Мыекъуапэ икъэзэкъхэм яотдел дзэ-спорт Iофтхьабзэу зэхищагъэр мэфищэ Адыгэ Республикэм щыкIуагъ.

ЗэIукIэгъум икъызэIухын хэлэжьагъэх Пшызэ икъэзэкъыдзэ ипащэу Александр Власовыр, ащ игуадзэу Виктор Светличнэр, нахьыжъхэм ядзэ и Совет ипащэу Василий Полухиныр, Адыгэ Республикэм ихэбзэ къулыкъушIэхэр, динлэжьхэр.

Александр Власовым зэха­хьэм къыщиIуагъ кIуачIэр, къулаир къэзэкъхэм апсыхьан, япсауныгъэ агъэпытэн зэрэфаер. Шэн-хабзэхэр дэгъоу зэрагъашIэхэзэ, къулыкъум ныбжьыкIэхэр фэхьазырхэу пIугъэнхэм имэхьанэ зэрэхэхъуагъэр хигъэунэфыкIыгъ.

ЛIэужхэм язэпхыныгъэхэр нахьышIу шIыгъэнхэр зэкIэми зэдыряIофэу А. Власовым ылъы­тагъ. Нахьыжъхэм яIэпэIэсэныгъэ ныбжьыкIэхэр фэгъэсэгъэнхэм фэшI егъэджэн Iофтхьабзэм къэзэкъхэр чанэу хэлэжьэнхэу къяджагъ.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковыр тызхэт лъэхъаным къыпкъырыкIызэ, зэфэхьысыжьхэр шIыгъэнхэ фаеу ылъытагъ.

— Лъэхъэнэ къин непэ тызхэтыр, — къыщи­Iуагъ зэхахьэм Константин Щербаковым. — Къо­хьапIэм ихэгъэгухэм рэхьат къытатырэп. Урысыем пэшIуекIорэ Iофыгъохэр зэрахьэх. ХэушъхьафыкIыгъэ дзэ операцием хэлэжьа­гъэхэр тизэIукIэгъу щытэлъэгъух. Къулы­къур дэгъоу зэрахьыгъэм фэшI тафэраз, «тхьашъуегъэпсэу» ятIожьы тшIоигъу.

К. Щербаковым Iофтхьабзэм щызэIукIагъэхэм закъыфигъази, кIэлэцIыкIухэр нахьыжъхэм зэрафэшъыпкъэхэм, щысэ атырахызэ дзэ къулыкъум зыфагъэ­сэным зэрэпылъхэм уасэ афи­шIыгъ. Хэгъэгум иухъумакIохэр гуетыныгъэ ахэлъэу ныбжьыкIэхэм ягъэсэн зэрэпылъхэр къыхигъэщыгъ.

Василий Полухиным къызэриIуагъэу, Украинэм щыкIорэ хэушъхьафыкIыгъэ дзэ операцием, Къырым щыкIогъэ Iофыгъохэм къэзэкъхэр ахэлажьэхэзэ, опытэу яIэ хъугъэр щыIэныгъэм зэрэщыпхыращырэм къытегущыIагъ.

НыбжьыкIэхэм, зыныбжь икъугъэхэм, диныр зылэ­жьыхэ­рэм зэхахьэм изещакIохэм агъэуцугъэ унашъохэр шапхъэ­хэм адиштэхэу агъэцакIэхэзэ, къулыкъур ахьыгъ.

ЗыгъэсапIэр

Дзэ къулыкъум изехьан ди­штэу гъэпсыгъэ зыгъэсапIэм шIэныгъэу щызэрагъэгъотыгъэр макIэп. Калашниковым иавтоматкIэ, Макаровым икIэрахъо­кIэ, псагъэм тегъэфэгъэнымкIэ, танкым пэшIуекIохэзэ гранатэр дзыгъэнымкIэ яухьазырыныгъэ къэзэкъхэм къагъэлъэгъуагъ.

Дзэ къулыкъур Iоф къызэрыкIоп. ЛIыгъи, IэпэIэсэныгъи, шIэныгъи ищыкIагъэх. НыбжьыкIэхэм щыкIагъэу яIэхэри зэIу­кIэгъум къыщылъэгъуагъэх. На­хьышIоу Iоф зыдашIэжьын зэрэфаер пащэхэм къыхагъэщыгъ. Дзэ къулыкъум фэгъэсагъэхэм уащытхъунэу щыт. Яп­шъэрылъхэр щысэ атепхынэу агъэцакIэх, зыр зым IэпыIэгъу фэхъужьы.

НыбжьыкIэхэм гущыIэгъу афэ­хъугъ динлэжьэу Роман Малинкэ. Диныр щыIэныгъэм щызепхьаным, шэн-хабзэхэр бгъэцэкIэнхэм ямэхьанэ ар IупкIэу къатегущыIагъ, къэзэкъ ныбжьыкIэхэм зэхахьэр еджэпIэшIу афэхъугъ.

Диным щыIэныгъэм чIыпIэу щыриIэм зызэриушъомбгъурэр къыхагъэщыгъ, ныбжьыкIэхэр тарихъым ищысэхэм нахьышIоу афэгъэсэгъэнхэр унэшъо шъхьа­Iэхэм ащыщхэу зэхэщакIохэм алъытагъ.

ШIэныгъэм икъэкIуапIэхэр

Дзэ медицинэм, МЧС-м, УФСИН-м, нэмыкIхэм якъулыкъушIэхэр, дзэм иофицерхэр зэхахьэм къыщыгущыIагъэх.

Адыгеим икъэзэкъ ныбжьыкIэхэм я Союз итхьаматэу Екатерина Загорулько пэщэныгъэ адызэрихьэзэ, спортымкIэ инструкторхэу Геннадий Буториным, Виталий Сердюковым, Алексей Андросовым, Карен Чатоевым, Алексей Филоненкэм ныбжьыкIэхэм яIэпэIэсэныгъэ хагъэхъоным пылъхэу егъэджэн зэIукIэгъухэр зэхащагъэх.

Пкъыр ищыгъэу, купым хэтхэу ныбжьыкIэхэр зэрэкIохэрэр, гранатэр зэрадзырэр, футбол зэрешIэхэрэр, электроннэ щэрыуапIэм яIэпэIэсэныгъэ къызэрэщагъэлъагъорэр, фэшъхьафхэри зэхэщакIохэм ауплъэкIугъэх, шIыкIэшIухэм афагъэсагъэх.

Мыекъуапэ икъэзэкъхэм япащэ игуадзэу Александр Данильченкэр Украинэм инепэрэ псэукIэ, дунэе Iофхэм язытет, тихэгъэгу имамыр щыIакIэ нахьышIу шIыгъэным, нэмыкIхэм къатегущыIагъ.

Лъэпкъ къэзэкъ хорэу «Каза­чья песня» зыфиIорэр, ансамблэу «Долинэр» пчыхьэзэхахьэ­хэм ахэлэжьагъэх. Орэдхэр къа­Iуагъэх, лъэпкъ шэн-хабзэ­хэм яхьылIэгъэ едзыгъохэр къагъэлъэгъуагъэх, къашъохэр къашIыгъэх, «Удж-хъурай» зыфи­Iорэ къашъомкIэ зэхахьэр аухыгъ.

Къащытхъугъэх

Дзэ-егъэджэн зэхахьэм Мос­товской районым икъэзэкъхэм апэрэ чIыпIэр къыщахьыгъ, пащэр Сергей Родионов.

НыбжьыкIэхэм якомандэхэм язэнэкъокъу Апшеронскэ районым къикIыгъэхэм текIоныгъэр къыщыдахыгъ, пащэр Анна По­номарева. Адыгеим и Красногвардейскэ район иныбжьыкIэхэм якоманди апэрэ чIыпIэр фагъэшъошагъ, пащэр Вадим Хрулев.

ХагъэунэфыкIырэ чIыпIэхэр къыдэзыхыгъэхэм Кощхьэблэ районым иныбжьыкIэхэр ащыщых.

Зыныбжь икъугъэ нэбгырэ 500, ныбжьыкIэхэм я Союз хэт къэзэкъи 168-рэ зыхэлэжьэгъэ Iофтхьабзэр щыIэныгъэм щылъа­гъэкIотэщт.

Екатерина Загорулько.

Мыекъуапэ икъэзэкъхэм япащэ игуадз.