Адыгеим и ЛIышъхьэу КъумпIыл Мурат къалэу Мыекъуапэ хэхьэрэ поселкэу Родниковэм дэсхэм зыкъызэрэфагъэзагъэм ипэгъокIэу зэIукIэгъу адыриIагъ.

ПсэупIэм дэсхэм ятхыгъэ Iофыгъо зэфэшъхьафхэр къыщаIэтыгъэх: чэтэхъо фабрикэр зэрэзэфашIыжьыгъэм, псэупIэм игъогухэмрэ псырыкIуапIэхэмрэ язытет ахэр ыгъэгумэкIыщтыгъэх. Поселкэу Родниковэм аптеки, спорт, кIэлэцIыкIу джэгупIэхэри, клуби зэрэдэмытхэр ащ итхэгъагъ. ЧIычIэгъ баиныгъэхэр къычIэзыхыхэрэм яIофшIэн хэбзэ икъу хэлъхьэгъэн зэрэфаери а тхыгъэм итыгъ.

КъумпIыл Мурат къызэрэхигъэщыгъэм­кIэ, республикэм ипащэхэр поселкэу Родниковэм ыпашъхьэ ит Iофыгъохэм ащэгъуазэх, ахэм язэшIохын яшъып­къэу акIуачIэ рахьылIэ.

Мыекъуапэ имэрэу Геннадий Митрофановым къызэриIуагъэмкIэ, поселкэу Родниковэм ичэтэхъо фабрикэщтыгъэр зытет чIыпIэр инвестиционнэ площадкэхэм яреестрэ хэгъэхьэгъэным джыдэдэм ыуж итых. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Ханскэ чэтэхъо фабрикэм» ипащэу Бырдж Хьаджмусэ Родниковскэ чэтэхъо фабрикэм инвестициехэр хилъхьэзэ тIэкIу-тIэкIузэ зыпкъ ригъэуцожьын зэримурадыр къыIуагъ.

АР-м псэолъэшIынымкIэ и Министерствэ ипащэ илIыкIо зэIукIэм зэрэщыхигъэунэфыкIыгъэмкIэ, урамэу Советскэм асфальт зытыралъхьэкIэ, сомэ миллион 35,7-м ехъу зытефэщт гъогуитфи агъэцэкIэжьын ямурад.

Федеральнэ программэу «Псы къабз» зыфиIорэм къыдыхэлъытагъэу километри 6,3-м ехъу зикIыхьэгъэщт псырыкIуапIэхэм яшIын поселкэм щыфежьагъэх. Къихьащт илъэсым фельдшер-мамыку IэзапIэм игъэцэкIэжьын пае сомэ миллиони 2,5-м ехъу къатIупщыщт, а IэзапIэм аптеки дыхэтынэу рахъухьэ. Джыдэдэм фельдшерым мыщ Iоф щешIэ. ГъэцэкIэжьын IофшIэнхэр заухыкIэ учреждением икъоу Iоф ышIэщт.

Федеральнэ проектэу «Джырэ шапхъэ­хэм адиштэрэ гурыт еджапI» зыфиIорэм тетэу гурыт еджапIэу N 24-м гъэсэныгъэмкIэ гупчэу «Точка роста» зыфиIорэм фэдэ щызэхащэщт. Джыдэдэм мыщ щыкIорэ гъэцэкIэжьын IофшIэнхэр заух­хэкIэ, физикэм, химием, биологием язэгъэшIэнкIэ джырэ шапхъэхэм ади­штэрэ оборудованиер ащ чIагъэуцощт. КIэлэцIыкIу джэгупIэм игъэцэкIэжьынкIэ аукцион зэрэзэхащэщтымкIэ макъэ къагъэ­Iугъ. Мы илъэсым шышъхьэIум и 25-м нэс ар атIупщын фае. Гурыт еджа­пIэм испорт джэгупIэ изэтегъэпсыхьан ахъщэу пэIухьащтым исмети зэхагъэуцогъах.

АР-м культурэмкIэ иминистрэ федеральнэ резерв фондхэмрэ къэралыгъо программэхэмрэ ямылъку къызфагъэфедэзэ, культурэмкIэ Унэм игъэцэкIэ­жьынкIэ гухэлъэу яIэхэр къыIотагъэх. Лъэпкъ проектэу «Культура» зыфиIорэм диштэу къэзыкIухьэрэ автоклубэу къафыхагъэкIыщтымкIэ поселкэм дэсхэм языгъэпсэфыгъо уахътэ гъэшIэгъонэу зэхэщэгъэным ыуж итыщтых.

ЧIычIэгъ баиныгъэхэр къычIэзыхырэ предприятиехэм псэупIэм иэкологие нахь макIэу зэIагъэхьаным епхыгъэ Iофыгъохэми зэIукIэм хэлэжьагъэхэр шъхьафэу атегущыIагъэх. Республикэм и ЛIышъхьэ уплъэкIунхэр зэхэзыщэрэ ведомствэ заулэмэ пшъэрылъ афи­шIыгъ карьерэхэм ащагъэфедэрэ мыжъо гъэуш­къой оборудованием сапэу къыIэтырэр, макъэу къыпыIукIырэр нахь макIэ ашIы­нэу, инертнэ пкъыгъохэм яIущынкIэ, гъогухэм ягъэцэкIэжьынкIэ, карьерэхэм ягъэсэежьынкIэ график гъэнэфагъэ къызэдыхахынэу.

ПсэупIэм икъоу газыр къылъыIэсыным, цIыфхэм язещэнкIэ график Iэрыфэгъу зэхэгъэуцогъэным, кIэлэцIыкIу IыгъыпIэу N 46-м изэтегъэпсыхьан япхыгъэ Iофыгъохэри псэупIэм дэсхэм зэIукIэм къы­ща­Iэтыгъэх. Iофыгъо пстэумкIи респуб­ликэм и ЛIышъхьэ пшъэрылъ гъэнэфагъэхэр афишIыгъэх.

Поселкэу Родниковэм дэт тхылъеджа­пIэр, гурыт еджапIэр, кIэлэцIыкIу Iыгъы­пIэр къызызэпеплъыхьэхэ нэуж КъумпIыл Мурат Мыекъуапэ имэриерэ поселкэм иадминистрациерэ япащэхэм анаIэ тыраригъэдзагъ игъом ыкIи дэгъоу рахъу­хьэгъэ IофшIэнхэр зэрэзэшIуахын фаем.

«Пшъэрылъэу тапашъхьэ итхэр икъоу дгъэцэкIэнхэ фае. ПсэупIэр зэрэцIыкIум емылъытыгъэу социальнэ инфраструктурэ пстэуми икъоу Iоф ашIэн фае. ПсэупIэм дэсхэр икъоу зэшIуамыхыгъэ Iофыгъо заулэмэ агъэгумэкIых. Пшъэрылъэу тиIэр лъэпкъ проектхэмрэ къэралыгъо программэхэмрэ адиштэу амал зэриIэкIэ нахь шIуагъэ къытэу Iоф тшIэныр ары. ПсэупIэм щагъэцэкIэрэ проектхэмкIэ унашъохэр зыштэрэ купым поселкэм ицIыф анахь чанхэу тхыгъэр къэзы­гъэ­хьыгъэхэри хэдгъэхьащтых», — къыIуагъ КъумпIыл Мурат.

Адыгэ Республикэм и ЛIышъхьэ ипресс-къулыкъу