УнакIэ афашIыщт
Адыгеим сомэ миллион 450-рэ фэдиз къытефагъ. Ар нэжъ-Iужъхэмрэ сэкъатныгъэ зиIэхэмрэ зыщаIыгъхэ республикэ интернатым иотделениякIэу нэбгырэ 250-м телъытагъэм ишIын пэIуагъэхьащт. УФ-м и Къэралыгъо Думэ Адыгеим ыцIэкIэ щыIэ депутатэу, бюджетымкIэ ыкIи хэбзэIахьхэмкIэ и Комитет хэтэу Владислав Резник иIэпыIэгъукIэ УФ-м и Федеральнэ ЗэIукIэ и Комиссие къыдыригъэштагъэу Правительствэм ащ фэдэ IэпыIэгъу ыгъэнэфагъ.
АР-м IофшIэнымкIэ ыкIи социальнэ хэхъоныгъэхэмкIэ и Министерствэ къызэритыгъэмкIэ, псэуалъэм ипроект зызэрэрагъэушъомбгъугъэм ыкIи нахь лъапIэ зэрэхъугъэм афэшI федеральнэ программэу «ЦIыфхэм социальнэ IэпыIэгъу ягъэгъотыгъэныр» зыфиIорэм къыдыхэлъытагъэу ахъщэр къатIупщыщт. Ари зэрэхэтэу, зэкIэмкIи сомэ миллиардрэ миллион 200-рэ отделением ишIын тефэщт, ащ щыщэу сомэ миллион 12,4-р республикэ бюджетым къыхэхыгъэщт.
Мы уахътэм зэнэкъокъухэр макIох. IофшIэнымкIэ ыкIи цIыфхэр социальнэу къэухъумэгъэнхэмкIэ Урысые Федерациемрэ Адыгеимрэ яминистерствэхэр зэзэгъыныгъэм зэдыкIатхэхэмэ, псэуалъэм ишIын рагъэжьэщт.
Унэ-интернатым иотделение «Активное долголетие» зэреджагъэхэр. Мы илъэсым сомэ 492255-рэ, 2023-м — 322071,7-рэ ыкIи 2024-рэ илъэсым сомэ 363626,9-рэ ащ ишIын пэIуагъэхьащт. Федеральнэ Гупчэм IэпыIэгъоу къытыгъэм ишIуагъэкIэ квадратнэ метрэ мин 21,3-рэ иинагъэу, лъэхъаным диштэу зэтегъэпсыхьагъэу унакIэ республикэм зэригъэуцущтыр АР-м и ЛIышъхьэу КъумпIыл Мурат къыкIигъэтхъыгъ. Мы илъэсым ар рагъэжьэщт, 2024-м аухынэу щыт.
ОтделениякIэм нэжъ-Iужъхэм псэукIэ амал тэрэзхэр яIэнхэм ищыкIэгъэ пстэур къыщыдэлъытэгъэщт, лъэхъаным диштэрэ псэуалъэхэр, оборудованиер чIэтыщтых, зызщагъэпсэфыщт ыкIи яуахътэ шIуагъэ къытэу зыщагъэкIощт залхэр, унэхэр хагъэуцощтых.
— Нэжъ-Iужъхэм тынаIэ атетыныр къэралыгъом пшъэрылъ шъхьаIэу къыгъэуцухэрэм ащыщ. УФ-м и Президентэу Владимир Путиныр ащ фытегъэпсыхьэгъэ проект зэфэшъхьафхэм кIэщакIо афэхъугъ. Социальнэ сферэр гъэкIэжьыгъэным пае федеральнэ гупчэм амалэу къытырэр зэкIэ дгъэфедэным тыпылъ. Тинахьыжъхэм тынаIэ зэратетыр зэхашIэн фае, — къыIуагъ КъумпIыл Мурат.
Нэжъ-Iужъхэмрэ сэкъатныгъэ зиIэхэмрэ зыщаIыгъхэ республикэ интернатым нэбгырэ 279-рэ мы уахътэм чIэс. Ахэм чэщи мафи медицинэм иIофышIэхэр алъэплъэх. Унэу зыщаIыгъхэм гъэпсэфыпIэхэр, спортым, музыкэм, Iэпэщысэхэм яшIын зыщапылъыщтхэ чIыпIэхэр иIэх.
— УФ-м и Президент кIэщакIо зыфэхъугъэ лъэпкъ проектхэм ащыщэу «Демографием» зыныбжь хэкIотагъэхэм социальнэ IэпыIэгъу ягъэгъотыгъэным чIыпIэ ин щеубыты. Ащ ипхырыщын фытегъэпсыхьагъэх «ТилIэуж нахьыжъхэр», «Социальнэ IэпыIэгъу цIыфхэм ягъэгъотыгъэныр» зыфиIорэ федеральнэ программэхэр. Лъэпкъ проектыр, къэралыгъо программэхэр пхырыщыгъэнхэм Адыгеим ипащэхэм лъэшэу Iоф дашIэ, нэжъ-Iужъхэм псэукIэ амал дэгъухэр яIэнхэм, япсауныгъэ къыщымыкIэным, ягъашIэ кIыхьэ хъуным анаIэ тет. Арышъ, ащ фытегъэпсыхьэгъэ программэхэр пхырыщыгъэнхэм ищыкIэгъэ федеральнэ IэпыIэгъур къыдэтхыным тапэкIи ыуж титыщт, — къыIуагъ Владислав Резник.