, гъэрекIо­рэм егъэпшагъэмэ, нахь макIэу хэхъуагъ. Джащ фэд, картофым мыгъэ на­хьыбэу чIыгу рагъэубы­тыгъ, нахьыжьэуи къау­гъоижьыгъ. Ащ фэшI ыуасэ лъэшэу дэкIоягъэп» — къетхы Лъэпкъ банкым.

Ащ ипресс-къулыкъу къызэритырэмкIэ, чэтхъуным зеушъомбгъу, кIэнкIэу хъызмэтшIапIэхэм къау­гъоирэм ипчъагъи бэкIэ хэхъуагъ. Лэжьы­гъэм ыуасэ зыпкъ зэриуцуагъэм фэшI былымхъуным пылъхэм былымIусым тырагъэкIуадэрэр нахь макIэ хъугъэ. Ахэм яшIуа­гъэкIэ къолым ыкIи чэтылым ауасэ блэкIыгъэ мазэм бэп зэрэдэкIоягъэр, кIэнкIэр къэпыутыгъ.

Урысые Банкым пэшIорыгъэшъэу къызэрилъы­тэрэмкIэ, 2022-рэ илъэсым ыкIэм нэс инфляциер процент 12 — 15-м нэс ехыщт, 2023-м проценти 5 — 7 хъущт, 2024-рэ илъэсым проценти 4-у зэрэщытыгъэм къыфэкIо­жьыщт.