Адыгэм идунай щызэлъашlэрэ Къэрдэн Самир идунай ыхъо­жьыгъ.

Къэрдэн Самир гъэтхапэм и 15-м, 1934-рэ илъэсым къэхъугъ ыкlи илъэпкъ игъашlэм фэлэжьагъ. Хымэ хэгъэгу къыщыхъугъэу, щыпсэущтыгъэми, адыгабзэр ышlэу, лъэпкъ шэн-хабзэхэм атетэу, ахэм афэлажьэу псэугъэ.

1971 – 1976-рэ илъэсхэм Адыгэ шlушlэ хасэу Иорданием щызэ­хащагъэм исекретарэу щытыгъ. 1990-рэ илъэсым мы хасэм итхьаматэу агъэнэфагъ ыкlи илъэсипшI пчъагъэхэм тхьамэтэ lэнатlэр ыгъэ­цэ­кlагъ. Зэпыугъохэр фэхъухэзэ, 2020-рэ илъэсым нэс Къэрдэн Самир Иорданием щыlэ Адыгэ шlушlэ хасэм итхьаматэу щытыгъ.

Зыщыпсэурэ къэралыгъом ща­шlэу, щалъытэу Къэрдэн Самир псэугъ. lофшlэн ыкlи lэнэтlэ зэфэшъхьафхэр ыгъэцэкlагъ. Иорданием иэлектротехническэ компание илъэс 40-рэ щылэжьагъ. Комитет, федерацие зэфэшъхьафхэм япэ­щагъ, совет зэмылIэужыгъохэм ахэтыгъ. Иорданием ия 26-рэ Сенат Къэрдэн Самир сенаторэу хэтыгъ.

1990-рэ илъэсым Дунэе Адыгэ Хасэр зэхащэ зэхъум, ащ игъэпсын хэлэжьагъэхэм Къэрдэн Самир ащыщыгъ. Иорданием илlыкlо куп хэтэу Урысыем къэкlогъагъ. Нэ­ужым Дунэе Адыгэ Хасэм итхьаматэ игуадзэу лэжьагъэ.

Адыгэхэм яlофхэр сыдигъокlи игунэсхэу, игуузхэу Самир псэугъэ. Игущыlэ уасэ иlагъ, ыlорэм цlыфхэр едэlущтыгъэх, упчlэжьэгъу ашlыщтыгъ. Ыкlи сыдигъуи илъэпкъэгъухэм lэпыlэгъу афэ­хъущтыгъ.

Къэрдэн Самир дунаим зэре­хыжьыгъэр гухэкl тфэхъугъ. Джэнэт лъапlэр Тхьэм къырет.

Адыгэ Республикэм иобщественнэ зэхахьэу «Адыгэ Хасэ — Черкесский Парламент» и Хэсашъхьэ хэтхэр Къэрдэн Самир игупсэхэм афэтхьаусыхэх. Якъин lэтыгъошlу Тхьэм афешl. Лlы губзыгъэу, lушэу, илъэпкъы­кlэ гуlалэу, адыгэ шъыпкъэу Къэр­дэн Самир тэ тыгу къинэ­жьыщт.