АР-м и Къэралыгъо Совет — Хасэм и Тхьаматэу Владимир Нарожнэм социальнэ догазификацием фэгъэхьыгъэ программэр зэрэпхыращырэм зыщигъэгъозэнэу муниципальнэ образованиехэр къекIухьэх. Джырэблагъэ ар Красногвардейскэ ыкIи Кощхьэблэ районхэм ащыIагъ.

Зэрэхабзэу, АО-у «Газпром межрегионгаз Майкоп» зыфиIорэм ипащэу Игорь Сырчиныр зэхэсыгъохэм ахэлэжьагъ. Ащ къызэриIуагъэмкIэ, Красногвардейскэ районымкIэ щагу 419-рэ графикым хагъэуцуагъ, лъэIу тхылъыр къэзытыгъэр 319-рэ мэхъу. Мы уахътэм гъэ­стыныпхъэ шхъуантIэм икIуапIэхэм арапхыгъэр унэ 37-р ары, зищагу гъунапкъэ нагъэсыгъэр 39-рэ мэхъу. Кощхьэблэ районымкIэ унэ 541-мэ мы илъэсым газыр аращэлIэнэу агъэнэфагъ, къэ­кIощт 2023-мкIэ 62-рэ планым хэт. ЛъэIу тхылъыр къэзытыгъэр унэгъо 307-р ары.

Ащ ыуж Парламентым и Тхьаматэ Тэхъутэмыкъое ыкIи Теуцожь районхэм, Адыгэкъалэ ащыIагъ.

Тэхъутэмыкъое районымкIэ социальнэ догазификацием фэгъэхьыгъэ программэм къыхиубытэрэр унэ 321-рэ мэхъу. Мы уахътэм унэхэм ащыщ газыр ращэлIагъэп, ау зищагу гъунапкъэ нагъэсыгъэр унэгъо 75-рэ мэхъу.

АдыгэкъалэкIэ унэ 12 гъэстыныпхъэ шхъуантIэм икIуапIэхэм апашIагъ. Мы муни­ци­пальнэ образованиемкIэ унэ 43-рэ программэм къыхеу­бытэ.

Теуцожь районымкIэ унэ 88-рэ планым хэт, лъэIу тхы-лъэу къатыгъэр 66-рэ. Унэ 11-р газыр зэбгырызытIупщырэ сетьхэм арапхыгъ, 10-мэ гъэстыныпхъэ шхъуантIэм икIуапIэ аращэлIагъ.

Игорь Сырчиным нахьыбэу зэрихьылIэрэ Iофыгъохэм къатегущыIагъ. Унагъохэм ащыщыбэм унэу зэрысхэр, чIыгоу ар зытетыр ежьхэм яунаеу зэрэщытыр къэзыушыхьатырэ тхылъхэр яIэхэп, газыр ещэлIэгъэнэу зытефэрэ щагухэм ащыщхэм зыпари адэсэп.

— Муниципальнэ образованиехэм зэкIэми Iофыгъоу къащаIэтыгъэхэр зэфэдэх. ЦIыфхэр фитыныгъэу яIэхэм зэращымыгъуазэхэр нафэ, шапхъэу догазификацием къыщыдэлъытагъэхэр ашIэхэрэп. Арышъ, нахьыбэу ахэм зэпхыныгъэ адышъуиIэн, шапхъэхэри, яфитыныгъэхэри икъу фэдизэу алъыжъугъэIэсынхэ, яунэхэр зытыратхэжьынымкIэ, дога­зификацием ищыкIэгъэ тхылъхэм ягъэхьазырынкIэ IэпыIэгъу шъуафэхъун фае, — къыIуагъ Владимир Нарожнэм зэпстэур къызэфихьысыжьзэ.