Шъолъыр проектэу «Къэлэ щыIэкIэ зэтегъэпсыхьагъ» зыфиIорэр муниципалитетхэм зэ­ращагъэцакIэрэм Адыгеим и ЛIышъхьэ ренэу гъунэ лъефы. КъумпIыл Мурат Тэхъутэмыкъое районым зэкIом, поселкэу Яблоновскэм игъогухэр зэрагъэцэкIэжьхэрэмрэ общественнэ чIыпIэхэр зэрэзэтырагъэпсыхьэхэрэмрэ ыуплъэкIугъэх.

Iофтхьабзэм джащ фэдэу хэлэжьа­гъэх АР-м и Премьер-министрэ ипшъэрылъхэр зыгъэцакIэу КIэрэщэ Анзаур, муниципальнэ образованиеу «Тэхъутэмы­къое районым» ипащэу Шъэо Аскэр, АР-м иминистрэхэм я Кабинет хэтхэр, Яблоновскэ къэлэ псэупIэм ипрокуратурэрэ иадминистрациерэ ялIыкIохэр.

ЫпэкIэ Яблоновскэм зэкIом пшъэры­лъэу афишIыгъагъэхэр зэрагъэцэкIэжьыгъэхэр АР-м и ЛIышъхьэ ыуплъэкIугъ. ГущыIэм пае, урамхэу Новэмрэ Широкэмрэ агъэцэкIэжьхэ зэхъум IофшIэнхэр дэгъоу зэшIохыгъэнхэм, социальнэ псэуалъэхэр зэзыпхырэ гъогухэм ягъэцэкIэжьын мэхьанэшхо зэряIэм анаIэ тыраригъэдзэгъагъ.

КъумпIыл Мурат Iофхэр зэрагъэцэкIагъэм уасэ къыритыгъ. Урамэу Широкэм ыбгъуитIуи гъучI-бетон трубэхэу щычIалъхьагъэхэм ощхыпсыр арэлъадэ, лъэсгъо­гухэр агъэпсыгъэх, гъогум ызыныкъо нахьыбэм асфальт тыралъхьагъ. Iоныгъом иублэгъу ехъулIэу IофшIэнхэр аухыщтых. Метри 6-м нэсэу гъогум зырагъэушъомбгъугъ, метри 2 зишъомбгъогъэ лъэс гъогухэри агъэпсыгъэх.

Лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэм къыдыхэлъытагъэу Фрунзэмрэ Титовымрэ яурамхэри мыгъэ Яблоновскэм щагъэцэкIэжьыщтых. Iоныгъом и 1-м ехъулIэу ахэм ощхыпс илъэ­дапIэхэр, лъэс гъогухэр ащагъэпсыщтых, остыгъэхэр ащапалъэщтых. ПстэумкIи ащ пае гъогу фондым сомэ миллион 214-м ехъу къыхагъэкIыгъ.

Шъолъыр проектэу «Къэлэ щыIэкIэ зэтегъэпсыхьагъ» зыфиIорэм диштэу щагухэм язэтегъэпсыхьанкIэ Тэхъутэмыкъое районымкIэ Яблоновскэ къэлэ псэупIэм IофшIэнхэр щаухыгъэх. Сомэ миллион 71,751-рэ ахэм апэIухьагъ. ПстэумкIи 2022-рэ илъэсым щагу 11-рэ зы общественнэ чIыпIэрэ Яблоновскэм щызэтырагъэпсыхьагъэх. ДжэгупIэхэр, зыгъэпсэфыпIэ чIыпIэхэр, автомобильхэр зыдагъэуцущтхэр ащ щагъэпсыгъэх, остыгъэхэр щызэблахъугъэх.

АР-м и ЛIышъхьэ спорт еджапIэу N 3-ми щыIагъ. Нэбгырэ 900 фэдизмэ ащ зыщагъасэ. Спорт еджапIэм ипащэ къызэриIуагъэмкIэ, агъасэхэрэм япчъа­гъэ зэрэхахъорэм епхыгъэу унакIэ шIы­гъэн фае. АР-м и ЛIышъхьэ республикэм физическэ культурэмрэ спортымрэкIэ и Комитет ипащэу Дэгужъые Мурат пшъэ­рылъ фишIыгъ муниципалитетым иадминистрацие ипащэ игъусэу унакIэм игъэ­псынкIэ амалэу щыIэхэр зэригъэшIэнэу, ащкIэ ищыкIэгъэ документхэр ыгъэхьазырынхэу.

Адыгеим и ЛIышъхьэ къызэрэхигъэщыгъэмкIэ, социальнэ, транспорт инфра­структурэ дэгъу псэупIэм фызэхэщэгъэн, микрорайоныкIэхэм япланирование икъоу дегупшысэгъэн фае. КъумпIыл Мурат Яблоновскэм имикрорайонхэм ащыщ горэм щыIагъ, псэупIэ комплексэу агъэпсырэр къызэпиплъыхьагъ. Джащ фэдэу Адыгеим и ЛIышъхьэ зэхэсыгъоу зэрищагъэм цIыфхэр зыгъэ­гумэкIырэ Iофыгъохэм щахэплъагъэх. Яблоновскэм изэтегъэпсыхьанкIэ, кIэлэцIыкIу джэгупIэхэм, зыгъэпсэфыпIэ чIыпIэхэм, гъогухэм ягъэпсынкIэ КъумпIыл Мурат пшъэрылъ заулэ афишIыгъ.

«ПсынкIэу хэхъоныгъэ зышIырэ псэ­упIэхэм Яблоновскэр ащыщ. Ау зэшIохыгъэн фаеу ащ ыпашъхьэ джыри пшъэрылъыбэ ит. МикрорайоныкIэхэр агъэпсыхэ зыхъукIэ чIыпIэм ипланировкэкIэ проектым дэхыхэ хъущтэп, муниципалитетым фэныкъуа­гъэу иIэхэри, цIыфхэм яшIоигъоныгъэхэ­ри икъоу къыдалъытэнхэ фае. ПсэупIэхэм хэхъоныгъэ ягъэшIыгъэнымкIэ, цIыфхэм ящыIэкIэ-псэукIэ зыкъегъэIэтыгъэнымкIэ федеральнэ гупчэм амалышхохэр къытетых. Нахь шIуагъэ къытэу ахэр жъугъэфедэх», — къы­Iуагъ КъумпIыл Мурат.

АР-м и ЛIышъхьэ ипресс-къулыкъу