Зэрэрахъухьэгъагъэм тетэу гъогушIхэм гъэцэкIэжьын IофшIэнхэр ипIалъэм Октябрьскэ дамбэм щаухыгъэх, шышъхьэIум и 10-м ехъулIэу гъогур къызэIуахыжьыгъ.

— Район гупчэм – къуаджэу Тэ­хъутэмыкъуае нэсынхэм пае мафэ къэс километрэ пчъагъэ лыеу зэпызычыщтыгъэхэр ащ лъэшэу ыгъэгушIуагъэх, — къыIуагъ Тэхъу­тэмыкъое районым ипащэу Шъэо Аскэр.

ТхьамыкIагъо къызыщыхъун ылъэкIыщтыгъэ чIыпIэхэм гъэцэкIэжьын Iоф­шIэнхэр ащаухыгъэх, цIыфхэр сакъынхэ зэрэфаер къязыгъэшIэрэ тамыгъэ­хэр, хьылъэзещэхэм апае камерэхэр атырагъэуцуагъэх. КъэIогъэн фае автомобиль псынкIэхэм анэмыкI дамбэм щызекIохэ зэрэмыхъущтыр.

— Республикэм и ЛIышъхьэу КъумпIыл Мурати, мэхьанэшхо зиIэ гъогум игъэцэкIэжьын къыхэлэжьэгъэ ведомствэ пстэуми лъэшэу тафэраз. ЩэIагъэ къызэрэзхагъэфагъэм, тыкъызэрагурыIуагъэм апае Тэхъутэмыкъое районым исхэми «тхьашъуегъэпсэу» ятэIо, — ритхагъ Шъэо Аскэр социальнэ хъытыум щыриIэ нэкIубгъом.