Адыгэ Республикэм и Общественнэ палатэ общественнэ лъыплъэнымкIэ икомиссие (ОНК) кIэу хэхьэгъэ кандидатхэм яегъэджэн-семинар бэмышIэу Мыекъуапэ щыкIуагъ.

Iофтхьабзэм хэлэжьагъэх щынэгъончъэнымкIэ ыкIи зэпхыныгъэхэмкIэ УФ-м и Общественнэ палатэ и Комиссие ипащэу Александр Воронцовыр, Урысыем и Общественнэ палатэ и Аппарат общественнэ лъыплъэнымкIэ икомиссие иIоф­шIэнкIэ иотдел ипащэу Петр Золотовыр, АР-м и Общественнэ палатэ илIыкIоу Барцо Тимур.

Джащ фэдэу зэхахьэм къырагъэблэгъагъэх Адыгеим и Общественнэ палатэ общественнэ лъыплъэнымкIэ икомиссие кIэу хэхьэгъэ кандидатхэр, АР-м хэгъэгу кIоцI IофхэмкIэ и Министерствэ, бзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгеим щыIэм ыкIи цIыфхэм яфитыныгъэхэмкIэ уполномоченнэу Адыгеим щыIэм и Аппарат ялIыкIохэр.

А. Воронцовым къызэриIуагъэмкIэ, УФ-м и Общественнэ палатэ «Общественнэ лъыплъэ­нымкIэ икомиссие хэтыщт кандидатхэр гъэхьазырыгъэнхэр» зыфиIорэ проектыр ытIупщыгъ. Ащ къыдыхэлъытагъэу тикъэралыгъо ишъолъыр 45-мэ егъэ­джэн-семинархэр ащызэхащэх.

Проектым хэхьагъэх Урысыем и Общественнэ палатэ, шъолъыр палатэхэм ялIыкIохэр (ахэм ахэхьэ АР-м и Общественнэ палатэ), Общественнэ лъыплъэн комиссиер, бзэджэшIагъэ зезыхьагъэхэм пшъэдэ­кIыжь ягъэхьыгъэнымкIэ федеральнэ къулыкъум ыкIи хэгъэгу кIоцI къулыкъумкIэ Министерствэм, цIыфхэм яфитыныгъэхэмкIэ уполномоченнэм я Общественнэ советхэм ахэтхэр.

— Общественнэ лъыплъэнымкIэ комиссием хэхьэгъэ кандидатхэм яегъэджэн фэгъэхьы­гъэу мы проектыр дгъэпсыгъэ. Хэб­зэгъэуцугъэм къыгъэнэфэрэ пIалъэм ехъулIэу документхэр агъэхьазырынхэ алъэкIынэу, ащ ыуж Урысыем и Общественнэ палатэ икандидат хъунхэмкIэ, нэужым хьапсхэм ачIэсхэм яфитыныгъэхэр къэухъумэгъэнхэм ыкIи алъыплъэгъэным ылъэныкъокIэ общественнэ хэбзэгъэуцу хъунхэмкIэ къэбарэу щыIэхэм кандидатхэр ащытэгъэгъуазэх. Хэбзэгъэуцугъэу щыIэм къызэригъэнафэрэмкIэ, шъолъыр общественнэ комиссием нэбгыри 5-м къыщегъэжьагъэу 40-м нэс хэхьанхэ алъэкIыщт. Пшъэры­лъэу тиIэр Общественнэ лъыплъэнымкIэ комиссием кандидатхэр хэгъэ­хьэгъэн­хэм фэшI гражданскэ обществэм, общественнэ объединениехэм ялIыкIохэм зэдэгущыIэгъухэр адэшIыгъэныр ары, — къыIуагъ Александр Воронцовым.

КIАРЭ Фатим. Сурэтыр Iэшъынэ Аслъан ты­рихыгъ.