Илъэс заулэ хъугъэу АР-м и Парламент ипащэхэр цIыфым ипсауныгъэкIэ зэрарышхо къэзыхьырэ уц шIоеу амброзием игъэкIодын муниципалитетхэр зэрэдэлажьэхэрэм анаIэ тет.

Джырэблагъэ Къэралыгъо Советым — Хасэм и Тхьаматэ игуадзэу Цэй Эдуард ­мы Iофым пае Теуцожь ыкIи Тэхъутэмыкъое районхэм, Адыгэ­къалэ ащыIагъ. ПсэупIэ кой администрациехэм япащэхэр игъусэхэу ащ псэупIэхэр, мэкъумэщ хъызмэтым епхыгъэ чIыгухэр къыплъыхьагъэх.

Административнэ хэукъоныгъэхэм афэгъэхьыгъэ респуб­ликэ хэбзэгъэуцугъэм уц шIоеу, амброзиери зэрахэтэу, псауныгъэм зиягъэ езыгъэкIыхэрэр игъом зымыгъэкIодыхэрэм пшъэдэкIыжьэу ахьыщтыр щыгъэнэфагъ. Джащ фэдэу ам­брозием игъэкIодын нахь чанэу ыуж итынхэу къызщиIорэ джэпсалъэу муниципальнэ образованиехэм, псэупIэ кой ад­министрациехэм, организациехэм япащэхэм афэгъэза­гъэр Адыгеим и Парламент 2019-рэ илъэсым ыштагъ.

Арэу щытми, мы лъэныкъом­кIэ ылъэгъугъэр къызэфихьысыжьзэ, джыри щыкIэгъабэ зэ­рэщыIэр къыхигъэщыгъ Цэй Эдуард.

— Мы уц шIоим игъэкIодын зэкIэми типшъэрылъ. Тыкъэзыу­цухьэрэ дунаими, цIыфэу тыз­дэпсэухэрэми тафэсакъын фае. Лэжьыгъэ хьасэхэр дгъэкIодыхэ, ахэм къатырэ продукцием идэгъугъэ къыщыдгъакIэ хъущтэп, — къыIуагъ ащ.