Урысые Федерацием и Правительствэ и Тхьаматэ игуадзэу, Адыгеим ия 100-рэ илъэс игъэмэфэкIынкIэ зэхэщэкIо комитетым итхьа­матэу Дмитрий Чернышенкэмрэ Адыгеим и ЛIышъхьэу КъумпIыл Муратрэ тыгъуасэ Москва щызэIукIагъэх.

УФ-м и Президентэу Владимир Путиным истратегическэ инициативэхэр республикэм зэрэщагъэцакIэхэрэм, Адыгэ Республикэм ия 100-рэ илъэс ихэгъэунэфыкIын фэгъэхьыгъэ Iофтхьабзэхэр зэрэзэхащэхэрэм ахэр атегущыIагъэх.

Шъугу къэтэгъэкIыжьы Урысыем и Президент унашъо зэришIыгъэм диштэу юбилеир 2022-рэ илъэсым зэрэхагъэунэфыкIырэр. Iофтхьэбзэ шъхьа­Iэхэм яфедеральнэ план диштэу мэфэкIым ихэгъэунэфыкIын макIо. Республикэм ипсэу­пIэ пстэуми ащ епхыгъэ Iоф­тхьабзэхэр ащэкIох.

«МэфэкIышхор республикэм хэхъоныгъэ егъэшIыгъэным фэ­IорышIэщт. Мы илъэс закъом зэхэугъоегъэ шъолъыр планым Iофтхьэбзэ 200-м ехъу хагъэ­хьагъ. Ащ щыщэу 160-р ин­фраструктурэм ипсэуалъэхэу цIыфхэмкIэ мэхьанэшхо зиIэхэм ягъэпсынрэ ягъэкIэжьынрэ япхыгъэх. Ахэр игъом ухыгъэнхэ фае. Юбилей ужми проектхэм ягъэцэкIэн къызэтырагъэуцо хъущтэп. Республикэм ия 100-рэ илъэс зыщыхагъэунэ­фыкIырэм ыпэкIэ зэрилъы­гъэ­хэм фэдэу лъыкIотэнхэ фае, республикэм исоциальнэ-эко­номикэ хэхъоныгъэ къыкIы­рагъэчы хъущтэп. Урысыем и Пра­вительствэ шъолъырым ищыкIэгъэ IэпыIэгъур къыри­тыщт», — къыIуагъ Дмитрий Чернышенкэм.

АР-м и ЛIышъхьэ Урысые Федерацием и Правительствэ и Тхьаматэ игуадзэ «тхьауе­гъэпсэу» риIуагъ планым игъэцэкIэнкIэ ренэу IэпыIэгъу къызэрафэхъурэм фэшI.

КъумпIыл Мурат зэрэхигъэу­нэфыкIыгъэмкIэ, культурэмкIэ учреждение пэрытхэр: Адыгэ Республикэм игалерееу сурэтхэр къызыщагъэлъагъорэр, искусствэхэмкIэ Адыгэ республикэ колледжэу Тхьабысымэ Умар ыцIэкIэ щытыр, АР-м на­роднэ культурэмкIэ и Гупчэ, искусствэхэмкIэ Адыгэ респуб­ликэ кIэлэцIыкIу еджапIэу Лъэ­цэрыкъо Кимэ ыцIэкIэ щытыр агъэкIэжьыгъэх. Инэм дэжь ща­гъэпсырэ гъогу зэхэкIыпIэмрэ Мыекъуапэ къэзыухьэрэ гъо­гум иаужырэ Iахьрэ мэфэ­кIым ехъулIэу ипIалъэм къыпэу атынхэу рахъухьэ.

Республикэм и Мафэхэр гъэхъагъэ хэлъэу бэдзэогъум ФедерациемкIэ Советым щыкIуагъэх. Адыгэ Республикэм и Мафэхэу Москва Iоныгъом щы­кIощтхэм джыдэдэм зафагъэ­хьазыры. Лъэпкъ Iэпэщысэхэр зышIыхэрэм, сурэтышIхэм, фотохудожникхэм якъэгъэлъэгъонхэр, профессиональнэ творческэ коллективхэм яконцертхэр, научнэ-практическэ конференциер ахэм къахиубытэщтых. Хъугъэ-шIэгъэ шъхьаIэу хъу­щтыр Къэбэртэе-Бэлъкъарымрэ Къэ­рэщэе-Щэрджэсымрэ ятворче- скэ коллективхэр ягъусэхэу къызэдатыщт концертыр ары.

АР-м и ЛIышъхьэ зэрэхигъэу­нэфыкIыгъэмкIэ, а концертыр хэгъэгум икультурэ хъугъэ-шIэгъэшхоу, Урысыем щыпсэурэ лъэпкъхэр пытэу зэрэзэкъотхэмкIэ щысэшIоу хъущт. Iоныгъом и 21-м концертыр Къэ­ралыгъо Кремлевскэ Дворецым щызэхащэщт.

МэфэкIым ихэгъэунэфыкIын республикэм игъэкIотыгъэу зыщыкIощтыр чъэпыогъур ары. Джащ фэдэу нэмыкI Iофтхьа­бзэхэри Урысыем щыпсэурэ лъэпкъхэм якультурэ кIэн и Илъэс къыхиубытэу зэхащэщтых.

«Республикэм июбилей тарихъ мэхьанэшхо зэриIэм нэмыкIэу, джырэ шапхъэхэм ади­штэрэ щыIэкIэ-псэукIэ дэгъу цIыфхэм афызэхэщэгъэнымкIи амалышIу къеты. Мы лъэны­къомкIэ хэгъэгум ипащэхэри, ти Президентэу Владимир Путинри IэпыIэгъу къытфэхъух», — къыIуагъ КъумпIыл Мурат.

Дмитрий Чернышенкэр бэмышIэу Адыгеим къызэкIом пшъэрылъэу къыгъэуцугъагъэхэр зэрагъэцакIэрэм фэгъэ­хьыгъэу Адыгеим и ЛIышъхьэ шъхьафэу къыIотагъ.

ГущыIэм пае, лъэпкъ проектэу «Культурэм» къыдыхэлъытагъэу 2023 — 2024-рэ илъэс­хэм Адыгеим и Къэралыгъо филармоние игъэцэкIэжьынкIэ заявкэ аIэкIагъэхьагъ. Шы­шъхьэIум ыкIэхэм адэжь Урысыем культурэмкIэ и Министерствэ икомиссие ащ хэплъэщт. Джащ фэдэу зэIукIэм цифрэ технологиехэм, инженер, спорт инфраструктурэм зягъэушъомбгъугъэнымкIэ амалэу щыIэ­хэм щатегущыIагъэх. Спорт гимнастикэмкIэ ыкIи батутымкIэ шъолъыр гупчэм ипроект 2022-рэ илъэсыр имыкIызэ агъэхьазырынэу, кушъхьэфэчъэ спортым игупчэ ипроектыр 2023-рэ илъэсым агъэхьазырынэу рахъухьэ.

ЗыгъэпсэфыпIэу «Лэгъона­къэ» ипроект зэрагъэцакIэрэми тегущыIагъэх. Лъэпкъ проектэу «ЗекIонымрэ хьакIэхэм дахэу апэгъокIыгъэнымрэ» зы­фиIорэм къыдыхэлъытагъэу корпорациеу «Туризм. РФ» зыфиIорэм игъусэу инвесторым ар ыгъэпсыщт. Федеральнэ гупчэм иIэпыIэгъу ишIуагъэкIэ транспорт, инженер инфраструктурэм изегъэушъомбгъун епхыгъэ Iофыгъохэри зэшIуахых.

«Урысыем и Правительствэ лъэшэу тыфэраз республикэм хэхъоныгъэ ышIынымкIэ ренэу IэпыIэгъу къызэрэфэхъурэм фэшI. Республикэм ия 100-рэ илъэс зыхагъэунэфыкIырэм ехъулIэу рагъэжьэгъэ проектхэр къызэтедгъэуцохэрэп. Пла­нэу итхъухьагъэхэр зэрэдгъэцэкIэщтхэм, лъэпкъ проектхэмрэ къэралыгъо программэхэмрэ тызэрахэлэжьэщтхэм яшIуагъэ­кIэ тиреспубликэ нахь зэтегъэ­псыхьагъэ хъущт», — къыIуагъ КъумпIыл Мурат.

АР-м и ЛIышъхьэ ипресс-къулыкъу