ЕджапIэхэм ягъэцэкIэжьын фэгъэ­хьыгъэ федеральнэ программэу илъэситфым телъытагъэр Адыгеим щылъагъэкIуатэ. «Единэ Россиер» кIэщакIо зыфэхъугъэ Iофым УФ-м и Президент дыригъэштагъ.

АР-м гъэсэныгъэмкIэ ыкIи шIэныгъэмкIэ иминистрэ иIэнатIэ зыгъэцэкIэрэ Евгений Лебедевым къызэриIуагъэмкIэ, мыгъэ еджэпIи 10 республикэм щызэтырагъэпсыхьажьы. Графикым диштэу IофшIэнхэр ахэм ащы­лъа­гъэ­кIуатэх, зэкIэми еджэпIэ кIоцIым ищыкIагъэр рашIылIэгъах.

ГущыIэм пае, станицэу Аба­дзехскэм гъэсэныгъэм и Гупчэу дэтым игъэцэкIэжьын аухы. Учреждениер зэрагъэкIэжьыщтым ны-тыхэр лъэплъэх, ахэм яшIоигъоныгъэу къыраIотыкIыгъэхэр къыдалъытэх.

— IофшIэнхэр зэрэкIохэрэм тегъэразэ, — къыIуагъ зисабый апэрэ классым зыгъэкIощт Е. Буб­ликовам. — ЕджапIэхэм ягъэкIэжьын тегъэпсыхьэгъэ программэм хэлэжьэнэу Гупчэм амал иIэ зэрэхъугъэм фэшI АР-м и ЛIышъхьэу КъумпIыл Мурат, федеральнэ ыкIи шъо­лъыр хэбзэ органхэм тазэрафэразэр ны-тыхэм ацIэкIэ къас­Iомэ сшIоигъу. Лъэхъаным диштэу зэтегъэпсыхьэгъэ еджапIэм тикIэлэцIыкIухэр зэрэчIэсы­щтхэм, щынэгъончъэу зэреджэщтхэм лъэшэу тегъэгушIо.

Район администрацием ипресс-къулыкъу къызэрэщаIуа­гъэмкIэ, еджапIэм ыкIоцI Iоф­шIэнхэр щаухых, унашъхьэмрэ шъхьаныгъупчъэхэмрэ зэблахъу­гъэх, оборудованиеу чIэтыщтыр къащэфыгъах. ДэкIояпIэхэр, чIэ­хьагъур ашIынхэу рагъэ­жьагъ, ащ дакIоу щагур зэтырагъэ­псыхьащт.

Ахэм ямызакъоу, «Комната детских инициатив» зыфиIорэ кабинетыр илъэсыкIэ еджэгъур зырагъэжьэжьыкIэ къызэIуа­хыщт. КIэлэеджакIохэр кIэщакIо зыфэ­хъурэ проектхэр ащ щызэхагъэу­цонхэ ыкIи щыпхыращынхэ алъэ­кIыщт, классхэм япэщэ кIэлэегъаджэхэм урокхэм ахэмыхьэрэ егъэджэнхэр щызэхащэщтых.