Кавказ заповедникым и Къыблэ отдел иIофышIэхэм япшъэрылъхэр зэрагъэцакIэхэрэм фэдэу лъагъохэм ягъэкъэбзэни, псэушъхьэхэмрэ къэкIыхэрэмрэ ялъыплъэни, шыхэм яIус иугъоини, унэ-къэуцупIэхэу мэзхэм ахэтхэм ягъэцэкIэжьыни ренэу анаIэ атырагъэты.

Мы лъэхъаным заповедникым иухъумакIохэм пхъэм хэшIыкIыгъэу мэзым унакIэ щагъэпсы. Мыщ, ежьхэм афэдэу, заповедникым инаучнэ IофышIэхэри гъэмафи кIымафи къыщыуцухэу, чэщыр щырахэу рагъэжьэщт.

Унэм ишIын къинэу къафыдэкIыгъ. Мэз гузэгум щагъэпсырэ унэм къушъхьэм пхырыкIырэ гъогуи, зекIо лъагъуи пэблагъэп, шыхэмкIи уекIолIэнэу щы­тэп. ЯщыкIагъэр зэкIэ, псэ­олъапхъэхэри зэрахэтэу, вертолеткIэ нагъэсыгъэх, нэужым унэм икъэIэтын фежьагъэх.

Унэр зышIыхэрэм къэралыгъо инспекторхэр IэпыIэгъу къа­фэхъугъэх, заповедникым и Темыр ыкIи КъохьэпIэ мэз­хъызмэтшIапIэхэм яIофышIэхэри къадеIагъэх. Зы тхьамафэкIэ унэм идэпкъхэри, ышъхьи къаIэтыгъэх, мы уахътэм пчъэхэмрэ шъхьаныгъуп­чъэ­­хэмрэ яхэгъэуцон ыуж итых.

Унэм хьаку рашIыхьащт, Iанэр, пхъэнтIэкIухэр зэхаIулIэщтых, кIымафэм ящыкIэгъэщт гъэстыныпхъэр агъэхьазырыщт.

УнакIэр кIымэфэ щтыргъукIми фабэу уисышъунэу гъэпсыгъэщт.