ШышъхьэIум ыкIэм, хабзэ зэрэхъугъэу, гъэсэныгъэм иIо­фы­шIэхэм язэIукIэ зэхащэ. Мыгъэ ар мы мазэм и 22-м Адыгэ кIэлэегъэджэ колледжым щыкIощт.

Ау зэIукIэ шъхьаIэр къэмысызэ, темэ зэфэ­шъхьафхэмкIэ площадкэхэм (секциехэм) Iоф ашIагъ. ЗэкIэмкIи рес­публикэм секции 8-мэ гъэсэныгъэм иIофыгъо зэфэшъхьафхэм ащыте­гущыIагъэх. Ахэр зэхи­щагъэх кIэлэегъаджэхэм ясэнэхьаткIэ яшIэныгъэ­хэм ыкIи ахэм яIэпэ­Iэсэныгъэ уасэ езытырэ Адыгэ республикэ Гупчэм. Тэ зигугъу къэтшIыщтыр гъэсэныгъэм исистемэ пэщэ IэнатIэхэр щызыгъэцакIэхэрэм яшIэныгъэхэм уасэ зэ­рафашIырэ шIыкIэр нахь тэрэзэу зэхэщэгъэныр ары. Iофтхьабзэм хэлэ­жьагъэх АР-м гъэсэны­гъэмрэ шIэныгъэмрэкIэ и Министерствэ иIофышIэ­хэр, гъэсэныгъэмкIэ район гъэIорышIапIэхэм япащэхэр, еджапIэхэм ядиректорхэр, ахэм ягуа­дзэ­хэр ыкIи нэмыкIхэр.

Зэхахьэм къыщыгущы­Iагъэх ыпшъэкIэ зыцIэ къетIогъэ зэхэщэкIо организацием ипащэу Н. Кабановар, ащ игуадзэу М. Мамыир, Мыекъопэ къэралыгъо технологическэ университетым проф­ориентациемкIэ и Гупчэ ипащэу О. Франко, Теуцожь районым гъэсэны­гъэмкIэ и ГъэIорышIапIэ ипащэ игуадзэу М. ЖакIэмыкъор, Адыгэкъалэ игурыт еджапIэу N 3-м идиректорэу Э. ХьэдэгъалIэр, Мыекъопэ гурыт еджапIэу N 13-м ипащэу М. Неверовар ыкIи нэмыкIхэр.

Гъэсэныгъэм ылъэныкъокIэ Iофыгъоу щыIэхэм, анахьэу пэщэ IэнатIэхэм аIухьащт кадрэхэм якъы­хэхын, атегущыIагъэх. Ахэм яшIэныгъэхэм, ясэнэхьаткIэ яIэпэIэсэныгъэ уасэ зэрэфашIырэ шIыкIэм нахь анаIэ зэрэтетын фаем яшIошIхэр къара­IолIагъэх. ЗэIукIэм хэлэ­жьагъэхэм мы Iофы­гъомкIэ яеплъыкIэхэр мы ма­фэхэм щыIэщт зэIукIэшхом къырахьылIэщтых. Сихъу Гощнагъу.