И 22-м хагъэунэфыкIыщт
ТекIоныгъэм и Музей «Урысыем ибыракъ ышъохэр» зыфиIорэ Iофыгъор онлайн шIыкIэм тетэу зэхищагъ.
ШышъхьэIум и 22-р —Урысыем и Къэралыгъо быракъ и Маф. МэфэкIым фэгъэхьыгъэу ТекIоныгъэм и Музей иинтернет нэкIубгъо къыщигъэлъэгъощтых быракъым ехьылIэгъэ сурэтхэр. Интернетым щагъэфедэгъэ сурэтхэр, сурэттеххэм яIофшIагъэхэр игъэкIотыгъэу нэрылъэгъу IэпыIэгъухэм ащагъэфедэщтых.
Адыгэ Республикэм щыщхэр хэгъэгум щыкIорэ патриотическэ Iофтхьабзэм хэлажьэх. Республикэм культурэмкIэ и Министерствэ икъулыкъушIэу, тарихъ шIэныгъэхэмкIэ кандидатэу Теуцожь Фатимэ къытиIуагъ сурэт анахь дэгъухэр зэнэкъокъум изэхэщакIохэм къыхахынхэм зэрэпылъхэр.
Быракъым и Мафэ ехьылIэгъэ къэгъэлъэгъоныр мэфэкI шапхъэм тетэу агъэпсы. Адыгеим исурэтышIхэм яIофшIагъэхэри щытхъуцIэхэр къызфагъэшъошэщтхэм ащыщ хъущтхэу тэгугъэ. Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ зэрилъытэрэмкIэ, Урысыем ибыракъ и Мафэ фэгъэхьыгъэ зэIукIэгъухэр илъэс къэс хэгъэгум гъэшIэгъонэу щэкIох. Мыекъуапэ щызэхащэщт Iофтхьабзэхэм ныбжьыкIэхэм, сурэттеххэм, патриотическэ пIуныгъэм пылъхэм яIэпэIэсэныгъэ къащагъэлъэгъощт.
Сахьидэкъо Нурбый.