ШышъхьэIум и 22-м Урысыем и Къэралыгъо быракъ и Мафэ хагъэунэфыкIы.

Шъуищэу зэхэлъ быракъыр зытлъэгъукIэ, ащ имэхьанэ зэхэтфымэ ыкIи зэдгъашIэмэ тшIоигъо тэхъу, Хэгъэгум итарихъ нэкIубгъо гъэшIэгъонхэм зафэтэгъазэ: тиблэкIыгъэ дгъэунэфызэ, тинепэрэ щы­IакIэ нахь дэгъу зэрэ­хъущтым тэ тиIахьи хэтлъхьаным тыпылъ. Къэ­ралыгъо тамыгъэ шъхьаIэр сыдигъуи дгъэлъапIэу ыкIи тыфэсакъэу зетхьаным фэшI ащ ехьы­лIэгъэ пстэур зэдгъэшIэным ты­фэхьазыр.

ШышъхьэIум и 17-м Гавердовскэм дэт къоджэ тхылъеджапIэм иIофышIэ­хэм тхылъеджэхэм Iоф­тхьэбзэ дэгъу афызэхащэгъагъ — «Триколор моей страны» ащ зэре­джа­гъэ­хэр. Библиотекарьхэу Н. О. Алексеевамрэ М. Н. Иргизцевамрэ ар зигу­къэ­кIыр. КъызэIукIэгъэ кIэ­лэ­цIыкIухэм Урысыем итамыгъэ шъхьаIэхэм ащыщэу Къэралыгъо быракъым итарихъ ахэм къафаIотагъ, шъоу зэрэзэхэлъ пэпчъ мэхьанэу иIэр ыкIи хэ­гъэгум ицIыфхэмкIэ ащ уасэу иIэр агурагъэIуагъ. Быракъыр тэ тихэгъэгоу Урысыем иIэ зыхъугъэр, къэралыгъомкIэ ащ мэхьанэшхо зэриIэр кIагъэтхъыгъ. ЕджакIохэм ашIэ хъугъэ хэгъэгу пэпчъ зэ­кIэрыпчынэу щымытэу тамыгъищ зэриIэр: гербыр, быракъыр, гимныр.

Библиотекарэу М. Н. Иргизцевам мастер-классэу «Флаг России — гордость наша» зыфиIорэр афызэхищагъ, хэти къэралыгъо быракъыр сурэт ышIын амал иIагъ. Джащ фэдэу тхылъ къэгъэлъэгъо­нэу «Флаг России» зыфи­Iорэр зэпаплъыхьагъ. КIэ­лэцIыкIухэм амышIэщтыгъэ гъэшIэгъоныбэ ашIагъ, язэхэшIыкI нахь къэущыгъэу зэбгырыкIы­жьыгъэх. (Тикорр.).