Адыгеим и ЛIышъхьэу КъумпIыл Мурат псыхъоу Шъхьэгуащэ инэпкъхэм ягъэпытэнкIэ IофшIэнхэр зэрэкIохэрэр, Мыекъуапэ икъэлэ парк зэрэзэтырагъэпсыхьэрэр ыуплъэкIугъэх.

АР-м социальнэ-экономикэ хэхъоныгъэ зэришIыщт унэе программэм диштэу федеральнэ гупчэр яIэпыIэгъоу мы проектыр пхыращы. ПстэумкIи сомэ миллион 450-рэ фэдиз а Iоф­шIэнхэм атефэщт.

Iофтхьабзэм хэлэжьагъэх АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м псэо­лъэшIынымкIэ, псэупIэ-коммунальнэ, гъогу хъызмэтымкIэ иминистрэу Валерий Карта­мышевыр, АР-м тыкъэзыуцу­хьэрэ дунаим икъэухъумэнкIэ ыкIи чIыопс къэкIуапIэхэмкIэ и ГъэIорышIапIэ ипащэу Сергей Колесниковыр, Мыекъуапэ имэ­рэу Геннадий Митрофановыр, проект, подряднэ организациехэм япащэхэр.

Республикэм и ЛIышъхьэ пшъэрылъ зэрафишIыгъэм тетэу псэолъэшIын IофшIэнхэр нахь псынкIэу зэрэзэшIуахыхэрэм ишIуагъэкIэ ипIалъэм къыпэу проектыр аухын ыкIи Адыгеим ия 100-рэ илъэс ехъулIэу рес­публикэм щыпсэухэрэмрэ ихьа­кIэхэмрэ апае зыгъэпсэфыпIэ чIыпIэу джырэ шапхъэхэм ади­штэрэр агъэпсын алъэкIыщт.

Шъугу къэтэгъэкIыжьы мы проектышхом диштэу къэлэ паркым иIэгъо-блэгъу дэжь километри 2,5-м ехъу икIы­хьагъэу псыхъоу Шъхьэгуащэ ­инэпкъ зэрэщагъэпытэщтыр, зыгъэпскIыпIэр зэрагъэкIэжьыщтыр, лъэс гъогухэмрэ джэгупIэ чIыпIэхэмрэ нахь зэрэзэтырагъэпсыхьащтхэр. Мыщ остыгъа­кIэхэр щыпалъэщтых, аллеехэмрэ клумбэхэмрэ щагъэпсыщтых, псыхъом узэрекIолIэщт ехыпIэхэр щашIыщтых. Ащ нэмыкIэу кушъхьэфачъэкIэ къызыщачъыхьэрэ гъогухэр, скало­дромыр, бгъагъэхэр нахь зэ­ты­рагъэпсыхьащтых. Зыгъэпс­кIы­пIэр зэрэщытэу агъэкIэжьыщт, санитар шъолъыри щыIэ хъущт. Мы мафэхэм яхъулIэу чапэхэм ягъэпытэн аухыгъ, джабгъу нэпкъым плиткэр тыралъхьэ, лъэс­рыкIохэм атегъэпсыхьэгъэ лъэ­мыджхэм пандусхэр ащашIых, пхъэнтIэкIухэр агъэуцух, ощхы­псыр зэрылъэдэщтыр ­агъэпсы.

ПсэолъэшIыным ия 2-рэ чэзыу ипроект изэхэгъэуцони Iоф дашIэ. Ащ диштэу бассейныр агъэкIэжьыщт, паркым игупчэ аллее къыщежьэу бассейным къэсырэ дэкIояпIэхэр нахь зэтырагъэпсыхьащтых.

Урысыем ивице-премьерэу Дмитрий Чернышенкэр Адыгеим къызэкIом мы проектым къыдыригъэштэгъагъ. Ащ УФ-м псэолъэшIынымкIэ и Министерствэ пшъэрылъ фишIыгъагъ 2023-рэ илъэсымкIэ федеральнэ бюджетым бассейным игъэ­цэкIэжьын пае сомэ миллион 330-м ехъу къыщыдилъытэнэу.

«Мыекъуапэ дэсхэм зыгъэ­псэфыпIэ чIыпIэ дахэ яIэ зэ­рэхъущтым имызакъоу, Адыгеим зекIоу къакIорэри нахьыбэ хъущт», — къыIуагъ Дмитрий Чернышенкэм.

УплъэкIуным икIэуххэм ате­тэу Адыгеим и ЛIышъхьэ ми­нистерствэхэмрэ муниципали­тетым ипащэхэмрэ пшъэрылъ заулэ афишIыгъ. Псыхъоу Шъхьэ­гуащэ икъуладжэ псэу дэтым къыкIимычыным, джабгъу нэпкъымрэ сэмэгу нэпкъымрэ язэтегъэпсыхьанкIэ зэдырагъэштэн зэрэфаем, къэгъагъэхэм псы атекIэгъэным, спорт джэгупIэхэм алъэгу пкIэгъэным ыкIи нэмыкI Iофыгъохэм ахэр афэгъэхьыгъагъэх.

«Республикэм джыдэдэм амалышхо иI джырэ шапхъэхэм адиштэу зыгъэпсэфыпIэ чIыпIэр зэтыригъэпсыхьанэу. АщкIэ Уры­сыем и Правительстви IэпыIэгъу къытеты, ищыкIэгъэ мылъкур къыхегъэкIы. Непэ анахьэу мэхьанэ зиIэр проектым къыщыдэлъытэгъэ Iофтхьабзэхэр шIуагъэ къытэу, ипIалъэм гъэцэкIэгъэнхэр ары. ЦIыфхэмкIэ ар Iэрыфэгъуным тынаIэ тедгъэтын фае. Зыгъэ­псэфыпIэ чIыпIэм игъэфедэн епхыгъэ пстэуми шъуишъып­къэу шъуягупшыс, рекреацием ипсэуалъэхэу ащ къыпэблагъэхэр зэдиштэу жъугъэпсых», — къы­Iуагъ КъумпIыл Мурат.

АР-м и ЛIышъхьэ ипресс-къулыкъу