Адыгеим и ЛIышъхьэу КъумпIыл Мурат Тэхъутэмыкъое районым щыIагъ, гурыт еджапIэхэр мыщ зэрэщагъэпсыхэрэр ыуплъэкIугъ. Iофтхьабзэм хэлэжьагъэх АР-м и Премьер-министрэ ипшъэрылъхэр зыгъэцакIэу КIэрэщэ Анзаур, муниципальнэ образованиеу «Тэхъутэмыкъое районым» ипащэу Шъэо Аскэр, АР-м иминистрэхэм я Кабинет хэтхэр, районым ипсэупIэхэм яадминистрациехэм яIофышIэхэр.

Гурыт ежапIэхэм зы сменэкIэ Iоф ашIэнэу УФ-м и Президентэу Владимир Путиным унашъоу ышIыгъэр Адыгеим игъорыгъозэ зэрэщагъэцакIэрэр шъугу къэтэгъэкIыжьы. Мы аужырэ илъэси 5-м гурыт еджэпIи 5 республи­кэм щашIыгъ. 2024-рэ илъэсым нэс джыри гурыт еджэпIи 5 агъэпсынэу рахъухьэ.

Адыгеим и ЛIышъхьэ АР-м гъэсэныгъэмрэ шIэныгъэмрэкIэ и Министерствэ пшъэрылъ фишIыгъ цIыфхэр нахьыбэу зыщыпсэурэ Тэхъутэмыкъое районым нахь лъэшэу ынаIэ тыригъэтынэу. Мы районым гурыт еджэпIэ 24-рэ ит. Илъэс къэс кIэлэеджакIохэм нэбгырэ миным ехъу къахэхъо. Гурыт еджапIэхэм ячIыпIэхэм афэныкъорэр нахьыбэ мэхъу.

Мы илъэситIу благъэм гурыт еджэпIи 3 Тэхъутэмыкъое районым щагъэпсынэу рахъухьэ. Ахэм яшIын фежьэгъахэх. Нэбгырэ 1100-мэ ателъытэгъэ гурыт еджэпIи 2 псэупIэхэу Яблоновскэмрэ АдыгеякIэмрэ, нэбгырэ 250-рэ зычIэфэщтыр къуаджэу Бжыхьэкъоежъым ащагъэпсыщтых. 2023-рэ илъэсым итыгъэ­гъэзэ мазэ псэолъакIэхэр атын­хэ фае. Лъэпкъ проектэу «Гъэсэныгъэм» хэхьэрэ шъолъыр проектэу «Джырэ шапхъэхэм адиштэрэ гурыт еджапI» зыфи­Iорэм ахэр къыщыдэлъытагъэх.

АР-м и ЛIышъхьэ къуаджэу Бжыхьэкъоежъым апэ къыщы­уцугъ. ЧIыпIэ администрацием иIофышIэ къызэриIуагъэмкIэ, ащ дэт гурыт еджапIэр 1910-рэ илъэсым агъэпсыгъ. Нэбгырэ 213-рэ ащ щеджэ, мыгъэ джыри кIэлэцIыкIу 36-рэ чIэхьащт. Нэбгырэ 250-мэ ателъытэгъэ гурыт еджапIэр тIоу зэтеутыгъэщт, производственнэ мастерскойхэр, спорт, актовэ залхэр, кружокхэр зыщызэхащэщт классхэр, библиотекэр, шхапIэр, медицинэ пунктыр ыкIи нэмыкIхэр ащ хэхьэх. Джащ фэдэу гурыт еджа­пIэм ищагу спорт джэгупIи, зыгъэпсэфыпIэ чIыпIэхэри иIэщтых. Ахэм ягъэпсын сомэ миллион 361,5-рэ фэдиз пэIу­хьащт. Мылъкур шIуагъэ къытэу агъэфедэнэу, подряднэ организациер псэолъэшIынымкIэ графикым дэмыхынэу, социальнэ мэхьанэ зиIэ проектхэр зэрагъэ­цакIэрэм муниципалитетым ренэу гъунэ лъифынэу КъумпIыл Мурат афигъэпытагъ.

АР-м и ЛIышъхьэ АдыгеякIэмрэ Яблоновскэмрэ япсэ­олъэшIыпIэхэм ащыIагъ. Подрядчикхэр унэ лъапсэхэр зыща­гъэчъыщт чIыпIэхэм ягъэхьазырын фежьагъэх. Типовой проектым тетэу нэбгырэ 1100-мэ ателъытэгъэщт еджапIэхэр агъэ­псыщтых. Ахэр тIоу зэхэтыщтых, зыр ублэпIэ еджапIэм чIэсхэм, адрэр нэмыкI классхэм арысхэм атегъэпсыхьэгъэщт. Гурыт еджапIэхэм актовэ зали, спорт, тренажернэ залитIуи, шхапIи, медпункти хэтыщтых. Псэуалъэм ишIын сомэ миллиард 1,3-рэ фэдиз пэIухьащт.

КъумпIыл Мурат муниципалитетымрэ АР-м гъэсэныгъэмрэ шIэныгъэмрэкIэ и Министерствэрэ пшъэрылъ афишIыгъ псэолъэшIын IофшIэнхэр зэрагъэцакIэхэрэм ренэу гъунэ алъафынэу, гурыт еджапIэхэм къапэIулъ чIыпIэхэмрэ инфраструктурэмрэ язэтегъэпсыхьан ыпэрапшIэу дегупшысэнхэу, общественнэ транспортым имаршрутхэу кIэлэцIыкIухэмкIэ нахь Iэрыфэгъухэр зэхагъэуцонэу.

«Урысые Федерацием и Правительствэ иIэпыIэгъу ишIуагъэ­кIэ гъэсэныгъэм изегъэушъомбгъункIэ, джырэ шапхъэхэм адиштэрэ гурыт еджапIэхэм ягъэпсынкIэ проектышхо заулэ мы аужырэ илъэсхэм респуб­ликэм щагъэцэкIагъ. А IофшIэныр тапэкIи лъыгъэкIотэгъэн, федеральнэ программэхэмрэ лъэпкъ проектхэмрэ амалэу къатыхэрэр икъоу гъэфедэгъэнхэ фае. ПсэолъакIэхэр затIупщыкIэ, гурыт еджапIэхэм Iофэу атегъэуагъэр нахь макIэ хъущт, ахэр зы сменэ Iоф­шIэным тегъэхьэгъэнхэу хэгъэгум и Президент пшъэрылъэу къыгъэуцугъэр зэшIохыгъэ хъущт», — къыIуагъ КъумпIыл Мурат.

АР-м и ЛIышъхьэ ипресс-къулыкъу