Адыгеим щыпсэурэ хъулъфыгъэм нацист тамыгъэр «Интернетым» къызэрэригъэхьагъэм, джащ фэдэу гухьэ-гужъ ыкIи зэпыиныгъэ нэшанэ зиIэ гупшысэхэр къызэрэщыхиутыгъэхэм афэшI пшъэдэкIыжь рагъэхьыгъ.

Федеральнэ щынэгъончъэнымкIэ къулыкъум и ГъэIорышIапIэу Адыгеим щыIэм Кощхьэблэ районым щыщ илъэс 28-рэ зыныбжь В. Э. Борысенкэм социальнэ сетьхэмкIэ ежь иаккаунт тамыгъэр къыригъэхьагъэу, джащ фэдэу хэбзэухъумэкIо къулыкъу­хэм афэгъэхьыгъэ гухьэ-гужъ гупшысэхэр къыщыхиутыгъэхэу къыхагъэщыгъ.

Мы лъэныкъомкIэ материалхэр АР-м хэгъэгу кIоцI IофхэмкIэ и Министерствэ ыкIи Адыгеим и Прокуратурэ афагъэхьыгъ. Хабзэр зыукъуагъэм ылъэныкъокIэ протокол зэхагъэуцуагъ.

Кощхьэблэ район хьыкумым В. Э. Борысенкэм административнэ хэбзэукъоныгъэ зэрэзэрихьа­гъэмкIэ лажьэ иIэу ыгъэунэфыгъ ыкIи тазырэу сомэ мини 2 ыкIи мин 15 тырилъхьагъ.

Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгеим щыIэм ипресс-къулыкъу.