Неущ псэолъэшIхэм ямэфэкI. Унэхэр зыгъэуцухэрэм ямызакъоу, гъогухэр, лъэмыджхэр, социальнэ псэолъэ зэфэшъхьафхэр зышIы­хэрэ­ми, гъэстыныпхъэ шхъуантIэм, псым якIуапIэхэр зыгъэпсыхэрэми ар ямэфэкI. Мы мафэм ипэгъокIэу ягугъу къэтшIымэ тшIоигъу ООО-у «Южгазстрой» зыфиIорэм ыкIи ащ ипащэу Андрей Тугу­луковым.

ХъызмэтшIапIэр Мыекъуап зыдэтыр, Совет хабзэм илъэ­хъан, 1961-рэ илъэсым, агъэ­псыгъагъ. 1994-рэ илъэсым нэс гъэстыныпхъэ шхъуантIэр псэупIэхэм ящэлIэгъэныр, ащызэ­бгырыщыгъэныр ары зыфэгъэзэгъагъэр. Джы ащ имызакъоу, псым икIуапIэхэр егъэпсых, полиэтиленым ыкIи полипро­пиленым ахэшIыкIыгъэу ахэм ащагъэфедэхэрэр къыдегъэкIых, псэолъэ зэфэшъхьафхэр егъэуцух, егъэцэкIэжьых.

Андрей Тугулуковыр Мые­къуапэ къыщыхъугъ, щапIугъ, гурыт еджапIэм ыуж автодорожнэ техникумыр къыщиухыгъ. 1994-рэ илъэсыр ары «Южгазстроим» къызыкIуагъэр, про­рабэу иIофшIэн щыригъэжьэ­гъагъ.

А лъэхъаныр зэрэмыпсын­кIагъэр къыхиубытагъэхэм дэгъоу къашIэжьы. Ахэр къызэпызымычышъугъэхэм ащыщэу «Южгазстроир» 1997-рэ илъэсым «истыхьи», Андрей Тугулуковыр арбитражнэ гъэIорышIакIо ащ фашIыгъагъ.

А уахътэм Iофхэр зыфэда­гъэхэм къатегущыIэнэу ар фэя­гъэп, къызэрыкIоу зэрэщымытыгъэхэр, къиныбэ къызэрэзэпачыгъэр кIэкIэу къыIуагъ. ЧIы­фэу хъызмэтшIапIэм телъыгъэр атыжьи, зэрэзэтеуцожьыгъэхэм ежь ишIушIагъэу хэлъы­ми игугъу къышIыгъэп, ау ащ къыщегъэжьагъэу ежь игенеральнэ директор.

Непэ хэхъоныгъэхэр ышIызэ хъызмэтшIапIэр лъэкIуатэ. Лъэпкъ проектхэм, программэ зэфэшъхьафхэм къадыхэлъы­тагъэу республикэм щызэшIуа­хыхэрэм ащыщыбэм «Южгазстроим» иIахь мымакIэу ахэлъ. ГущыIэм пае, УФ-м и Президент кIэщакIо зыфэхъугъэ социальнэ догазификацием ипхырыщын хэлажьэ. Мыекъуапэ, Мыекъопэ, Джэджэ ыкIи Красногвардейскэ районхэм ащы­псэухэрэм ящагухэм гъэстыныпхъэ шхъуантIэр арищэлIэнэу ригъэжьагъ, пстэумкIи унэгъо 800 испискэ хэт.

Мыекъопэ районым щыпсэухэрэмкIэ социальнэ мэхьанэ зиIэ станциеу гъэстыныпхъэ шхъуантIэр зэбгырызытIупщырэр икIэрыкIэу зышIыжьыгъэр мы хъызмэтшIапIэр ары.

Джащ фэдэу Теуцожь районым ипсэупIэхэм псыкъычIэщыпIэхэр, псырыкIуапIэхэр аща­гъэкIэжьыгъэх, мы уахътэми ащ фэдэ IофшIэнхэр щылъагъэ­кIуа­тэх. «АгробизнесИнкубаторэу» Джэджэ районым ит станицэу Дондуковскэм щагъэ­псыгъэр зышIыгъэри «Юж­газстроир» ары. Социальнэ псэо­лъаби ыгъэуцугъ, гъогухэм яшIы­ни, ягъэцэкIэжьыни хэлажьэ.

Ащ фэдэ щысэу къэпхьын плъэкIыщтыр бэ. Ащ ипащэ къызэриIуагъэмкIэ, непэ нэ­бгыри 100-м къыщымыкIэу Iут, IофшIэнэу яIэм, ар зыщагъэцэкIэрэ чIыпIэм ялъы­тыгъэу а пчъагъэм хагъахъо, ау аужырэ илъэсипшI-пшIыкIутфым Iоф­шIэпIэ чIыпIэхэм ащагъакIэу зыпарэкIи хъугъэп.

ЕтIани къыхэгъэщыгъэн фаер шIушIэ IэпыIэгъум мымакIэу хъызмэтшIапIэм ипащэ ынаIэ зэрэтетыр ары. ГущыIэм пае, хэушъхьафыкIыгъэ дзэ операциеу Украинэм щыкIорэм хэлэжьэрэ дзэкIолIхэм техникэкIэ IэпыIэгъу афэхъугъ, цIыфэу ащ къикIыжьыхэрэм адеIэ.

Андрей Тугулуковыр АР-м и Къэралыгъо Совет — Хасэм ияблэнэрэ зэIугъэкIэгъу идепутат, «Единэ Россием» ифракцие хэт. Пшъэрылъэу а IофшIэным къыгъэуцухэрэр гъэцэкIэгъэнхэр, хэдзакIоу цыхьэ къы­фэзышIыгъэхэм ягумэкIыгъохэм ядэгъэзыжьынкIэ адеIэ­гъэныр ипшъэрылъ шъхьаIэу елъытэ.

— ПсэолъэшIыным илъэсипшI пчъагъэу естыгъэм дэгъоу къыз­гурагъэIуагъэр мы лъэныкъомкIэ законодательствэм щыкIагъэхэр зэриIэхэр, лъэхъаным диштэу ахэр гъэкIэжьыгъэнхэ фаеу зэрэщытыр ары. Ащ ама­лэу сиIэмкIэ сыдэлэжьэнэу сы­­фай, — къыIуагъ ащ. — ЕтIанэ, Адыгеим сыкъихъухьагъ, нэмыкI чIыпIэ сыкъикIыгъэп, нэмыкI субъекткIэ схъо­жьынэу зыпарэкIи сыгу къихьагъэп. Республикэм хэхъоны­гъэ­хэр мымакIэу ышIыгъэх, ахэм сарэгушхо, сэри сишIуагъэ къэз­гъэкIоным, ахэм сиIахь ахэслъхьаным сыпылъ.

ГухэлъышIоу иIэхэр къы­дэ­хъунхэу Андрей тыфэлъаIо, ежьы­ри, хъызмэтшIапIэу зипащэм Iутхэми ясэнэхьат епхыгъэ мэфэкIымкIэ тафэгушIо!

ХЪУТ Нэфсэт.