Мыекъуапэ ия 35-рэ лицей икIэлэегъаджэу Любовь Галкинам ипроектэу «Зы мэфэ студент» зыфиIорэр УФ-м профори­ента­циемкIэ анахь IофшIэгъэ дэгъоу къыщыхахыгъэхэм ащыщ хъугъэ.

Адыгэ Республикэм гъэсэныгъэмрэ шIэныгъэмрэкIэ и Министерствэ макъэ къызэригъэIугъэмкIэ, проектыр кIэлэеджакIохэу я 10 — 11-рэ классхэм ащеджэхэрэм атегъэпсыхьагъ, ахэм сэнэхьа­- тыр къыхахынымкIэ ишIуагъэ къэкIонэу щыт.

Любовь Галкинам ипроект къызэрэдилъытэу, апшъэрэ классхэм арыс еджакIохэу сэнэхьатэу зызфагъэсэщтыр къыхэзыхыгъэхэр Мыекъуапэ дэт апшъэрэ еджапIэхэм кIо­хэзэ ашIыщт. КIэлэеджакIор мэфэ реным университетым къэтыщт. Еджэ­ныр къызаухыкIэ, кIэлэ­еджакIохэр, студентхэр ыкIи кIэлэегъаджэхэр зыхэлэжьэщтхэ Iэнэ хъурае зэхащэщт. Ащ сэнэхьатыр зыфэдэм нахь куоу щытегущыIэщтых, ар къыхэзыхыгъэхэми хэшIыкI фы­ряIэ хъущт.

КIэлэегъаджэм ицыхьэ телъ ащ фэдэ шIыкIэм ныбжьыкIэхэм сэнэхьат зэфэшъхьаф­хэр къыхахынхэмкIэ ишIуагъэ къызэрэкIощтым.

Проектыр Президентэу Владимир Путиным иуна­шъокIэ Урысые Федерацием гъэсэныгъэмкIэ и Министерствэрэ Гуманитар Про­ект­хэм я Фондрэ щыIэныгъэм щыпхыращы. (Тикорр.).