Адыгеим ращыгъэ зичэзыу шIушIэ IэпыIэгъур Херсон хэкумкIэ Геническэ районым IукIагъ.

Адыгэ Республикэм и ЛIышъхьэу КъумпIыл Мурат пшъэрылъ зэрафишIыгъэм тетэу сэкъатныгъэ зиIэхэмрэ зыныбжь хэкIотагъэхэмрэ зыщаIыгърэ унэ-интернатэу Геническ дэтым реабилитациемкIэ техническэ пкъыгъохэр IэкIагъэхьагъэх.

Сэкъатныгъэ зиIэхэм атегъэпсыхьэгъэ курэ­жъыехэр, щэрэхъ зыкIэт пхъэнтIэкIухэр, загъэпскIы зыхъукIэ агъэфедэрэ пхъэн­тIэкIухэр, ошэкурхэр, памперсхэр, гъомылап­хъэхэр ыкIи нэмыкIхэр унэ-интернатым рагъэо­лIагъэх.

Адыгэ Республикэм IофшIэнымрэ социальнэ хэхъоныгъэмрэкIэ и Министерствэ къызэриты­гъэмкIэ, шIушIэ IэпыIэгъур аугъои зэхъум сэкъатныгъэ зиIэхэмрэ зыныбжь хэкIотагъэхэмрэ яшIоигъо­ныгъэхэр къыдалъытагъэх. ГущыIэм пае, джэгукIэ зэфэшъхьафхэр, кроссвордхэр, сурэтхэр зыдашIыхьащт альбомхэр, фломастерхэр, шъо зэфэшъхьаф зиIэ къэлэмхэр афарагъэщагъэх.

— IэпыIэгъу къызэрэтфэхъухэрэм фэшI Адыгэ Республикэм щыпсэу­хэрэм лъэшэу тафэраз, — къаIуагъ унэ-интернатым иIофышIэхэм. —Ахэм къытатырэ IэпыIэгъум ишIуагъэкIэ тыкъыздекIокIыхэрэм ящыIакIэ нахь афэдгъэпсынкIэн, курэжъыехэм арысхэу тинэжъ-Iужъхэм зядгъэплъыхьан, языгъэпсэфыгъо уахътэ нахь гъэшIэ­гъонэу зэхэтщэн тлъэ­кIыщт.

Шъугу къэтэгъэкIыжьы «Единэ Россием» тонн 20 хъурэ зичэзыу шIушIэ IэпыIэгъур зэриугъоигъэр. Гъомылапхъэхэр, спорт Iэмэ-псымэхэр, оборудованиер, нахьыбэрэ ящыкIэгъэ пкъыгъохэр зыдэлъ къэмланхэр нэжъ-Iужъхэр зыщыпсэурэ унэ-интернатэу Геническ дэтым мы охътэ благъэм арагъэщэщтых.

Адыгеим ипащэхэмрэ Урысые политическэ партиеу «Единэ Россием» и Адыгэ шъолъыр къутамэрэ Iофтхьабзэхэм ахэлэжьэрэ пстэуми, шIушIэ Iэпы­Iэгъур зыугъоирэ волонтерхэми «тхьашъуегъэ­псэу» араIо. Сирием, нэ­мыкI хэгъэгухэм къарыкIыжьыгъэ тилъэпкъэгъу­хэри чанэу ащ фэдэ Iоф­тхьабзэхэм ахэлажьэх.