ЦIыфхэм яахъщэ халъхьэзэ ашIырэ унэхэм (долевое строительство) япхыгъэ Iофыгъуабэу щыIэныгъэм къыхэхьагъэр дэгъэзыжьыгъэным фэшI УФ-м и Президентэу Владимир Путиныр кIэщакIо фэхъугъэу «эскроу счетхэр» банкхэм яIэ хъугъэх. ЦIыфым ахъщэу ытырэр къэухъумэгъэныр, ащ пае унэр аухэу, атыным нэсыфэкIэ зыпари еIэн фимытэу банкым счет къыщы-фызэIухыгъэныр ары ащ къикIырэр.

Урысые Банкым и Къутамэ — АР-м и Лъэпкъ банк къызэритыгъэмкIэ, ащ фэдэ счетыр агъэфедэнышъ, ахъщэ хилъхьэзэ унэ аригъэшIыным фэгъэхьыгъэ зэзэгъыныгъэу Адыгеим щашIыгъэр мини 2,5-рэ мэхъу. Ахъщэу «эскроу счетхэм» аралъхьагъэр сомэ миллиарди 6-м кIэхьэ. ЗэрэхъурэмкIэ, илъэс закъокIэ а пчъагъэм процент 60 хэ­хъуагъ.

— Мыщ фэдэ счетхэм арылъ ахъщэр лъэшэу зэрэухъумагъэр ары ащ фэдэу жъугъэу зыкIагъэфедэрэр. Унэр зиухыкIэ псэ­олъэшIым ахъщэр фэкIо, щэфакIохэм псэупIэ яIэ мэхъу. Адыгеим ащ фэдэ счетэу къыщызэIуахыгъэм инахьыбэр хэбзэихъухьагъэм зэритым тетэу зищыкIагъэм пэIуагъэхьагъ. Ар ахъщэкIэ къэплъытэмэ, сомэ миллиарди 4,4-рэ мэхъу. ПIалъэ­хэм адиштэу унэр амыухыгъэмэ ыкIи амытыгъэмэ, банкым ахъщэр щэфакIом ритыжьынэу законым къыщыдэлъытагъ, — къы­Iуагъ АР-м и Лъэпкъ банк ипащэ игуадзэу Александр Путинцевым.

Хэбзэихъухьагъэм тетэу зищыкIагъэм пэIуагъэхьагъэм къи­кIырэр: унэхэр аухыхи, счетым илъыр псэолъэшI организацием фэкIуагъ, цIыфхэм амыгъэкощырэ мылъкоу ахъщэ зыфатыгъэр яунае хъугъэ.

УнакIэхэр нахьыбэу ащэфынхэмкIэ мы шIыкIэм ишIуагъэ къэкIо. Джащ фэдэу псэолъэшI­хэм щэфакIохэм къатыщтым емыжэхэу банкым чIыфэ къы­Iахыгъэмэ, ар игъом атыжьынэу амал яIэ мэхъу.

«Эскроу счет» къызэIуихынэу фитыныгъэ зиIэ банкхэр Урысые Банкым иинтернет нэкIубгъо итых.