Селоу Красногвардейскэм икIэу къуаджэу Улапэ зэпичызэ поселкэу Заревэм кIорэ гъогум ия 23-рэ километрэ телъ лъэмыджэу псыхъоу Псынэф инэпкъхэр зэзыпхырэр лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къызэрэщыдэлъытагъэу мы уахътэм агъэцэкIэжьы.

ОАО-у «Ростовавтомост» зыфиIорэр ары ащ Iоф щызышIэрэр, пшъэрылъэу яIэм процент 40-р хагъэкIыгъ. Лъэмыджым изы лъэныкъокIэ псыхъо нэпкъхэр агъэпытагъэх, пкъэоу псэуалъэр зытетхэр агъэкIэжьыгъэх. ЗагъэцэкIэжьырэм ыуж ар нахь шъуамбгъо зэрэхъущтыр джыдэдэми къэлъагъо. ЛъэсрыкIохэм апайи гъогу фа­шIыщт, транспортыр зэрыкIорэм ар пыутыгъэщт. Псэуалъэм игъэкIэжьын сомэ миллион 77,84-рэ пэIуа­гъэхьащт. Илъэсым ыкIэм нэс IофшIэнхэр аухынхэу лъэмыджышIхэм гухэлъ яI.

Гъогоу ар зыхахьэрэри километри 7 хъоу Адыгеим игъогу фонд къыхэхыгъэ ахъщэкIэ агъэцэкIэжьы. Ар нахь шъуамбгъо хъугъэ, асфальтэу тыралъхьэрэр федеральнэ шапхъэхэм адештэ. Шъугу къэдгъэкIыжьын, мы илъэсым ащ нэмыкIэу лъэмыджитIу республикэм щагъэцэкIэжьынэу щыт, пстэумкIи сомэ миллиони 169-рэ ахэм апэIухьащт.