Къоджэ псэупIэхэм хэхъоныгъэ ягъэшIыгъэным фэгъэхьыгъэ къэралыгъо программэм къыдыхэлъытагъэу мы илъэсым Адыгеим щызэшIуахыщтхэм сомэ миллиардрэ миллион 500-рэ апэIуагъэхьанэу агъэнэфагъ.

АщкIэ псэупIэхэр зэтырагъэ­псыхьэх, кIэлэцIыкIу IыгъыпIэ­хэр, культурэм иунэхэр, ФАП-р, спортзалхэр, гъэстыныпхъэ шхъуантIэм, псым якIуапIэхэр ашIых, агъэцэкIэжьых. ПстэумкIи псэолъэ 45-у агъэнэфагъэм инахьыбэр аухыгъ.

— Сомэ миллиардрэ миллион 200-р зищыкIагъэм пэIудгъэхьагъ. Программэм ишIуагъэкIэ IофшIэпIэ чIыпIэхэм миным ехъу къа­хэхъонэу ары тызэрэгугъэрэр, чIыпIэ 324-р къатыгъах, — къыIуагъ АР-м мэкъумэщ хъызмэтымкIэ иминистрэу Къуанэ Анзаур.

АР-м и ЛIышъхьэу КъумпIыл Мурат пIалъэу агъэуцугъэхэм ауж къинэрэ псэуалъэхэм апае пшъэрылъ гъэнэфагъэхэр муниципальнэ образованиехэм япащэхэм афишIыгъ. Анахьэу анаIэ зытетын фаехэр къуаджэу Къэ­быхьаблэ, селоу Большесидоровскэм ыкIи къутырэу Петровым ащашIырэ ФАП-р, къутырэу Красная Улька зыфиIорэм ща­гъэуцурэ кIэлэцIыкIу IыгъыпIэр, культурэм и Унэ заул.

Псэуалъэхэм яшIын е ягъэ­кIэжьын ищыкIэгъэ проект тхылъхэм ягъэхьазырыни агъэ­псынкIэнэу республикэм ипащэ афигъэпытагъ.

— Проектхэм яегъэжьапIэхэм къащыублагъэу лъэшэу тынаIэ атетын, зыпари хэмызэу ищыкIэгъэ пстэур къыдэтлъытэн фае. Подрядчикэу Iоф адэзышIэщтми мэхьанэ иI. Iэпэдэлэлныгъэ къахэмы­фэным шъунаIэ тежъу­гъэт. Къэралыгъо пшъэ­рылъхэр игъом ыкIи икъоу пхырыщыгъэнхэр шIокI зимыIэ Iоф. Ары пакIошъ, пIалъэхэм апэ титэу тыкIоным тыпылъын фае, — къыIуагъ КъумпIыл Мурат.