Шэуджэн районым щытегущыIагъэх
АР-м и Къэралыгъо Совет – Хасэм и Тхьаматэу Владимир Нарожнэм социальнэ газификацием фэгъэхьыгъэ программэр зэрэпхыращырэм зыщигъэгъозэнэу Джэджэ районым зэрэщыIагъэм ыпэкIэ игугъу къэтшIыгъагъ. Парламентым ипащэ игуадзэу, мэкъумэщ политикэмкIэ, мылъку ыкIи чIыгу зэфыщытыкIэхэмкIэ Комитетым ипащэу Цэй Эдуард, АР-м экономикэ хэхъоныгъэхэмкIэ, мэкъумэщ хъызмэтымкIэ иминистрэхэу Шэуджэн Заур, Къуанэ Анзаур, АО-у «Газпром межрегионгаз Майкоп» зыфиIорэм ипащэу Игорь Сырчиныр игъусэхэу ащ епхыгъэ Iофхэм зыщатегущыIагъэхэ зэхэсыгъо зэхащэгъагъ.
Адыгеим и Парламент ипресс-къулыкъу тызэрэщигъэгъозагъэмкIэ, ащ ыуж Владимир Нарожнэмрэ Цэй Эдуардрэ Шэуджэн районым щыIагъэх, газификацием фэгъэхьыгъэ зэхэсыгъо щызэхащэгъагъ.
Парламентым ипащэхэм АО-у «Газпром межрегионгаз Майкоп» зыфиIорэм ипащэу Игорь Сырчиныр ягъусагъ. Ащ къызэриIуагъэмкIэ, социальнэ догазификацием фэгъэхьыгъэ программэм къыщыдэлъытагъэхэр зэрэпхыращыщтхэ планэу АР-м и ЛIышъхьэ ыштагъэм зэрэщыгъэнэфагъэмкIэ, АдыгеимкIэ щагу 6649-рэ ащ къыхеубытэ. Ахэм ащыщэу 424-р Шэуджэн районым ит. Мы мазэм и 4-м нэс пштэмэ, газыр ищагу ращэлIэным пае лъэIу тхылъыр къэзытыгъэр унэгъо 64-р ары, газыр зыфыращэлIэгъахэр унэгъо 12 мэхъу.
ПсэупIэ кой администрациехэм япащэу зэхэсыгъом хэлажьэхэрэр гумэкIыгъоу зэрихьылIэхэрэм къатегущыIагъэх. Ахэм къызэраIуагъэмкIэ, унагъохэм ащыщыбэм унэу зэрысхэр, чIыгоу ар зытетыр ежьхэм яунаеу зэрэщытыр къэзыушыхьатырэ тхылъхэр яIэхэп. Джащ фэдэу газыр ещэлIэгъэнэу зытефэрэ щагухэм ащыщыбэм зыпари адэсэп.
Шэуджэн район администрацием ипащэу Аулъэ Рэщыдэ зэрэщигъэгъозагъэхэмкIэ, апэ зэхагъэуцогъэгъэ спискэм унэгъо 357-рэ хэтыгъ, нэужым, законым диштэу зэхъокIыныгъэхэр зыфашIыхэм, унэгъо 287-рэ къэнагъ. Ахэм ащыщэу 191-мэ ячIыгу Iахь гъунапкъэхэм газыр зэрыкIорэ трубэр аблэкIы, 40-мэ ящагу зэпечы, унэгъо 56-р ары зищагу епщэлIэн фаеу хъурэр.
— ЛъэIу тхылъхэм ятынкIэ, нэмыкIэу ищыкIагъэхэм ягъэхьазырынкIэ цIыфхэм IэпыIэгъу агъотын фае. Фитыныгъэу яIэхэри икъоу агурыжъугъаIох, ищыкIагъэмэ специалистхэр къыхэжъугъэлажьэх, къэбар жъугъэм иамалхэр, социальнэ сетьхэр жъугъэфедэх, — къыIуагъ республикэ Парламентым и Тхьаматэу Владимир Нарожнэм зэпстэур къызэфихьысыжьзэ. ХЪУТ Нэфсэт.