Адыгеим и ЛIышъхьэу КъумпIыл Мурат поселкэу Родниковэм зэкIом, псэупIэм пэблагъэу чIычIэгъ баиныгъэхэр къычIэзыхыхэрэм аIукIагъ.

Республикэм и ЛIышъхьэ зэрэхи­гъэунэфыкIыгъэмкIэ, поселкэу Род­никовэм пэблагъэу чIычIэгъ баиныгъэ- хэр къычIэзыхырэ предприятиехэм экологиер зэрэзэIагъахьэрэм фэгъэхьыгъэу псэупIэм дэсхэм тхьаусыхэ тхылъхэр нахьыбэрэ къагъэхьы хъугъэ.

«Техникэ хьылъэр зэрар къызэрафэхъурэм, экологием изытет цIыфхэр лъэшэу агъэгумэкIых. Хэбзэгъэуцугъэм диштэу чIычIэгъ баиныгъэхэр къычIэзыхыхэрэм яIофшIэн зэхащэным кIэдэунхэу цIыфхэм фитыныгъэ яI. Мы Iофым фыщытыкIэу фыряIагъэм отраслэм ипредприятиехэр икIэрыкIэу хэплъэжьынхэу, уплъэкIунхэм афэгъэзэгъэ къулыкъухэм унашъоу къафашIыхэрэр джау сыд­ми зэрагъэцакIэщтыгъэм текIынхэу афэсэгъэпытэ», — къыIуагъ КъумпIыл Мурат.

АР-м тыкъэзыуцухьэрэ дунаим икъэу­хъумэнкIэ ыкIи чIыопс къэкIуапIэхэмкIэ и ГъэIорышIапIэ ипащэхэм чIычIэгъ баиныгъэхэр къычIэзыхыхэрэм дунаим зэрарэу рахырэр нахь макIэ шIыгъэнымкIэ зигъо алъэгъурэ Iофыгъо заулэ ягугъу къашIыгъ.

Компаниехэу «СатыушI унэу МНК», «Балади» зыфиIохэрэм сапэм зыкъымыIэтыным пае гъэмафэрэ мыжъо гъогу­хэм псы атыракIэнэу афагъэпы­тагъ. Iахьзэхэлъ обществэу «ДСУ N 3-м» пшъэрылъ фашIыгъ шышъхьэIур имыкIызэ поселкэу Родниковэм иапэрэ дэхьапIэ ыгъэцэкIэжьынэу. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Чистоград» зыфиIорэм пшъэрылъ фашIыгъ поселкэу Севернэм къэзыухьэрэ гъогумкIэ инертнэ пкъыгъо­хэр ащэнхэу. Фирмэу «Агротоп-Юг» зыфиIорэм унашъо фашIыгъ чэщырэ мыжъор зэрагъэушкъоирэ оборудованием Iоф римыгъэшIэнэу, производственнэ чIыпIэхэм псы атырикIэнэу. Асфальт гъогур зэщамыгъэкъоным пае предприятиехэм пшъэрылъ афашIыгъ инертнэ пкъыгъохэм яIущынкIэ график гъэнэфагъэ гъэмафэрэ зэдызэхагъэуцонэу.

Адыгэ Республикэм и ЛIышъхьэ ипресс-къулыкъу