Херсонскэ хэкум кIуагъэх
АР-м псауныгъэр къэухъумэгъэнымкIэ и Министерствэ изэхэщакIоу, Адыгеим икIи врач куп Херсонскэ хэкум кIуагъэ.
ПстэумкIи нэбгыри 6 купым хэтыр: терапевтэу 3, кIэлэцIыкIухэм яIэзэрэ врач ыкIи хирург. Iофтхьабзэу «Псауныгъэм имэшIоку» зыфиIорэм къыщыдэлъытагъэу агъэпсыгъэ бригадэр къалэу Геническ къызщыуцущтыр.
Медицинэм иIофышIэхэр ягуапэу зэрэкIуагъэхэр министерствэм къыщыхагъэщыгъ. Мыщ щыпсэурэ нэжъ-Iужъхэм ащыщыбэм медицинэ IэпыIэгъу замыгъотырэр бэшIагъэ. Iофтхьабзэм ишIуагъэкIэ джы ахэм япсауныгъэ изытет зэрагъэшIэнэу, диагноз тэрэз афагъэуцунэу, ищыкIагъэм тетэу яIэзэнхэу амал яIэ хъугъэ.
«Псауныгъэм имэшIоку» зыфиIорэр псэупIэхэр къыкIухьэзэ цIыфхэм яIэзэрэ поликлиникэу щыт. Ащ Геническэ районым щыпсэухэрэм медицинэ IэпыIэгъу аригъэгъотыщт. ШIоигъоныгъэ зиIэхэр зэкIэ ащ къекIолIэнхэ, япсауныгъэ изытет зэрагъэшIэн алъэкIыщт.