Урысыем иобщественнэ движениеу «Культурэм иволонтерхэр» зыфиIорэм и Адыгэ республикэ къутамэ игуфакIохэр псауныгъэм фэгъэхьыгъэ сурэтхэм япроект игъэцэкIэн хэлэжьагъэх.

Урысыем илъэпкъ проектэу «Культурэм» къыщыдэлъытэгъэ Iофтхьабзэу, «Творческэ цIыфхэр» зыфиIорэр культурэмкIэ ифонд игрант агъэфедэзэ Iофтхьабзэр щыIэныгъэм щыпхыращы.

Адыгэ Республикэм культурэмкIэ иволонтерхэм псауныгъэм фэгъэхьыгъэ сурэтхэм япроект агъэцакIэзэ, Красногвардейскэ районым исымэджэщ щыIагъэх. ШIыхьафэу зэхащагъэм волонтерхэр чанэу хэлэжьагъэх. Сымэджэщым илъэсрыкIуапIэхэр апхъэнкIыгъэх, щагур агъэкъэбзагъ.

IэпэIасэм иегъэджэнхэр гъэшIэгъонэу зэхащагъэх. КъэлэмхэмкIэ сурэтхэр ашIыгъэх. Пшахъом, псым ащашIыгъэ сурэтхэри гум рихьыгъэх.

Адыгэ Республикэм икIэлэцIыкIу сымэджэщ, нэмыкIхэм волонтерхэм зэIукIэгъухэр ащызэхащэх. Урысыем культурэмкIэ иобщественнэ движениеу «Культурэм иволонтерхэр» зыфиIорэм и Адыгэ республикэ къутамэ ипащэу Карен Каракьян, Красногвардейскэ районым ыкIи Мыекъуапэ культурэмкIэ яволонтерхэм япащэхэу Дмитрий Марковыр, Валерия Кухлеевар зэхэщэн Iофхэм чанэу ахэлэжьагъэх. Сахьидэкъо Нурбый.