Медицинэ IэпыIэгъу араты
«Псауныгъэм имэшIоку» зыфиIорэ Iофтхьабзэм къыдыхэлъытагъэу Адыгеим икIи Херсонскэ хэкум врач купэу кIуагъэр къалэу Геническ къызщыуцугъэр.
Ар зыхэхьэрэ Геническэ районым щыпсэухэрэм апэрэ медицинэ IэпыIэгъур арагъэгъотыныр, япсауныгъэ изытет ауплъэкIуныр, яIэзэнхэр ары пшъэрылъ шъхьаIэу яIэр. ЗыщищыкIагъэм пэIудзыгъэ шIыкIэм тетэу нэмыкI специалистхэри къыхагъэлэжьэщтых.
Ащ имызакъоу, Геническэ район сымэджэщым компьютернэ томографие зэрашIыщт псэуалъэу фащэфыгъэр Адыгеим икIыгъэ специалистхэм агъэуцущт, Iоф зэрэрагъэшIэщтым фырагъэджэщтых.
АР-м и ЛIышъхьэ къызэриIуагъэмкIэ, врач купэу кIуагъэр мэфитIум къыкIоцI нэбгыри 100 фэдизмэ яплъыгъ, ахэм ащыщэу нэбгырэ 30-р кIэлэцIыкIух. ЦIыфым апэрэ медицинэ IэпыIэгъур егъэгъотыгъэным ищыкIагъэр зэкIэ тиврачхэм аIэкIэлъ. Тихирургхэм Геническэ сымэджэщым зы операцие щашIыгъ.
— Сэ пшъэрылъ зэрэфэсшIыгъэу, АР-м псауныгъэм икъэухъумэнкIэ иминистрэу Мэрэтыкъо Рустем мы Iофтхьабзэм хэлажьэ. ТапэкIэ тиврачхэм Iоф зэрашIэщтыр къыгъэнэфэным пае Iофхэм язытет ежь ышъхьэкIэ зэригъэлъэгъумэ, зыщигъэгъуазэмэ нахьышIу, — къыIуагъ АР-м и ЛIышъхьэ.
Адыгеим икIыгъэ врачхэм мазэм къыкIоцI районым ит псэупIэхэр къызэпакIухьащтых.