ЗиIофшIэн фэшъыпкъэу, лIыбланэу, гъэпсэф имыIэу къулыкъур зыхьэу Адыгеим исыр макIэп. Тихэгъэгу, тиреспубликэ ирэхьатныгъэ икъэухъумэн ахэм япшъэрылъ. ЯшэнкIэ псыхьагъэх, пытагъэрэ лIыгъэрэ ахэлъ.

Ахэм ащыщэу непэ тыкъызтегущыIэ тшIоигъор илъэс 30-м кIахьэу къулыкъу­шIэхэм ахэтэу ЯхъулIэ Адам. Мы уахътэм Адыгэ Республикэм и Къэралыгъо автоинспекцие ихэушъхьафыкIыгъэ взвод икомандир ар игуадз.

Адам Теуцожь районым ит къуаджэу Нэшъукъуае къыщыхъугъ, щапIугъ. ШIу зыщызэрэлъэгъухэрэ, зыщызэгурыIохэрэ, адыгагъэр зыщагъэлъэпIэрэ унагъо кIалэр къихъухьагъ. Ятэ-янэхэу Азмэтрэ Дарихъанрэ лэжьэкIо чанхэу ящытхъу чыжьэу Iугъэ.

КIэлэ ныбжьыкIэм гурыт еджапIэр къызеухым, Мыекъуапэ дэт мэкъумэщ техникумым чIэхьагъ, ащ ыуж 1993-рэ илъэсым дзэ къулыкъум илъэситIурэ къэти къызегъэзэжьым, уахътэ тыримыгъашIэу патрульнэ-постовой къулыкъум ибатальон хэхьагъ. «ЧIыпIэ плъырхэм» къулыкъур ащыпхьыныр зыфэдэр IорIотэжькIэ зэхихыгъэу щытэп.

1996-рэ илъэсым Адам Дагъыстан агъэкIогъагъ. МэзитIум къыкIоцI блок-постэу Аркобаш къэзыгъэгъунагъэхэм ащыщыгъ.

Ихэгъэгу шIу зэрилъэгъурэр къыушы­хьатэу, илъэс пчъагъэ хъугъэу къулы­къушIэмэ ар ахэт. 2002-рэ илъэсым янэ-ятэхэр зыщыпсэурэ районым ыгъэ­зэжьыгъ, Теуцожь районымкIэ отделением и ППС IофшIэныр щыпидзэжьыгъ. 2002-рэ илъэсым шэкIогъу мазэм зэо-зэпэуцужь зыщыкIорэ Чэчэн Респуб­ликэм кIуагъэхэм ахэтыгъ. Адыгеим икIыгъэ нэбгырэ 16-м лIыхъужъныгъэ ахэлъэу гъунэгъу республикэм ирэхьатныгъэ къаухъумагъ. Замай-Юрте иблок- пост къулыкъу щахьыгъ. Бэ ахэм анэгу кIэкIыгъэр, блок-постым къеохэуи къы­хэкIыгъ, ау Адыгеим икIыгъэ кIалэхэм затыгъэп, зэрифэшъуашэу япшъэрылъхэр агъэцэкIагъэх.

Чэчэным щэIэфэ иунагъо исхэм къин алъэгъугъ, якIалэ ымакъэ зэхахыфэ зэгоутыщтыгъэх. Зэо-зэпэуцужьым хэт кIалэр гъотыгъоягъэ. Мэзихыр аухи Адыгеим икIыгъэ кIалэхэр яунэ къэкIо­жьыгъэх.

2005-рэ илъэсым къыщегъэжьагъэу Мыекъуапэ щэпсэу. Къэралыгъо автоинспекцием ихэушъхьафыкIыгъэ взвод хэхьажьыгъ, бэ темышIэу командирым игуадзэ хъугъэ.

— Мы сэнэхьатыр къызэрэхэсхыщтым джыри дзэ къулыкъум сыщыIэзэ тесыубытэгъагъ, — къеIуатэ ащ. — Мыщ щызгъэкIогъэ уахътэм гуп­шысэ гъэнэфагъэхэр сигъэшIыгъэх. КъысэкIугъ уахътэ «чIыпIэ плъырхэм» сарытэу, псаоу сыкъэнэщтми сымы­шIэу, лъэхъан псынкIагъэп ар, ау ти­­хэгъэгу ирэхьатныгъэ къэтыухъумэныр къулыкъушIэхэмкIэ типшъэрылъ шъхьаIэу щыт. Синасып къыхьи псаоу къэзгъэзэжьыгъ.

ТигущыIэгъу иIофшIэн урыгущыIэн зыхъукIэ, хэткIи шъэфэп ощхи оси, чэщи мафи, анахь тыгъэнэстырми къулыкъу пхьыныр зэрэкъиныр. Ащ дакIоу мыхэм яIофшIэн япсауныгъэкIи, ящыIэныгъэкIи зэрэщынагъом пстэуми тыщыгъуаз.

— Мы сэнэхьатым угукIэ уфэмыщагъэу Iоф рыпшIэшъущтэп, хэшIыкI фыуиIэнэу щыт. Бэрэ къыхэкIы хъугъэ-шIэгъэ къин дэдэхэм тахафэу, аварие гухэкIышхохэм тарихьылIэу, цIыф укIыгъаби тэлъэгъу. Ау, сыдэу пшIын, ахэр зэкIэ тиIофшIэнкIэ къы­тэпхыгъэх. Мыекъуапэ имызакъоу, районхэми гъогурыкIоныр ащыщынэгъончъэным тылъэплъэ, — еIо Адам.

Ихэгъэгу къызэриухъумагъэм, лIы­хъужъныгъэу зэрихьагъэм апае ЯхъулIэм иилъэс IофшIэгъухэм щытхъу тхылъэу, медалэу къыратыгъэр макIэп. Ахэм ащыщых «За службу в России», «Отличник милиции», «Участник боевых действий», «За верность долгу» ыкIи нэмыкIхэр.

Адам ишъхьэгъуси къулыкъушIэхэм ахэт. СабыитIу зэдапIу. Пшъэшъэжъые нахьыжъым гурыт еджапIэр къеухы ыкIи янэ-ятэхэм ягъогу техьэ шIоигъу. КIалэм илъэс 13 ыныбжь.

ДЕЛЭКЪО Анет.