Предпринимателэу Владимир Пота­ниным иунэе шIушIэ Фонд истипендие ныбжьыкIэхэм къалэжьыным пае (ар сомэ мин 25-рэ мэхъу) ащ зэхищэрэ зэнэкъокъухэм уащыпхырыкIынэу щыт. Мы илъэсым Фондым иеджапIэ щыщ волон­тер купхэр апэрэу Кавказ заповед­никым иIофышIэхэм IэпыIэгъу афэ­хъун­хэу ыкIи ащ зыщаплъыхьанхэу къэкIох.

Гъэмафэр окIофэкIэ ныбжьыкIэ купхэм зызэблахъузэ ашIыгъ, мы уахътэм ахэм ащыщхэр нэбгыри 9 хъухэу экоцентрэу Лэгъо-Накъэ щыIэх.

Апэрэ мафэм къыщегъэжьагъэу волонтерхэм IофшIэнхэр рагъэжьагъэх. Гъозэрыплъэ вольерым щаIыгъ псэушъхьэхэмрэ шыхэмрэ кIымафэм арагъэшхыщт мэкъоу къаупкIагъэр аугъоижьыгъ ыкIи къыращыжьыгъ.

Заповедникым ипащэ экологие гъэсэныгъэмкIэ игуа­дзэу Ольга Пеговам къеIуатэ:

— Заповедникым чIыпIэ зэфэшъхьафхэм ащеджэрэ ныбжьыкIэхэр къызыкIакIохэрэр ыпкIэ хэмылъэу IэпыIэгъу Iофтхьабзэхэр зэрагъэцэкIэщтхэм изакъоп, яшIэныгъэхэм зэрахагъэхъощтым, заповедникыр къызэраплъыхьащтым апай. Заповедникым мэхьанэу иIэр, щыпсэурэ псэушъхьэхэмрэ къыщыкIыхэрэмрэ зэрагъашIэх. Ахэм лекциехэм къафеджэх, заповедни­кым инаучнэ IофышIэхэм заIуагъакIэ, цIыфыIэ зынэмысыгъэ чIыпIэ къабзэхэр арагъэлъэгъух, зекIо лъагъохэм нэIуасэ афашIых.

Кавказ заповедникым ипащэ игуадзэу Ольга Пеговам къызэриIуагъэмкIэ, волонтерхэр зэлъашIэрэ зекIо лъагъоу «ТридцаткэкIэ» заджэхэрэм тетхэу Фыщт нэс ащэн­хэу рахъухьагъ.