Лъэпкъ проектэу «Псауныгъ» зыфиIорэм къыдыхэлъытагъэу мы илъэсым Адыгеим щыпхыращынэу агъэнэфэгъэ Iофтхьабзэхэм сомэ миллион 623,5-рэ апэIухьащт.

Ащ щыщэу сомэ миллион 310,5-р цIыфым апэрэ медицинэ IэпыIэгъу етыгъэным, миллиони 117,7-р адэбз узхэм апэшIуекIогъэным апай. Гу-лъынтфэ узхэм яIэзэгъэным фытегъэпсыхьэгъэ IофшIэнхэм сомэ миллиони 123-м ехъу апэIухьащт, зыкI цифрэ шIыкIэ гъэпсыгъэным миллион 48,5-рэ тефэщт. Апэрэ медикэ-санитарнэ IэпыIэгъум пэIухьащтыр сомэ миллион 21-р ары, кIэлэцIыкIухэм япсауныгъэ къэухъумэгъэным фэгъэзэгъэ лъэныкъом зегъэушъомбгъу­гъэным сомэ миллиони 2,3-рэ фагъэ­кIощт.

Мы уахътэм цифрэ шIыкIэм техьэгъэ­ным епхыгъэ IофшIэнхэр зэшIохыгъэ хъугъэ. Мыекъуапэ ирайонэу «Восходым» поликлиникэу щырагъэжьагъэр зэраухыщтым тегъэпсыхьагъэу АР-м и ЛIышъхьэ пшъэрылъхэр къышIыгъ.

— Къэралыгъом къытфигъэуцурэ пшъэрылъхэр игъом ыкIи дэгъоу дгъэцэкIэнхэр шIокI зимыIэ Iоф. Ары пакIошъ, пIалъэ­хэм апэ титэу проектхэр пхырытщынхэм тыкъыфэкIон фае, — къыкIигъэтхъыгъ КъумпIыл Мурат.

Аукционхэр игъом зэхэщэгъэнхэм, IофшIэнхэр шапхъэхэм адиштэу зэшIохыгъэнхэм, федеральнэ гупчэм амалэу къытырэри, республикэм къэкIуапIэу иIэхэри икъоу гъэфедэгъэнхэм мэхьанэ зэриIэри ЛIышъхьэм къыхигъэщыгъ.