Адыгеим хабзэ зэрэщыхъугъэу, апэрэ классым мыгъи кIощт кIэлэцIыкIухэм шIухьафтынхэр афашIынхэу агъэхьазыры. АР-м и ЛIышъхьэу КъумпIыл Мурат иунашъокIэ Iофтхьабзэм хагъэфэщтхэм япчъагъэ мы илъэсым нахьыбэ ашIыгъ. Республикэм имызакъоу, Херсонскэ хэкум и Геническэ район ис кIэлэцIыкIоу апэрэ классхэм кIощтхэми шIухьафтынхэр афашIыщтых.

Мы мафэхэм ахэр агъэхьазырых, охътэ благъэм Геническ атIупщыщтых. ЧIыпIэ адми­нистрацием зэрэщигъэгъоза­гъэхэмкIэ, нэбгырэ 700 мыгъэ апэрэ классым кIонэу яI. ШIэныгъэм и Мафэ ипэгъокIэу ахэм еджапIэм щырящыкIэгъэщт Iэмэ-псымэ зэхэлъхэр аратыщтых. Урысыем, ащ икъэралыгъо тамыгъэхэм нэIуасэ афэзышIыщт пкъыгъо зэфэшъхьаф­хэри ахэлъыщтых.

Адыгеим ис кIэлэцIыкIоу мыгъэ апэрэ классым кIощтхэм апае Iэмэ-псымэ зэхэлъ мини 7 агъэхьазырыгъ. Аужырэ илъэсхэм зэрашIы хабзэу, нэфынэм къезыгъэгъэзэжьырэ ныбалъэу гъогурыкIоныр щы­нэгъончъэным тегъэпсыхьагъэ­хэр ахэм ахалъхьагъэх. Джащ фэдэу тишъолъыр фэгъэхьыгъэ пособиеу «Моя Адыгея» зыфиIорэр шIухьафтын зэхэлъым мыгъэ хагъэхьагъ.

КIэлэцIыкIухэм гушIуагъо къызэрафихьырэм имызакъоу, Iофтхьабзэр ны-тыхэм ясабыеу еджапIэм чIагъахьэрэм игъэхьазырынкIэ IэпыIэгъу зэрафэ­хъурэр АР-м и ЛIышъхьэ къыхигъэщыгъ.

Республикэм ипащэ пшъэ­рылъ афишIыгъэу Геническэ районым икIэлэеджакIохэм джыри зы шIухьафтын афагъэ­хьазыры. Iоныгъом и 1-м ипэгъокIэу кIэлэцIыкIу джэгупIи 10 ащ щагъэпсын гухэлъ яI. Ащ фэшI Геническэ районым ипсэу­пIэхэр зэтырагъэпсыхьанхэу Адыгеим икIынышъ, псэолъэшI техникэр кIощт.

А зэпстэумэ анэмыкIэу, шIу­шIэ IэпыIэгъоу тонн 20 партиеу «Единэ Россием» и Адыгэ шъолъыр къутамэ егъэхьазыры. Гъомылапхъэхэр, спорт Iэмэ­-псымэхэр, нэжъ-Iужъхэр зыщаIыгъ унэхэм ачIэсхэм ящыкIэгъэщт пкъыгъохэр охътэ бла­гъэм атIупщыщтых.

Адыгеим ипащэхэмрэ Урысые политическэ партиеу «Единэ Россием» и Адыгэ шъолъыр къутамэрэ шIушIэ IэпыIэгъум къыхэлэжьагъэхэм, волонтерэу ащ игъэхьазырын зиIахь къы­хэзылъхьэхэрэм зэрафэразэхэр къыхагъэщыгъ. Волонтерхэм ащыщых тилъэпкъэгъоу Сирием, нэмыкI къэралыгъохэм къарыкIыжьхи, хэкужъым къэзыгъэзэжьыгъэхэри.