ШышъхьэIум и 16-м къызыхъугъэр илъэси 120-рэ хъугъэ лъэпкъым къыхэкIыгъэ тхэкIо цIэрыIоу, адыгэ литературэм лъапсэ фэзышIыгъэу, лъэпкъ прозэм иклассикэу, СССР-м и Къэралыгъо премие къызэратыгъэу КIэрэщэ Тембот.

1993-рэ илъэсым къыщегъэжьагъэу КIэрэщэ Тембот ыцIэкIэ щыт премиер гурыт еджапIэм дэгъоу щеджэхэрэм, дэгъу дэдэу еджэрэ студентхэм араты. Апэрэ илъэсым премиер Кощхьэблэ районым щыщ нэбгыри 10-мэ афагъэшъо­шэгъагъ. Джы мы илъэсым дэгъу дэдэу еджэрэ студентхэу тхакIом ипремие зэ­ратыщтхэм япчъагъэ 38-рэ хъугъэ. Ахэм ахэтых мы ахъщэ тыныр зеджэхэ­рэм щегъэжьагъэу илъэс къэс зэратыхэрэр.

ТхакIор къызыщыхъугъэ Кощхьэблэ районым игупчэ ит скверым КIэрэщэ Тембот исаугъэтэу дэтым дэжь зэIукIэгъоу щыкIуагъэм кIэлэеджакIохэм, студентхэм премиехэр ащаратыжьыгъэх. КIэрэщэ Тембот итворчествэ мэхьанэу иIэм къытегущыIэзэ, АР-м и ЛIы­шъхьэу КъумпIыл Мурат соцсетьхэм къащитхыгъ тхэкIо цIэрыIом литературэм, журналистикэм ащишIагъэр зэрэбэр, хэку гъэзетым редакторэу зэри­Iагъэр, ­лъэпкъ тхылъ тедзапIэм зэрипэщагъэр, Адыгэ научнэ-ушэтэкIо институтым идиректорэу зэрэщытыгъэр, народнэ творчествэм иугъоин иIахьышхо зэрэхэлъыр.

— КIэрэщэ Тембот зышIэщтыгъэхэм къызэраIожьырэмкIэ, ар зэрэтхэкIо дэ­гъум имызакъоу, хьалэлэу, шъхьэкIэфэ­шхо хэлъэу, бырсыр зыпымылъ цIыфэу, интеллигент шъыпкъэу щытыгъ, — къыхигъэщыгъ КъумпIыл Мурат.